३ वर्षपछि सकियो विद्यार्थीको कष्ट

कान्तिपुर संवाददाता

रामेछाप — बाँसको टहराबाट छिर्ने चिसो सिरेटो र जस्ताबाट झर्ने शीतले अब धोबीको झट्टेश्वर माविका विद्यार्थीलाई सताउने छैन ।

भूकम्पपछिका ३ वर्ष कष्ट सहेर छाप्रोमा अध्ययन गरेका विद्यार्थी हेर्दै लोभलाग्दो आधुनिक भवनमा सरेका छन् । ‘अब जाडो र शीत दुवै छलिएका छन्,’ छात्रा प्रमिला तामाङले बताइन् ।


आफूले कल्पना गरेभन्दा राम्रो भवन पाएको स्थानीय कुमार पाख्रिन बताउँछन् । झन्डै ७ सय विद्यार्थी अध्ययन गर्ने यो विद्यालयमा ५ आधुनिक भवन निर्माण भएका छन् । सबै सुविधासम्पन्न र शैक्षिकमैत्री छन् । भवनसँगै डेस्सबेन्चलगायत शैक्षिक सामग्री पनि प्राप्त भएसँगै अभिभावक र शिक्षक दुवै खुसी छन्। ‘अब शैक्षिक पूर्वाधारको अभाव रहेन, सबैको दिलोज्यान गुणस्तरीय शिक्षाका लागि हुुनुपर्छ,’ प्रधानाध्यापक रुक्मणी बस्नेतले बताइन् । गाउँपालिकाको केन्द्रमा रहेको उक्त विद्यालयलाई सिकाइ उपलब्धिका हिसाबले पनि नमुना बनाउने काममा लागिपर्ने बस्नेतले बताइन् । ‘हामी सबैको ध्येय अब गुणस्तर पठनपाठनमा हुनेछ,’ उनले भनिन्।

Yamaha


भूकम्पबाट क्षति भएको उक्त विद्यालयको भवन एसियाली विकास बैंकको लगानीमा पुनर्निर्माण भएको हो । खानी/शर्मा जेभीले विद्यालय भवन निर्माणको ठेक्का पाएको थियो ।


निर्माण व्यवसायीले तोकिएको समयमा नै निर्माण कार्य सकेर विद्यालयलाई भवन बुझाएको हो । लिखु तामाकोसी गाउँपालिका अध्यक्ष गोविन्दबहादुर खड्काले एक कार्यक्रमबीच भवनको साँचो प्रधानाध्यापक बस्नेतलाई हस्तान्तरण गरेका छन् । साँचो हस्तान्तरण गर्दै खड्काले सुविधासम्पन्न आधुनिक भवनमा सरेका बालबालिकाहरूले अध्ययनमा निखार ल्याउनुपर्ने बताए ।

Esewa Pasal

प्रकाशित : भाद्र २५, २०७५ ०९:०१
ADVERTISEMENT
ADVERTISEMENT
प्रतिक्रिया
पठाउनुहोस्

बेवारिसे राख्न ‘बा–आमा घर’

कान्तिपुर संवाददाता

ललितपुर — उनी लास देखेर डराउँदैनन् । बेवारिसे शवहरूमा आफ्नै हातले दागबत्ती पनि दिन्छन् । यस्ता फरक व्यक्ति हुन् महालक्ष्मी नगरपालिका–७ चाँगाथलीका विनयजंग बस्नेत । उनले अहिलेसम्म १ सय ४५ वटा बेवारिसे शवको दाहसंस्कार गरिसकेका छन् ।

महालक्ष्मी नगरपालिका–७ चाँगाथलीमा ‘बा–आमा घर’ शिलान्यास गर्दै महिला, बालबालिका तथा ज्येष्ठ नागरिकमन्त्री थममाया थापालगायत ।तस्बिर : प्रशान्त माली

यसका लागि आफैंले चार वर्षदेखि अस्पताल, सडक, मठमन्दिर र पाटीमा भेटिएका बेवारिसे शव प्रहरीको सहयोगमा जम्मा पर्दै आइरहेका छन् ।


बेवारिसे शवको दाहसंस्कारमात्र होइन, उनी बाटोमा देखिएका बेवारिसेलाई पनि छिटो अस्पताल पुर्‍याएर उपचारसमेत गराइदिन्छन् । उनले राजधानीका विभिन्न स्थानबाट ५ जना बेवारिसेलाई उद्धार गरेर मानव सेवाका नाममा खोलिएका विभिन्न आश्रममा पुर्‍याउन खोजे । तर कसैले राख्न चाहेनन् । र, उपचार गराउन चाहिने पैसा जुटाउन साथीभाइकहाँ गुहार मागे । अनि आफूसँग भएको थपथाप गरेर बेवारिसेहरूलाई टीकाथलीमा राखेर उपचार गराए । यस्तो घटना उनले धेरै पटक व्यहोरिसकेका छन् । उनी सकभर सबैलाई उपचार गराउन पाए हुन्थ्यो भन्ने चाहना राख्छन् ।


तर, बस्नेतसँग समाज सेवा गर्ने ठूलो आश्रम भने छैन । बस्नेतले कौशलटारका ५२ वर्षीय किरण पन्तलाई दुई महिनाअघि आकाशेपुलमुनि बेवारिसे अवस्थामा भेट्टाए । त्यतिबेला पन्त अत्यधिक जाँडरक्सी सेवनका कारण अचेत अवस्थामा थिए । अहिले उनी राम्रोसँग बोल्न र हिंड्न सक्ने भएका छन् । केही दिनअघि एउटा रेडियोले लागूपदार्थ दुव्र्यसनीविरुद्ध जनचेतनामूलक कार्यक्रममा उनको अन्तर्वार्ता पनि लियो । बेवारिसेलाई आश्रय दिने उद्देश्यले बस्नेतले चाँगाथलीमा आफ्नो ७ आना जग्गा ‘बा–आमा घर’ बनाउन दिने निर्णय गरेका छन् । बस्नेत भन्छन्, ‘जाँडरक्सीको उपचार सम्भव छ । दुव्र्यसनीलाई हेला होइन, माया गरौं ।’


बुवाको मुख हेर्ने दिन पारेर आइतबार महिला, बालबालिका तथा ज्येष्ठ नागरिकमन्त्री थममाया थापाले उक्त जग्गामा आश्रम बनाउन शिलान्यास गरेकी छन् । मन्त्री थापा भन्छिन्, ‘दिउँसो ज्येष्ठ नागरिक एक ठाउँमा भेला हुने गरी दिवा आश्रम बनाउन भनेर स्थानीय तहमा अनुदान पठाएका छौं । मन्त्रालयले सकेसम्म आमाबुवालाई आश्रममा भन्दा छोराछोरीले नै पाल्ने वातावरण बनाइरहेका छौं ।’ उनले ज्येष्ठ नागरिक ऐन संशोधन गरेर संसद्मा पेस गर्ने क्रममा रहेको बताइन् । ‘बेवारिसे हुन नदिन परिवारले जिम्मेवारी लिनुपर्छ,’ उनले भनिन्, ‘सन्तान नभएकाहरूको हकमा सरकारले जिम्मेवारी लिनुपर्छ । बूढाबूढीलाई दिँदै आइरहेको मासिक भत्ता बढाउने तयारी भइरहेको छ ।’


ललितपुर महानगरपालिकाका मेयर चिरीबाबु महर्जनले बेवारिसे व्यवस्थापन गर्न दरबन्दी रकम सहज ढंगबाट निकासा गरिने बताए । ‘बेवारिसे राखिने ‘बा–आमा घर’ बनाउन सक्दो सहयोग गर्नेछु,’ उनले भने । महालक्ष्मी नगरपालिकाका मेयर रामेश्वर श्रेष्ठले पनि ‘बा–आमा घर’ बनाउन सक्दो सहयोग गर्ने प्रतिबद्धता जनाए ।

प्रकाशित : भाद्र २५, २०७५ ०९:००
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT