राजमार्गमा चिरा बढ्दै

रमेशकुमार पौडेल

चितवन — नारायणगढ–मुग्लिन सडकको १७ किलो भन्ने ठाउँमा सडकमा परेको चिरा फराकिलो हुँदै गएको छ ।

त्यहाँ ७० मिटर लम्बाइसम्म आधा सडक भासिएको छ । नयाँ निर्माणका कारणले नभएर पुरानो भूबनोटका कारण १७ किलोमा समस्या आएको आयोजानका अधिकारीहरू बताउँछन् । लगभग २० वर्ष पहिले रक एङरिङ गरेर सडक फराकिलो बनाएको ठाउँमा अहिले चिरा परेको नारायणगढ–मुग्लिन सडक आयोजनाका सूचना अधिकारी इन्जिनियर शिव खनालले बताए ।

असार २७ गते १७ किलो भन्ने ठाउँमा सडक चिरा परेको थियो । दिनप्रति दिन सडक भासिँदै गएर एक मिटरभन्दा बढी खाल्डो परेरको खनालले बताए ।

Yamaha

‘यो ठाउँमा पनि तत्कालै मर्मतको काम सुरु हुन सक्दैन । वर्षा साम्य भएपछि नियन्त्रणको विषयमा अध्ययन हुन्छ र त्यहीअनुसार काम सुरु हुन्छ,’ खनालले भने ।

एक महिनादेखि पहिरो खसेन
पानी पर्दा पहिरो खसेर घण्टौं बाटो बन्द हुने नारायणगढ–मुग्लिन सडकमा पछिल्लो झरीमा यस्तो समस्या खासै बल्झेन । सूचना अधिकारी खनालका अनुसार साउन २१ गते घुमाउनेमा बिहान सवा ६ बजे पहिरो जाँदा लगभग तीन घण्टा बाटो बन्द भएको थियो । त्यो दिनयता ठूला पहिरोहरू नझरेको उनले बताए ।

‘यो बीचमा झरी नपरेको हैन । तर पहिलाको जस्तो पहिरो खासै गएन,’ सूचना अधिकारी खनालले भने । चितवन जिल्ला ट्राफिक प्रहरी कार्यालयका प्रमुख रहेका प्रहरी निरीक्षक वेदप्रसाद गौतम शुक्रबार सानो पहिरोले सेतीदोभानमा केही बेर गाडी रोकिए पनि ठूलो पहिरो अचेल नगएको बताउँछन् ।

नारायणगढ–मुग्लिन सडक खण्डमा जेठ २८ यता साउन ३ गतेसम्म १४ पटक पहिरो गएको जिल्ला ट्राफिक प्रहरी कार्यालयले जनाएको छ । जसका कारण ७६ घण्टा बाटो बन्द भएको थियो । असार २० मा टोपेखोलामा पहिरो जाँदा लगातार १३ घण्टा बाटो रोकिएको थियो । जुन यो वर्षको अहिलेसम्मको लामो समय हो । अघिल्लो वर्ष लगातार ४३ घण्टासम्म बाटो बन्द भएको थियो ।

नारायणगढ–मुग्लिन सडकलाई एसियाली मापदण्डअनुरूपको दुई लेनको फराकिलो सडक बनाउन ठाउँठाउँमा पहाड काटिएको छ । पहाड काटेको ठाउँमा पटक पटक पहिरो जान्न्छ । पानी नपरे पनि सुक्खा पहिरो खसेर दु:ख दिने गरेको छ । पानी पर्दा समस्या झनै विकराल हुने गरेको छ ।

अघिल्लो वर्ष २९ ठाउँमा पहिरो गएको थियो । यो वर्ष ६ ठाउँमा ठूलो पहिरो गएको सूचना अधिकारी खनालले जानकारी दिए । पहिरो नियन्त्रणका लागि गत वर्ष १४ करोड रुपैयाँ खर्च भएको थियो । यो वर्ष पहिरो सक्रिय रहेको ठाउँमा दसैंपछि अध्ययन गरेर नियन्त्रणका योजनाहरू ल्याउने इन्जिनियर खनालले बताए । दुई वर्षभित्र काम सक्ने गरेर ०७२ सालको वैशाखबाट निर्माण सुरु भएको थियो । तर समयमा काम सक्न गाह्रो भएको थियो ।

प्रकाशित : भाद्र २०, २०७५ ०८:५०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

ट्राफिक नियम पालना नगरे खाजा र चकलेट !

रमेशकुमार पौडेल

चितवन — गाडी सानो होस् वा ठूलो चालकले सवारी चालक अनुमतिपत्र (लाइसेन्स), गाडीधनी पुर्जालगायत कागजपत्र साथमा राख्नुपर्ने नियम छ । गाडीको अवस्था चुस्त हुनुपर्छ । ट्राफिक नियम पालना गरी चलाउनुपर्छ । नियम पालना नगरे कारबाही भोग्नुपर्छ ।

स्कुटरको नम्बर प्लेट खुइलिएर नबुझिने भएपछि प्रहरीले चालकलाई जरिवानको साटो गुलियो खाजाको पोका दिँदै । तस्बिर : रमेशकुमार पौडेल

अचेल छडे जाँच गर्न जुनसुकै समय र ठाउँमा प्रहरी बस्छ। त्यसरी बस्ने टोलीले भेटे कारबाही स्वरूप जरिवाना तिर्नुपर्छ।

पूर्व-पश्चिम राजमार्गअन्तर्गत रत्ननगरमा मंगलबार दिउँसो ट्राफिक नियम पालना भए/नभएको चेक गर्न प्रहरीले छडे जाँच थाल्यो। ट्राफिक नियम पालना नगर्ने चालकहरू एकपछि अर्को भेटिए। तर, योपटक प्रहरीले कारबाहीका लागि जरिवाना तिर्न भन्दै रसिद काटेन। नियम मिच्नेहरूले चकलेट पाए। अनि ट्राफिक प्रहरी प्रमुख, प्रहरी निरीक्षक वेदप्रसाद गौतमको हातबाट गुलियो खाजाको पोका पनि साथै पाए।

‘थाहा पाएर पनि नियम पालना नगर्ने भनेको लापरबाही हो। जरिवाना नै काट्नुपर्ने हो। तर तपाईंहरूलाई लज्जाबोध होस भनेर चकलेट बाँडेका हौं,’ ट्राफिक प्रमुख गौतम चालकहरूलाई सम्झाउँदै थिए। गल्ती पनि गर्ने गुलियो खाजा पनि पाउने, यस्तो किन? इलाका प्रहरी कार्यालय रत्ननगरका प्रमुख दयानिधि ज्ञवाली भने, ‘कहिले-काहीं मीठो तरिकाले पनि नियम सम्झाउँ भनेर हो नि। अरू बेला कारबाही नै हुन्छ।’

चितवन सडक दुर्घटना धेरै हुने जिल्लामध्ये पर्छ। अघिल्लो आवमा २ सय ७१ दुर्घटना हुँदा १ सय ३२ जनाको ज्यान गएको थियो। ट्राफिक प्रहरी प्रमुख गौतमका अनुसार ५ सय २९ जना घाइते भए। त्यसैले सडकमा गुडा अपनाउनुपर्ने सावधानी र ट्राफिक नियमबारे अनेक तरहले चेतना जगाउनुपरेको गौतमको भनाइ छ। सडकमा उभिएर प्रहरीले जरिवाना मात्रै काट्छ भन्ने भावना हटाउन पनि गुलियो खाजा दिने सोंच बनाएको उनले बताए।

प्रकाशित : भाद्र १९, २०७५ २१:२३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT