काभ्रेमा नेविसंघको शैक्षिक हड्ताल, दोस्रो दिन पनि पढाइ प्रभावित

प्रधानमन्त्रीको तस्बिर बिगारेर फेसबुकमा शेयर गरेको आरोपमा पक्राउ परेका नेविसंघ तपेश्वर मावि इकाई अध्यक्ष कृष्ण ढकालको रिहाइको माग गर्दै जिल्ला समितिले आइतबार र सोमबार आव्हान गरेको हड्तालका कारण निजी तथा सार्वजनिक विद्यालयको पठनपाठन ठप्प भएको हो ।

पक्राउको विरोधमा चरणबद्ध आन्दोलन घोषणा गरेको नेविसंघले आइतबार जिल्ला प्रशासन कार्यालय काभ्रे घेराउ गर्दै प्रमुख जिल्ला अधिकारी कृष्णबहादुर राउतलाई ज्ञापनपत्र बुझाएको थियो । नेविसंघ केन्द्रले पनि आन्दोलनको कार्यक्रम घोषणा गर्दै सोमबार ७७ वटै जिल्लामा प्रधानमन्त्रीको पुत्ला दहन गर्ने, बुधबार जिल्ला सदरमुकामहरुमा दुई घण्टा चक्काजाम गर्ने लगायतका कार्यक्रम सार्वजनिक गरेको छ । विना शर्त रिहा नगरिए आन्दोलन अझ शसक्त गर्ने नेविसंघ काभ्रेका अध्यक्ष नृपेश वादेले चेतावनी दिए ।

१६ वर्षीय ढकालले कुकुरको शरीरमा प्रधानमन्त्रीको फोटो जोडिएर बनाएको पोष्ट आफ्नो वालमा शेयर गरेका थिए । ‘गल्ती’ भएको स्वीकारेर आफ्नो पोष्ट हटाइसकेका उनलाई प्रहरीले पक्राउ गरी हिरासतमा राखेर अनुसन्धान गरिरहेको छ ।

ढकालले शेयर गरेको सोही फोटो ‘सामाजिक सञ्जाल’ मा पुन: सेयर गरेको भन्दै पत्रकार कविराज ढकाल पनि पक्राउ परेका छन् । प्रहरी आफैले सञ्चालन गरेको ग्रुप च्याटमा उक्त पोष्ट सेयर गरेको भन्दै प्रहरीले उनलाई पक्राउ गरी महानगरीय अपराध महाशाखा टेकुमा राखेको छ ।

उक्त बिषय पनि साइबर क्राइमको बिषयबस्तु भएको भन्दै उनलाई पनि पक्राउ गरिएको काभ्रे प्रहरीले जनाएको छ । दुवैलाई १० दिनको म्याद थप गरेर अनुसन्धान भइरहेको प्रहरीले जनाएको छ ।