भारतीय सीमा बजार गएका प्रधानाध्यापक सम्पर्कविहीन
रामेछाप — मोटरसाइकल मर्मतका लागि भारतीय सीमा बजार गएका कालिका मावि भलुवाजोरका प्रधानाध्यापक कृष्णबहादुर कार्की ४ दिन देखि सम्पर्कविहीन भएका छन् ।
विद्यालयका शिक्षक सन्तोष थापा र विष्णु वुढाथोकीसँगै शुक्रबार भारतको सीमा भिट्टामोर हुँदै भारत जान हिडेका कार्की परिवारको सम्पर्कमा छैनन् । उनी घरपरिवारलाई आइतबार फर्कने बताएर मोटरसाइकल लिएर भारत गएका थिए । घरबाट हिडेयता कार्कीले परिवारसँग सम्पर्क गरेका छैनन् ।
कार्कीसँगै भारत गएका अन्य शिक्षकहरु सम्पर्कमा आएका छन् । सगैं गएका अन्य शिक्षकहरुले कार्कीसँग सम्पर्क टुटेको भन्दै घर आए नआएको बारे जानकारी मागेपछि उनको खोजी थालिएको छ ।
परिवारका सदस्यले नेपाल र भारतका विभिन्न क्षेत्रमा बेपत्ता प्रअ कार्कीको खोजी बढाएका छन् । उनको खोजीका लागि आइतबार नै जिल्ला प्रहरी कार्यालयमा हुलियासहित परिवारका सदस्यले निवेदन दिएका छन् ।
प्रकाशित : भाद्र ११, २०७५ १३:४०