खैरेनीपुल निर्माण अन्तिम चरणमा

पुल नहुँदा सदरमुकामपारि रहेको बीपी राजमार्गको छोटो रुट होइन, पुरानै बाटो हुँदै दोब्बर समय लगाएर काठमाडौं पुग्नुपर्ने बाध्यता छ ।
टीकाप्रसाद भट्ट

रामेछाप — सुनकोसी, खैरेनीघाट पुलको निर्माणकार्य अन्तिम चरणमा पुगेको छ । पश्चिमी रामेछापेलीको आँखा गाडिएका १० वर्ष बितेपछि बल्ल पुलले आकार लिँदै छ । पुल निर्माण कार्य सम्पन्न हुन अझै केही महिना लाग्छ ।

‘यस पटक त पुल तयार होला भन्ने उत्साह हरेक साल हामीलाई जाग्थ्यो,’ स्थानीय जंगबहादुर माझीले भने, ‘तर दस वर्ष त्यत्तिकै बित्यो ।’ पुलमा धमाधम काम हुन थालेपछि त्यस क्षेत्रका बासिन्दाले हरेक दिन फेसबुकमा त्यसै कामको फोटो हालेर खुसी मनाइरहेका छन् । दिनहुँजस्तो खैरेनी पुल फेसबुकमा अपलोड भइरहेको छ ।

‘यतिका वर्ष हेर्दाहेर्दा आँखै तानिएका थिए अहिले पुल तानिन थालेको छ,’ माझी भन्छन्– दुई महिनापछि गाडी तर्ला जस्तो छ । स्टिलट्रसको काम भएकाले चाँडो काम हुनेमा स्थानीवासी ढुक्क छन् ।

पुलबिना स्थानीयवासीले हैरान खेप्नुपरेकोछ । खैरेनीको पुल नहुँदा सदरमुकामपारि रहेको बीपी राजमार्गको छोटो रुट होइन, पुरानै बाटो हुँदैदोब्बर समय लगाएर काठमाडौं पुग्नुपर्ने बाध्यता स्थानीयलाई छ । उक्त पुल तयार भएपछि पश्चिमी रामेछापबाट काठमाडौं पुग्न बढीमा ३ घण्टा लाग्छ । अहिले झन्डै ६ घण्टा लाग्छ । त्यस क्षेत्रका बासिन्दा सित्खाको पुल तरेर घुम्छन् । जब कि दैलोमा भएको पुल १० वर्षदेखि अधुरो छ ।

खैरनीपुलले बीपी राजमार्गसँग रामेछाप जोडिएपछि बेथान, खनियापानी, राकाथुम, हिलेदेवी, लखनपुर, टोकरपुर, खाँडादेवी, गौश्वारा, गुन्सी, दोरम्बा दिमीपोखरी लगायतका साबिकका गाविसका बासिन्दाले प्रत्यक्ष फाइदा लिन पाउनेछन् । उक्त क्षेत्रमा उत्पादन भएको तरकारी, गेडागुडी, काठमाडौं लैजान सहज हुनेछ । ‘सुनापति, दोरम्बा र खाँडादेवी गाउँपालिकामा निर्माण सामग्री र खाद्यान्न ढुवानीका लागि हालसम्म भोग्नुपरेको कष्ट सदाका लागि खैरेनीपुलले अन्त्य गर्छ,’ सुनापति गाउँपालिकाका प्रमुख प्रशासकीय अधिकृत सुनील निरौलाले भने, ‘यो वर्ष पुलको काम पूरा हुनुपर्छ ।’

सडक विभागले सुनकोसीको खैरेनीमा पुल निर्माणका लागि आर्थिक वर्ष २०६४/०६५ मा ठेक्का लगाएको हो । २ वर्षमा सक्नुपर्ने उक्त पुलको पटकपटक म्याद थप गरे पनि निर्माणपूरा भएको छैन । ‘यो वर्ष चाहिँ सक्ने लक्ष्य लिएर काम सुरु भएको डिभिजन सडक कार्यालय खुर्कोटले जनाएको छ ।

खैरेनी पुलमा आरसीसी स्ल्याब र स्टिल ट्रस दुवैको काम गर्नुपर्नेमा गत वर्ष आरसीसी स्ल्याब मात्र सकिएको थियो । पुलको उत्तर तर्फको भागमा स्टिल ट्रस जडान गर्ने काम धमाधम भइरहेको छ । ट्रस निर्माणको काम सकेपछि ढलानको काम मात्र बाँकी रहन्छ । चितवनको जलप नेपालले उक्त ट्रस निर्माण गरेको हो । पुल जोड्नका लागि पनि उक्त कम्पनीनै संलग्न छ ।

करिब ८३ मिटर लामो पुल निर्माणमा कन्काई, लामा खम्पाचे निर्माण सेवाले ठेक्का लिएको हो । खम्पाचे र लामा निर्माण सेवाका व्यवसायीले हात झिकेपछि कन्काई निर्माण सेवाले काम गर्दै आएको छ । सडक विभागले लगाएको काभ्रे र रामेछाप जिल्ला जोड्ने चौरी खोलाको पुलसमेत ८ वर्षदेखि अधुरो रहेको छ । गत वर्ष मात्र ठेक्का लागेको सुनकोसीकै सिन्धुरेटार मुक्पाघाट जोड्ने पुलको काम भने तीव्र गतिमा भइरहेको छ ।

प्रकाशित : माघ २७, २०७५ ०७:३४
ADVERTISEMENT
ADVERTISEMENT
प्रतिक्रिया
पठाउनुहोस्

यात्रा जोखिमपूर्ण

अनिश तिवारी

सिन्धुपाल्चोक — भोटेकोसी गाउँपालिका–३ का दुगुनागढी टाँगाका ५३ वर्षका सुकलाल तामाङलाई सधैं टाँगा पुलको भत्केको संरचनाले सताउने गर्छ । शनिबार घाँसपात गरेर घर फर्किरहेका तामाङ जीर्ण काठको पुल तरी पारि जाने/नजाने दोधारमा परेका भेटिए ।

भोटेकोसी गाउँपालिका वडा ३ को दुगुनागढी, टाँगास्थित जीर्ण झोलुंगे पुलमा जोखिमपूर्ण यात्रा गर्दै स्थानीय । तस्बिर : अनिश/कान्तिपुर 

‘बर्खा नजिकिँदै थाल्यो, झरीले पुल धेरै चिप्लो बनाएको छ, भारी बोकेर पारी कसरी तर्नु ?’ उनले प्रश्न गरे । २० वर्षअघि बनेको पुल दुई वर्षअघिदेखि कुहिन थालेपछि जीर्ण बन्दै गएको उनले सुनाए ।

पुल हुँदै भोटेकोसी गाउँपालिका लिस्तीकोट बगामका एक यात्रु सामग्री लिएर जाने क्रममा खसेर घाइते भएको उनले स्मरण गरे । ‘यस्तो पुलमा हिँड्नुपर्दा ज्यानकै जोखिम मोल्नुपर्छ, के गर्ने, अरू विकल्प छैन,’ उनले भने । तत्कालीन गाउँ विकास समितिले बनाएको झोलुंगे पुल दिनहँु काठ खस्दै गएपछि जीर्ण बनेको टाँगा गाउँका अगुवा वीरबहादुर तामाङको भनाइ छ । ‘स्थानीय सरकार जनप्रतिनिधिलाई धेरै गुहार माग्यौं, केही लछारपाटो लागेन,’ उनले भने ।

कोदारी राजगमार्गको सुक्खा बन्दरगाहबाट दुई किलोमिटरको दुगुनागढी महभीरबाट टाँगा झोलुंगे पुलले बगाम, छगाम गाउँको अघिल्लो क्षेत्र जोड्छ । ‘यो पुल मर्मतसम्भार नगर्दा स्थानीयले जोखिमपूर्ण यात्रा गर्नुपरेको छ,’ उनले भने । स्थानीय सरकारले केही नगरेमा स्थानीय आफैं जुटेर गर्ने योजनामा रहेको उनले जनाए ।

स्थानीयले घाँसदाउरा, चौंरी लैजाने एक मात्र माध्यम यही पुल मात्रै हो । भैरवकुण्ड तालको काखबाट आउने जुरुम्बा खोला तर्नका लागि अरू विकल्प छैन । पुलको समस्या बुझेकाले पहलको लागि लागिरहेको भोटेकोसी गाउँपालिका वडा ३ का दुगुनाका अध्यक्ष कैलाश पौडेलले बताए । ‘उहाँहरूको समस्या बुझेको छु, तत्कालै यसको समाधानमा लाग्नेछु,’ उनले भने । प्रत्यक्ष जनतासँग प्रभाव पार्ने भौतिक पूर्वाधार भएकाले झोलुंगे पुललाई चाँडै बनाइने पहलकदमी लिएको उनले प्रस्ट्याए ।

स्थानीयले वर्षैपिच्छै रुख कटान गरेर पुलको मर्मत गर्दै आएका छन् । जंगलको रुख काटे पनि पुलको अवस्था फेरिन सकेको छैन । बालबालिका, वृद्धवृद्धादेखि बिरामीलाई पुलले गर्दा आउजाउ गर्न समस्याबनेको छ । ‘पुल मर्मत गर्छौं भनेर रुख काटियो तर मर्मत गतिलो गर्ने काम भएन, अब आफैं लाग्दै छु,’ उनले भने ।

प्रकाशित : माघ २७, २०७५ ०७:३३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT