स्थानीय तहका कर्मचारी आन्दोलनमा

स्थानीय तहमा कार्यरत अस्थायी, करार, ज्यालादारी कर्मचारीहरुलाई सर्वोच्च अदालतको आदेशको आधारमा विशेष प्रतियोगितामार्फत स्थायी गर्ने र सेवा अवधि गणनाका आधारमा हुने वृत्तिविकासको सुनिश्चितता गर्नुपर्ने उनीहरुको माग छ । त्यसैगरी स्थानीय तहमा फोहारेमैला तथा सरसफाई क्षेत्रमा कार्यरत कर्मचारीहरुको पेसागत सुरक्षाको प्रत्यभूति नगरी निजी क्षेत्रमा लैजान लागेको भन्दै तत्काल रोकी सोही क्षेत्रमा कार्यरत कर्मचारीहरुको रोजगारीको ग्यारेन्टी गर्न माग गरिएको छ ।

आन्दोलन परिचालन समितिले प्रमुख जिल्ला अधिकारीमार्फत सरकारलाई आफ्नो मागका सम्बन्धमा ध्यानाकर्षण गराएका छन् । शुक्रबार कर्मचारीहरुले कार्यालयमा कालोपट्टी बाँधेर १५ मिनेट कलम बन्द गरेका थिए । माग पूरा नभएसम्म विरोधका कार्यक्रम जारी राख्ने समितिका संयोजक पुष्कर शर्मा रिमालले बताए ।