म्यागङमा प्याराग्लाइडिङ

कृष्ण थापा

(नुवाकोट) — पर्यटन प्रवर्द्धनका गर्न म्यागङमा प्याराग्लाइडिङ परीक्षण गरिएको छ । म्यागङ गाउँपालिका र वडा नम्बर ४ को आयोजनामा किम्ताङस्थित संगम डाँडा, संगम र म्यागङ— ३ को लोकिलमा प्याराग्लाइडिङ परीक्षण गरिएको थियो ।

पर्यटन प्रवर्द्धनका गर्न नुवाकोटको म्यागङ गाउँपालिका र वडा नम्बर ४ को किम्ताङस्थित संगम डाँडा, संगम र म्यागङ गापा–३ को लोकिलमा प्याराग्लाइडिङ । तस्बिर : कृष्ण/कान्तिपुर

Citizen

दुई दिन लगाएर ओपन स्काई प्याराग्लाइडिङ प्रालि लेकसाइड पोखरा कास्कीको प्राविधिक सहयोगमा प्याराग्लाइडिङ परीक्षण गरिएको हो । ‘यहाँ स्वदेशी तथा विदेशी पर्यटकले प्याराग्लाइडिङबाट भरपुर मनोरञ्जन लिन सक्छन्,’ म्यागाङ गाउँपालिका ४ का वडाध्यक्ष कमल तामाङले भने, ‘त्यही भएर प्याराग्लाइडिङ उडान गर्न कुन कुन ठाउँ उपयुक्त छन् हेरेका हौँ ।’ किम्ताङको संगम त्योभन्दा माथिल्लो डाँडा कुङगरगङमा प्याराग्लाइडिङ गर्न सकिने प्राविधिकले बताए ।

‘किम्ताङको संगम त्योभन्दा माथिल्लो डाँडाबाट प्याराग्लाइडिङ गर्न उपयुक्त छ,’ ओपन स्काईका प्राविधिक नूर राना मगरले भने, ‘यहाँ रूख र बुट्यान हटाउनुपर्छ । उता लोकिलमा गर्न अलिकति जोखिम छ ।’ उक्त डाँडा २२ सय मिटर उचाइमा छ । प्याराग्लाइडिङका लागि तल्लो भागबाट डाँडातर्फ हावाको बहाव चाहिने प्राविधिकले बताए ।

लोकिलमा छोटो एक फ्लाइट गरिएको थियो भने संगमबाट तल खेलमैदानसम्म दुई फ्लाइट गरिएको थियो । ‘म्यागङ गाउँपालिका पर्यटकका लागि धेरै सम्भावना बोकेको ठाउँ हो,’ म्यागङ गाउँपालिकाका प्रमुख आशा तामाङले भने, ‘प्याराग्लाइडिङलगायत स्वदेशी तथा विदेशी पर्यटक आकर्षित गर्ने कार्यक्रम ल्याइरहेका छौँ ।’म्यागङ गाउँपालिकाले त्रिशूली हुँदै एकरात बास बस्ने गरी पर्यटक आकर्षित गर्ने योजना बनाइरहेको छ ।

प्रदेश—३ र म्यागङ गाउँपालिकाको साझेदारीमा पर्यटन प्रवर्द्धन गर्ने कार्यक्रम ल्याएको गाउँपालिका प्रमुख तामाङले बताए । टुण्डी मैदान, म्यागङ, किम्ताङ, चामछप्पा मैदान, बुङताङको माइथान लगायत स्थानलाई पर्यटकीय स्थल बनाउन लागिएको छ । पर्यटकका लागि पूर्वाधारको रूपमा रेस्टुराँ र होटलको निर्माण हुने उनले बताए ।

प्रकाशित : वैशाख ४, २०७६ ०९:०४
ADVERTISEMENT
प्रतिक्रिया
पठाउनुहोस्
ADVERTISEMENT

झन्डाचुलीमा फहरायो राष्ट्रिय झन्डा

कान्तिपुर संवाददाता

धादिङ — महाभारत पर्वत शृंखलाअन्तर्गत धादिङ र मकवानपुरको सीमा क्षेत्रस्थित झन्डाचुलीमा नेपालको राष्ट्रिय झन्डा राखिएको छ । नयाँ वर्षको पहिलो दिन राष्ट्रिय योजना आयोगका उपाध्यक्ष पुष्पराज कँडेलद्वारा थाक्रे– ३ मा रहेको २१ सय मिटर अग्लो चुचुरोमा झन्डोत्तलन गर्दै १५ मिटर उचाइको नेपालको राष्ट्रिय झन्डा फहराइएको हो ।

पर्यटनको प्रचूर सम्भावना बोकेको भूमिचुली क्षेत्रको सबैभन्दा अग्लो झन्डाचुलीमा २०३२ सालतिर नेपालको राष्ट्रिय झन्डा राखिएको थियो । उक्त भूमिचुलीमा झन्डा गाडिएपछि झन्डाचुली नामकरण गरिएको थियो । इतिहासलाई स्मरण गर्दै पर्यटन क्षेत्रको विकास गर्ने उद्देश्यले भूमिचुली क्षेत्र पर्यटन प्रवर्द्धन नागरिक अभियानको आयोजनामा झन्डा राखिएको हो ।

मकवानपुरको थाहा नगरपालिका, धादिङको थाक्रे र गल्छी गाउँपालिकाको संगमस्थल झन्डाचुलीलाई एकीकृत पर्यटन पूर्वाधार निर्माण गर्न आवश्यक रहेको कँडेलले बताए । ऐतिहासिक, प्राकृतिक र धार्मिक महत्त्व बोकेको यस क्षेत्रमा एकीकृत पर्यटन पूर्वाधार निर्माण गर्दा छिटो समृद्धि हासिल हुने भएकाले आफूले यस क्षेत्रलाई प्राथमिकतामा राखेको बताए । उपाध्यक्ष कँडेलले भने, ‘सरकारले अगाडि बढाएको समृद्ध नेपाल सुखी नेपाली अभियान बनाउन मूल संवाहकको रूपमा पर्यटनलाई महत्त्वपूर्ण अंगका रूपमा लिएका छौं ।’ आदिवासी जनजाति तामाङ र चेपाङको बसोबास रहेको यस क्षेत्रमा नयाॅ पर्यटकीय पदमार्ग खोल्न यही वर्ष अध्ययन हुने बताए ।

सांसद भूमि त्रिपाठीले यस क्षेत्र हुँदै अध्ययन गर्न लागिएको चन्द्रागिरि चेपाङ हिल पदमार्गलाई गाँजा ट्रेकिङ ट्रायल नाम राख्न प्रस्ताव गरेका छन् । यस क्षेत्रमा अत्याधिक उत्पादन हुने गाँजाको महत्त्व बताउँदै त्रिपाठीले पदमार्गको नामै गाॅँजा हिल राख्ने सुझाए ।

प्रकाशित : वैशाख ४, २०७६ ०८:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT