सकियो खिचरा महोत्सव
चितवन — थारू समुदायको मौलिक पर्व माघीको अवसरमा पूर्वी चितवनको खैरहनीमा आयोजित खिचरा महोत्सव सोमबार सकिएको छ ।
थारु क्ल्याणकारिणी सभा क्षेत्र नं. ७ को आयोजनामा पुस २८ गते महोत्सव सुरु भएको थियो । यो छैटौं खिचरा महोत्सव हो । महोत्सव समापन कार्यक्रमका प्रमुख अतिथि प्रदेश–३ का मुख्यमन्त्री डोरमणि पौडेलले आदिवासी थारूहरूको संस्कार संस्कृति प्रदेशको मात्रै नभएर देशकै सम्पत्ति भएको बताए ।
चितवनको मैदानी क्षेत्रका मुख्य आदिवासी थारूहरूको गौरवमय परम्परालाई संरक्षण गर्न प्रदेश सरकारले चितवनमा संग्रहालय बनाउने योजना बनाएको मुख्यमन्त्री पौडेलले बताए । ‘चितवनको पूर्वी र पश्चिम क्षेत्रमा एउटा थारू संग्रहालय बनाउने प्रदेश सरकारको योजना छ । तपाईंहरू मिलेर राम्रो प्रस्ताव ल्याउनुहोला,’ मुख्यमन्त्री पौडेलले भने ।
थारू समुदायको आफ्नै खाले संस्कार, संस्कृति गीत, नाँच, पोसाक, गहना, खानाहरू रहेका छन् । ती केही हराएर गए पनि धेरै बाँकी नै छन् । हराएकाहरूको प्रदर्शन र बचेकाहरूको संरक्षण गर्न संग्रहालय महत्त्वपूर्ण हुने मुख्यमन्त्री पौडेलले बताए । ‘हाम्रो संस्कृति पर्यटकहरूले पनि रुचाएका छन् । चितवनमा वन्यजन्तु मात्रै हैन आदिवासीको संस्कार संस्कृति हेर्न पनि पर्यटक आउँछन्,’ उनले भने ।
महोत्सवमा यी परिकारहरूका साथै फागुनाच, झाम्टा नाचजस्ता मौलिक नृत्यहरू प्रस्तुत भएका थिए । ‘पहिला पहिला माघे संक्रान्तिमा खिच्रो खाने चलन पनि थियो । अहिले त्यो कम हुँदै गएको छ । तर चिच्चर, पोका, माछा, हाँको मासु र घोँगी खाने चलन कायमै छ,’ थारू अगुवा चन्द्रा चौधरीले भनिन् । ६ वर्षदेखि प्रत्येक वर्ष हुँदै आएको महोत्सवले थारूका परिकार अरू समुदायले पनि रुचाउन थालेको उनको भनाइ छ ।
कान्तिपुरकर्मी पुरस्कृत :
खिचरा महोत्सवको समापनको अवसरमा थारू कल्याणकारिणी सभा चितवन क्षेत्र नं. ७ ले कान्तिपुर चितवन संवाददाता रमेशकुमार पौडेललाई पुरस्कृत गरेको छ ।
पुरस्कारको राशि १५ हजार १५५ रुपैयाँ रहेको छ । कार्यक्रमका प्रमुख अतिथि प्रदेश ३ का मुख्यमन्त्री पौडेलले पत्रकार पौडेलाई पुरस्कार प्रदान गरेका थिए ।
थारू समुदायको संस्कार संस्कृतिका विषयमा कलम चलाउँदै आएका कारण पत्रकार पौडेललाई पुरस्कृत गरेको सभाले जनाएको छ ।
प्रकाशित : माघ ८, २०७५ ०७:४०
