वाग्मतीमा मोटरबोट

प्रतिनिधिसभाका अर्थ तथा विकास समितिका सभापति कृष्णप्रसाद दाहालको संसद् कोषको रकमले मोटरबोटको परीक्षण गरिएको हो । सभापति दाहालले मकवनापुर, सर्लाही र रौतहटको सिमानाको रूपमा नुनथरबाट आधा किलोमिटर मकवानपुरको वाग्मती गाउँपालिकातर्फसम्म मोटरबोट चढेर परीक्षण उद्घाटन गरेका थिए ।

सभापति दाहालले वाग्मती यस गाउँपालिकाको सभ्यताको नदी भएको भन्दै माछापालन र जलमार्गले पर्यटन प्रवर्द्धन तथा जल यातायातमा टेवा पुग्ने बताए । ‘वाग्मती गाउँपालिकामा रहेको संस्कृति तथा सामाजिक विकास, गापामा उत्पादित खाद्य र तरकारीलगायतको ढुवानीमा जल यातायातले महत्त्वपूर्ण भूमिका खेल्ने छ,’ उनले भने ।

नुनथरदेखि ७ किलोमिटर मकवानपुरको वाग्मतीं गापाको राईगाउँसम्म सञ्चालन गर्न हाललाई एउटा मात्र मोटरबोट छ । संसद् कोषको २० लाखको बजेटले नदीमा रहेका अग्ला ढुंगाका अवरोध हटाउने तथा राईगाउँमा स्टेसन निर्माणमा खर्च गरिने जनाएको छ । मोटरबोट खरिदका लागि अहिले बजेट नभएकाले नारायणी नदीमा चल्ने मोटरबोट मासिक दुई लाख भाडामा ल्याइएको र परीक्षणकालमा पर्यटकका लागि मात्रै सञ्चालन गरिने जनाइएको छ ।

वाग्मती गाउँपालिकाको राईगाउँका बासिन्दाहरू वाग्मती खोलामा जोखिम मोलेर मोटरको टायर चढेर ओहोरदोहोर गर्थे । ‘नियमित रूपमा मोटरबोट चलेमा जोखिम मोलेर स्थानीयवासीले अब वाग्मती तर्नु पर्दैन,’ गाउँपालिका अध्यक्ष सर्केश घलानले भने ।