मतपत्र विवाद २०औं पेसीमा पनि स्थगित

पटकपटक पेसी परे पनि सधैं स्थगित हुँदै आएको छ । बुधबार तोकेको पेसी सरकारी वकिलको कार्यालयबाट स्थगित भएको अदालतले जनाएको छ । स्थानीय तह निर्वाचनका बेला भरतपुर महानगरपालिकाको मतगणना अन्तिम अन्तिम हुँदै गर्दा २०७४ सालको जेठ १५ गते मध्यरातमा मतपत्रहरू च्यातिएका थिए । वडा नं. १९ को मत परिणाम अन्तिम चरणमा थियो । त्यसपछि गन्न बाँकी २० वडा मात्रै रहन्थ्यो । त्यस्तो अवस्थामा मतपत्र च्यातिएपछि भरतपुर १९ मा फेरि मतदान भएर परिणाम घोषणा गर्नुपरेको थियो ।

मतदानको विषयमा सर्वोच्च अदालतले नै टुंगो लगाएको थियो । त्यसैले अदालतबाट अब हुने फैसलाले निर्वाचन परिणाम कुनै असर पर्दैन । यो मतपत्र च्यातेको अपराधविरुद्धको मुद्दा मात्र हो । तर मत च्यात्नेहरूविरुद्ध चितवन अदालतमा परेको मुद्दा अझै विचाराधीन नै छ । मतपत्र च्यातिएपछि चितवन प्रहरीले तत्कालै दुईजना व्यक्तिहरू द्रोणबाबु शिवाकोटी र मधु न्यौपानेलाई गिरफ्तार गरेको थियो । उनीहरू तत्कालीन माओवादी केन्द्रका नेता कार्यकर्ताहरू थिए । माओवादी केन्द्रले त्यो बेला भरतपुरमा नेपाली कांग्रेससँग चुनावी गठबन्धन गरेर मेयर पदमा उम्मेदवारी दिएको थियो ।

आरोपित दुईजनाविरुद्ध चितवन जिल्ला अदालतमा मुद्दा पनि निकै छिटो दायर भएको थियो । उनीहरूविरुद्ध ७४ सालको जेठ १७ गते चितवन जिल्ला अदालतमा मुद्दा दायर भएको अदालतको विवरणमा उल्लेख छ । त्यसपछि सोही वर्षको साउन २४ मा यो मुद्दामा बहस गर्न पहिलो पेसी तोकिएको थियो ।

त्यसयता २० पटक पेसी तोकिए पनि एक पटक पनि बहस नभई स्थगित हुँदै आएको छ । सुरुका तीनवटा पेसी न्यायाधीश वासुदेव पौडेलको इजलासमा परेको थियो । पहिलो पेसीका दिन इजलास नै बसेन । दोस्रो पेसीमा सार्वजनिक बिदा परेको थियो । तेस्रो पेसी पर्दा न्यायाधीश पौडेल सुरुवा भएर गइसकेका थिए । त्यसपछिका सबै पेसी मुरारीबाबु श्रेष्ठको इजलासमा परेको छ । श्रेष्ठको पालामा पनि चार पटक इजलास बसेको छैन । पाँच पटक जिल्ला सरकारी वकिल र सात पटक प्रतिवादीको कानुन व्यवसायीले स्थगित गरेका छन् ।

‘अन्य कारणहरूले हैन । नभ्याएर नै हामीले त्यो मुद्दामा आज स्थगित गरेका हौं । म्याद जाने अरू मुद्दाहरू भएका कारण हामी त्यता व्यस्त हुनुपर्‍यो,’ चितवनका सरकारी वकिल यदुनाथ शर्माले भने । मेयर पदमा तत्कालीन एमाले उम्मेदार देवीप्रसाद ज्ञवाली र कांग्रेस माओवादी गठबन्धनबाट उम्मेदवार रहेकी माओवादीकी रेनु दाहालबीच तीव्र प्रतिस्पर्धा थियो ।

थोरै मतले ज्ञवाली अगाडि रहँदा मतपत्र च्यातिएको थियो । मतपत्र नच्यातिएको भएर लगातार गणना भएको भए एमाले उम्मेदवार विजयी हुने सम्भावना देखिएको थियो । तर मतपत्र च्यातिएका कारण सर्वोच्च अदालतकै आदेशमा वडा नं. १९ मा दोहोर्‍याएर मतदान हुँदा नतिजा रेनु दाहालको पक्षमा आएको थियो । यो घटनापछि एमाले माओवादी द्वन्द्व उत्कर्षमा थियो । तर घटना भएको छ महिना नबित्दै दुवै पार्टी गठबन्धन गरेर चुनाव लडे । अहिले पार्टी नै एक भएको छ ।