देवघाटमा ३० फिट अग्लो शिवमूर्ति बन्ने

कान्तिपुर संवाददाता

काठमाडौँ — चितवनस्थित देवघाटधाम अहिले धार्मिक पर्यटकको हब बन्दै गएको छ । मुलुकका विभिन्न भाग तथा भारतबाट समेत बर्सेनि हजारौंको संख्यामा पर्यटक देवघाट घुम्न आउने गर्छन् । माघे संक्रान्ति र साउन महिनाभर देवघाटमा पर्यटकको भीड लाग्छ । 

पर्यटकलाई आकर्षित गर्नकै लागि उक्त क्षेत्रमा ३० फिट अग्लो अष्टधातुको शिवमूर्ति निर्माण गरिने भएको छ । निर्माणमा आर्थिक सहयोग जुटाउन देवघाट संरक्षण प्रतिष्ठान (चितवनले पशुपति महोत्सव तथा अष्टधातु संकलन श्रीमद्भागवत विराट ज्ञान महायज्ञ’ गर्न लागेको छ । पशुपति क्षेत्रमा वैशाख १ गते सुरुभएको महायज्ञ ११ सम्म हुनेछ ।

Citizen

मूर्ति बनाउन आर्थिक र अष्टधातु अभाव भएकाले महायज्ञ गर्न लागिएको आयोजकले जनाएको छ । उक्त महायज्ञमा घरमा थन्किएर रहेका पुराना धातु पनि संकलन गरिनेछ । ३० फिट अग्लो अष्टधातुको मूर्ति सबैका लागि नौलो बन्नेछ । पर्यटकको केन्द्रविन्दु बन्नेछ ।
अष्टधातुबाट बन्ने यस प्रकारको मूर्ति अन्यत्र कहीँ नभएको आयोजकको दाबी छ । जमिनमुनि पूजा कोठा र धार्मिक संग्रहालय, पार्क, यात्रु विश्रामस्थललगायत संरचना निर्माण गरिनेछ । नारायणी नदीको किनारमा पैदलमार्ग, शिव पार्क, ११ वटा गौमुखीधारा र स्नानगृहको निर्माण गरिनेछ ।

सौराहा, कसरा, मेघौली घुम्न आउने आन्तरिक तथा बाह्य पर्यटकको बसाइ लम्ब्याउन यसले सहयोग पुर्‍याउने विश्वास आयोजकको छ । देवघाटधाम संरक्षण प्रतिष्ठानले पर्यटन बोर्डमा काठमाडौं, चितवनलगायत क्षेत्रका पर्यटन व्यवसायीहरूसँग छलफल गरेको थियो । प्रतिष्ठानका संयोजक केशव पाण्डेका अनुसार महायज्ञबाट ३ करोड रुपैयाँ संकलन गर्ने अपेक्षा गरिएको छ । ‘धार्मिक आस्थाको केन्द्र देवघाटमा अष्टधातुको मूर्ति बनाएपछि पर्यटकीय गन्तव्य बन्नेछ,’ उनले भने, ‘आन्तरिक तथा बाह्य पर्यटकको
भीड यो क्षेत्रमा लाग्ने अपेक्षा गरेका छौं ।’

यो अभियान ३ वर्ष अघि सुरु भएको हो । अहिलेसम्म ७० क्विन्टल धातु जम्मा भएको छ । करिब ८ करोड खर्च लाग्ने अनुमान गरिएकामा अहिलेसम्म ३२ लाख संकलन र सरकारबाट ५० लाख सहयोग प्राप्त भएको प्रतिष्ठानका महासचिव मदन मिश्रले बताए । ऐतिहासिक, पुरातात्त्विक, धार्मिक, आध्यात्मिक, पौराणिक दृष्टिले महत्त्वपूर्ण देवघाटधाम समुद्र सतहदेखि २ सय ५० मिटर उचाइमा छ ।

प्रकाशित : वैशाख २, २०७६ ०७:४४
प्रतिक्रिया
पठाउनुहोस्
ADVERTISEMENT
ADVERTISEMENT

मृगलाई भुस्याहा कुकुरबाट जोखिम

कान्तिपुर संवाददाता

हेटौडा — हेटौंडा उपमहानगरपालिका–१० स्थित वनविज्ञान अध्ययन संस्थानको जंगलमा रहेका चित्तल र मृगहरूको संरक्षण गर्न सरोकारवाला निकायहरूले भुस्याहा कुकुरहरूको व्यवस्थापन गर्न लागेका छन् । 

हेटौंडा बजारको मध्यभागको जंगलमा लामो समयदेखि वासस्थान बनाउँदै आएका चित्तल र मृगहरूलाई भुस्याहा कुकुरले मार्न थालेपछि डिभिजन वन कार्यालय, वनविज्ञान अध्ययन संस्थान, उपमहानगरपालिकालगायतका निकायहरूले भुस्याहा कुकुरहरूको व्यवस्थापन गर्न लागेको हो ।

भुस्याहा कुकुरको आक्रमणवाट यो वर्षको ९ महिनामा २ वटा रतुवा मृगसहित २२ वटा चित्तल मरिसकेका छन् । हेटौंडा उपमहानगरपालिका र भेटनरी कार्यालयबीच समन्वय गरेर भुस्याहा कुकुरहरूको व्यवस्थापन गर्नतत्काल योजना बनाएर कार्यान्वयनमा ल्याइने तयारी छ ।

राजमार्ग फराकिलो पार्न वनविज्ञान अध्ययन संस्थानमा लगाएको पर्खाल भत्काएकाले यो समस्या देखिएको हो । मृग र चितुवाहरू आहारा र पानीको खोजीमा बाहिर निस्कँदा भुस्याहा कुकुरहरूले आक्रमण गरेर मार्ने गरेकाले सम्बन्धित निकायले उक्त क्षेत्रका तारबार लगाउने सहमति भएको छ ।

सम्बद्ध कार्यालयहरूका प्रतिनिधि सम्बद्ध बैठकले वन विज्ञान अध्ययन संस्थानको जंगलभित्र नै मृग र चित्तलका लागि आहारा र पानीको व्यवस्था गर्ने निर्णय गरेको डिभिजन वन कार्यालय मकवानपुरका प्रमुख राधिका शर्माले बताइन् । आहाराको खोजीमा संस्थानभित्र रहेका मृग र चित्तल बाहिर निस्कँदा सवारी साधनले ठक्कर दिएर मार्ने पनि गरेको छ ।

उक्त क्षेत्रमा चालकहरूलाई सवारी साधन होसियारीपूर्वक चलाउन प्रहरीमार्फत चेतनामूलक कार्यक्रम सञ्चालन गर्ने सहमति भएको छ । विशेषगरी भुस्याहा कुकुरको आक्रमणबाट संस्थानको जंगलभित्र भएका मृग र चितल मासिने क्रममा छन् । हेटौंडा उपमहानगरपालिका—१० स्थित वनविज्ञान अध्ययन संस्थानको जंगलमा चितल र मृगहरू अत्यन्त थोरै मात्र छन् ।

हेटौंडा उपमहानगरपालिका—११ थानभर्‍याङस्थित आइतबार बिहान मृतावस्थामा एक चित्तल फेला परेको थियो । वनविज्ञान अध्ययन संस्थानको जंगलबाट बाहिर निस्केको उक्त चितललाई चारवटा कुकुरले लखेटेर मारेको डिभिजन वन कार्यालय मकवानपुरका सहायक वन अधिकृत अच्युत लामिछानेले बताए । ‘अध्ययन संस्थानको जंगलबाट यताउता चर्न निस्केको अवस्थामा स्थानीय भुस्याहा कुकुरहरूले लखेटेर चितल मारेको हो,’ उनले ।

कुकुरले लखेटेर साउन महिनादेखि चैतको २९ गतेसम्म २० चितल र २ वटा रतुवा मृग मारिसकेको छ । मारिएका चितलमध्ये ७ वटा भाले र १३ वटा पोथी छन् । डिभिजन वन कार्यालयका अनुसार साउनमा ३ वटा, भदौमा ७, मंसिरमा २ र पुसमा २ वटा, माघमा ४, फागुनमा ३ र चैतमा १ गरी २२ वटा चितल र मृग कुकुरले लखेटेर मारिसकेको छ । ‘५ वटा घाइते अवस्थामा फेला परेका थिए भने १७ वटा मृतावस्थामा फेला परेका थिए,’ सहायक वन अधिकृत लामिछानेले भने, घाइतेहरू पनि उपचार गर्ने क्रममा नै मरे ।’

१ सय ५८ बिघामा फैलिएको वन विज्ञान अध्ययन संस्थानमा विगतमा सयभन्दा बढी चित्तल र २० भन्दा बढी मृगको बासस्थान रहेको थियो । ‘अहिले १२,१४ वटाको एउटा झुन्डबाहेक चित्तल छैनन्, ४,५ वटा मात्र मृग छन्,’ संस्थानका क्याम्पस प्रमुख कृष्णप्रसाद दाहालले भने, ‘संस्थानका कम्पाउन्डहरू भत्काइएकाले चित्तलहरू मासिंदै गएका हुन् ।’

प्रकाशित : वैशाख २, २०७६ ०७:४३
पूरा पढ्नुहोस्
प्रतिक्रिया
पठाउनुहोस्