सीमा जोड्ने सडक अवरुद्ध

बर्खालगत्तै मर्मतमा जुटेको चाइना रेलवे कन्स्ट्रक्सन ग्रुप कम्पनी (सीआरसीसी) ले जीर्ण सडक निर्माणको काम बीचैमा रोकेको छ । भूकम्प, भोटेकोसी बाढीदेखि पहिरोले क्षतिग्रस्त तातोपानीको पिप्लाङदेखि कोदारी बजार खण्ड मर्मत सकेर सीआरसीसीले लिपिङ क्षेत्रको सडक बनाइरहेको थियो ।

लिपिङ र कोदारी क्षेत्रमा पहिरो गएपछि ‘सपोर्ट पिलर’ को कामलाई रोकिएको छ । ‘कोदारी खण्ड माथिबाट बगेर आएको पहिरोले पुरिएपछि उनीहरूले आफ्नो काम रोकेका छन्,’ सीमास्थित सशस्त्र प्रहरी नायब उपरीक्षक कृष्णगोपाल गुरुङले भने ।

अरूभन्दा लिपिङ क्षेत्रको ५ खण्डमा तल्लो संरचना एकदमै जीर्ण भएकाले सीआरसीसीले विशेष प्राथमिकतामा राखेर काम गरिरहे पनि अहिले रोकिएको उनले बताए । ‘शनिबारदेखि लगातार झरिरहेको पहिरो अझै रोकिएको छैन,’ उनले भने । अवरोध खोलेको १ घण्टामै पहिरो खसेर काम रोकिएको उनले बताए ।

चीनतर्फ बन्दै

चीनको सीमा सुरक्षार्थ बसेका प्रहरी अधिकारीका अनुसार तातोपानी नाका खुलाउन चीन पूर्णतयारीमा जुटेको छ । क्षतिग्रस्त मितेरी पुलदेखि खासासम्मको ७ किमि पुनर्निर्माण सकिन लागेको छ ।

‘नाका खोल्न ५ महिना नबित्दै यहाँको भौतिक संरचना तयार बनाउन जुटिरहेका छौं,’ खासादेखि मितेरी पुलसम्मको अनुगमन टोलीको नृेतत्व गरिरहेका चिनियाँ प्रहरी कप्तान टसीले भने ।