मेलम्ची महसुलको आधा रकम माग

चौथो नगरसभाले प्रभावित क्षेत्रमा पर्ने स्थानीय तहलाई रोयल्टीबापतको रकम जनसंख्याको आधारमा वितरण गर्नुपर्ने प्रस्ताव पारित गर्दै सम्बन्धित निकायलाई पत्राचार गर्ने निर्णय गरेको प्रमुख प्रशासकीय अधिकृत मोहन अधिकारीले जानकारी दिए ।

मेलम्ची खानेपानी आयोजनाले प्रभावित क्षेत्र भन्दै हाल मण्डनदेउपुर नगरपालिकामा गाभिएका साबिकका गैरिबिसौना देउपुर, महादेवस्थान, चण्डेनी, जैशीथोक र साबिक पाँचखाल गाविसको वडा नं ६ लाई प्रत्येक वर्ष १ करोड ४० लाख उपलब्ध गराउँदै आएको छ । मण्डन उपत्यका सामाजिक उत्थान समिति नामक गैरसरकारी संस्थामार्फत हँुदै आएको सहयोग नगरपालिकामार्फत सञ्चालन हुनुपर्ने उसको तर्क छ ।

चौथो नगरसभाले तामाकोसी जलविद्युत् आयोजनाको प्रशासरण लाइन नगरका विभिन्न भूभागमार्फत विस्तार हुने भन्दै रुट परिवर्तन गर्न अनुरोध पनि गरेको छ । चौथो नगरसभाले डीपीआरबिना ठूला योजनामा लगानी नगर्ने निर्णय गरेको अधिकारीले जानकारी दिए । नगरसभाले उद्योग दर्ता तथा नवीकरणका लागि वार्षिक शुल्क तय गरेको छ ।

क्रसर उद्योगका लागि ११ लाख, इँटा उद्योगका लागि ८ लाख, ढुंगा खानीका लागि ५ लाख, बालुवा खानीका लागि ५ लाख र बालुवा वासिङका लागि ३ लाख शुल्क निर्धारण भएको हो । चौथो नगरसभाले मदिराको उत्पादन, बिक्रीवितरण, प्रयोग र नियन्त्रणसम्बन्धी विधेयक र सुर्तीजन्य पदार्थ नियमन र नियन्त्रण गर्ने विधेयक पारित गरेको छ ।