स्वास्थ्य पत्रकारिताको विकासले स्वस्थ्य समाज

कान्तिपुर संवाददाता

धुलिखेल — मुलुकमा स्वास्थ्य पत्रकारिताको विकास भए मात्र स्वस्थ्य समाज निर्माण हुने औँल्याउदै स्वास्थ्य विटमा कार्यरत पत्रकारहरुको क्षमता अभिवृद्घिमा विशेष ध्यान दिनुपर्ने सरोकारवालाहरुले बताएका छन् ।

विभिन्न सञ्चारमाध्यममा हेल्थ बिटमा कार्यरत पत्रकारहरुको साझा संस्था ‘सोसाइटी अफ हेल्थकेयर जर्नलिस्ट नेपाल’ ले स्वास्थ्य पत्रकारहरुको क्षमता अभिवृद्घिका लागि धुलिखेलमा आयोजना गरेको तालिमका अवसरमा स्वास्थ्य पत्रकारको क्षमता बढाउन राज्य, सञ्चारगृह र स्वयं पत्रकारहरुले लगानी गर्नुपर्नेमा जोड दिएका हुन् ।

काठमाडौं विश्वविद्यालयका डीन एवं धुलिखेल अस्पतालका मुटुरोग विशेषज्ञ डा. राजेन्द्र कोजूले स्वास्थ्य समाचार एकदमै संवेदनशिल हुने भएकाले स्वास्थ्य पत्रकार विषय वस्तुमा पोख्त हुनुपर्ने बताए । उनले मुलुकमा स्वास्थ्य पत्रकारिताको पढाइ हुनुपर्ने समेत बताए ।

सरकारले अस्पताल र अस्पतालका बेड थप्दैमा स्वस्थ समाज निर्माण गर्न नसकिने दाबी गर्दै स्वास्थ्य अधिकारकर्मी एवं प्राथमिक स्वास्थ्य सेवा स्रोत केन्द्र ( रेस्पेक ) का कार्यकारी निर्देशक शान्तलाल मुल्मीले रोग लाग्नै नदिने वातावरण सिर्जना गर्न जनचेतना जगाउन स्वास्थ्य पत्रकारहरुको क्षमता बढाउनुपर्ने बताए ।

सोसाइटी अफ हेल्थकेयर जर्नलिस्ट नेपालका अध्यक्ष अतुल मिश्रले सत्य, तथ्य र सन्तुलित स्वास्थ्य पत्रकारिताले स्वस्थ्य समाज निर्माणमा अहं भूमिका खेल्ने भएकाले स्वास्थ्य पत्रकारहरुको क्षमता बढाउनुपर्ने र यसमा राज्य लगायतका सम्वद्घ सबै पक्षले चासो राख्नु पर्ने बताए ।

कार्यक्रममा स्वास्थ्य पत्रकारहरु दीपक दाहाल, पूर्णभक्त दुवाल, भगवती तिमिल्सिना, कमला गुरुङ, रिता तिमिल्सिना र हेल्थ केयर जर्नलिष्ट सोसाइटिका महासचिव पदमराज जोशी लगायतले स्वास्थ्यका समाचारले सञ्चार माध्यममा उचित स्थान पाउनुपर्नेमा जोड दिएका थिए । प्राथमिक स्वास्थ्य सेवा स्रोत केन्द्रको सहकार्यमा सम्पन्न दुई दिने तालिममा २० जना स्वास्थ्य पत्रकारको सहभागिता थियो ।

प्रकाशित : चैत्र १६, २०७५ २०:१६
ADVERTISEMENT
ADVERTISEMENT
प्रतिक्रिया
पठाउनुहोस्

गैरआवासीय नेपालीले १० अर्ब भित्र्याउने प्रतिबद्धता

कान्तिपुर संवाददाता

काठमाडौँ — गैरआवासीय नेपाली सङ्घ (एनआरएनए) ले प्रारम्भिक चरणमा १० अर्ब रुपैयाँ लगानी भित्र्याउने सरकारसँग समझदारी भएको छ । लगानी सम्मेलनको दोस्रो दिन उक्त रकमले नेपाल सरकारको प्राथमिकताका आयोजनामा लगानी गर्ने प्रतिबद्धता सहितको समझदारी भएको हो । 


समझदारीपत्रमा सरकारकातर्फबाट उद्योग विभागका महानिर्देशक विनोदप्रकाश सिंह र सङ्घका तर्फबाट अध्यक्ष भवन भट्टले हस्ताक्षर गरेका हुन्।

‘सरकारको समृद्ध नेपाल र सुखी नेपाली अभियानमा गैर आवासीय नेपालीहरूको सहभागिताका निम्ति एउटा सामूहिक लगानी कोष खडा गने विषयमा एक समझदारी पत्रमा हस्ताक्षर भएको छ,’ एनआरएनएद्वारा जारी विज्ञप्तिमा भनिएको छ, ‘यो लगानी कोष स्थापनाका लागि नेपालको प्रचलित कानुन अनुसार कम्पनी खडा गरिने छ।’

प्रारम्भिक चरणमा १० अर्ब रुपैयाँ लगानी भित्र्याउने प्रतिबद्धता सहित समझदारी भएको हो। ‘यस कोष मार्फत् नेपाल सरकारको प्राथमिकतामा परेका आयोजना तथा समग्र नेपालीको हितमा रहने साना ठुला परियोजनाहरूमा लगानी गरिने छ,’ विज्ञप्तिमा भनिएको छ।

प्रकाशित : चैत्र १६, २०७५ २०:०५
पूरा पढ्नुहोस्
प्रतिक्रिया
पठाउनुहोस्
ADVERTISEMENT