डा. प्रह्लाद योञ्जन रेडपाण्डा पदमार्ग

कान्तिपुर संवाददाता

रसुवा — प्रदेश सरकारले लाङटाङ पदमार्गलाई डा. प्रह्लाद योञ्जन रेडपाण्डा पदमार्ग घोषणा गरेको छ । मुलुकको तेस्रो पर्यटकीय पदमार्गको रूपमा रहेको लाङटाङ पदमार्गलाई मंगलबार प्रदेश—३ सरकारले डा. प्रह्लाद योञ्जन रेडपाण्डा पदमार्ग घोषणा गरेको हो ।

करिब २६ किलोमिटर यो पदमार्ग रसुवाको स्याफ्रुदेखि क्यान्जिनसम्म छ । २४ औं वन्यजन्तु सप्ताहको अवसरमा आयोजित १० औं रेडपाण्डा ट्रफी भलिबल प्रतियोगिता र सातौं लाङटाङ पर्यटन तथा संरक्षण उत्सवको मंगलबार धुन्चेमा उद्घाटन गर्दे प्रदेश—३ सरकारका उद्योग, पर्यटन, वन तथा वातावरण मन्त्री अरुण नेपालले नयाँ पदमार्गको घोषणा गरेका हुन् ।

Citizen

प्रदेश सरकारले रसुवाको स्याफ्रुबेंसीदेखि क्यान्जिन उपत्यकासम्मको पदमार्गलाई डा. प्रह्लाद योञ्जन रेडपाण्डा पदमार्ग नामकरण गर्न आर्थिक वर्ष २०७५/०७६ को वार्षिक नीति तथा कार्यक्रममा राखेको थियो । हिमाली क्षेत्रको पर्यटन विकासमा डा. योञ्जनले पुर्‍याएको योगदानको कदर स्वरूप पदमार्गको नामकरण गरिएको प्रदेश सरकारले बताएको छ । उक्त पदमार्गको स्तरोन्नति गर्न प्रदेश सरकारले पर्यटन विकास आयोजनामार्फत ५० लाख रुपैयाँ विनियोजन गरेको छ । स्याफ्रुबाट करिब दुई दिनको पैदल यात्रामा क्यान्जिन पुगिन्छ ।

पहिलो दिन स्याफ्रुबाट दोमेन, पहिरो, बम्बु, रिमिचे हुँदै लामा होटलमा बास बस्नका लागि पर्यटक पुग्छन् । भोलिपल्ट बिहानै खाजा खाएर हिँड्दा रिभर साइड, उडल्यान्ड, घोडा तबेला थाङस्याब, गुम्बाडाँडा हुँदै लाङटाङ पुगिन्छ । केही पर्यटक लाङटाङमा नै बस्छन् भने केही पर्यटक मुण्डु, सिन्दुम हुँदै क्याङजिन पुग्छन् ।

काठमाडौंबाट छोटो र सजिलो पदमार्गमा लाङटाङ पर्छ । छोटो र सजिलो पदमार्ग भएकाले पनि लाङटाङमा स्वदेशी तथा विदेशी पर्यटकको घुइँचो लाग्ने गरेको छ । लाङटाङ पदमार्गमा जाने पर्यटकले थोरै दिनमा एकैपटक धेरै कुरा हेर्न र घुम्न सक्छन् । त्यसैले लाङटाङ पदमार्ग पर्यटकको रोजाइमा परेको होटल व्यवसायी बताउँछन् 

प्रकाशित : वैशाख ४, २०७६ ०९:०८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

म्यागङमा प्याराग्लाइडिङ

कृष्ण थापा

(नुवाकोट) — पर्यटन प्रवर्द्धनका गर्न म्यागङमा प्याराग्लाइडिङ परीक्षण गरिएको छ । म्यागङ गाउँपालिका र वडा नम्बर ४ को आयोजनामा किम्ताङस्थित संगम डाँडा, संगम र म्यागङ— ३ को लोकिलमा प्याराग्लाइडिङ परीक्षण गरिएको थियो ।

पर्यटन प्रवर्द्धनका गर्न नुवाकोटको म्यागङ गाउँपालिका र वडा नम्बर ४ को किम्ताङस्थित संगम डाँडा, संगम र म्यागङ गापा–३ को लोकिलमा प्याराग्लाइडिङ । तस्बिर : कृष्ण/कान्तिपुर

दुई दिन लगाएर ओपन स्काई प्याराग्लाइडिङ प्रालि लेकसाइड पोखरा कास्कीको प्राविधिक सहयोगमा प्याराग्लाइडिङ परीक्षण गरिएको हो । ‘यहाँ स्वदेशी तथा विदेशी पर्यटकले प्याराग्लाइडिङबाट भरपुर मनोरञ्जन लिन सक्छन्,’ म्यागाङ गाउँपालिका ४ का वडाध्यक्ष कमल तामाङले भने, ‘त्यही भएर प्याराग्लाइडिङ उडान गर्न कुन कुन ठाउँ उपयुक्त छन् हेरेका हौँ ।’ किम्ताङको संगम त्योभन्दा माथिल्लो डाँडा कुङगरगङमा प्याराग्लाइडिङ गर्न सकिने प्राविधिकले बताए ।

‘किम्ताङको संगम त्योभन्दा माथिल्लो डाँडाबाट प्याराग्लाइडिङ गर्न उपयुक्त छ,’ ओपन स्काईका प्राविधिक नूर राना मगरले भने, ‘यहाँ रूख र बुट्यान हटाउनुपर्छ । उता लोकिलमा गर्न अलिकति जोखिम छ ।’ उक्त डाँडा २२ सय मिटर उचाइमा छ । प्याराग्लाइडिङका लागि तल्लो भागबाट डाँडातर्फ हावाको बहाव चाहिने प्राविधिकले बताए ।

लोकिलमा छोटो एक फ्लाइट गरिएको थियो भने संगमबाट तल खेलमैदानसम्म दुई फ्लाइट गरिएको थियो । ‘म्यागङ गाउँपालिका पर्यटकका लागि धेरै सम्भावना बोकेको ठाउँ हो,’ म्यागङ गाउँपालिकाका प्रमुख आशा तामाङले भने, ‘प्याराग्लाइडिङलगायत स्वदेशी तथा विदेशी पर्यटक आकर्षित गर्ने कार्यक्रम ल्याइरहेका छौँ ।’म्यागङ गाउँपालिकाले त्रिशूली हुँदै एकरात बास बस्ने गरी पर्यटक आकर्षित गर्ने योजना बनाइरहेको छ ।

प्रदेश—३ र म्यागङ गाउँपालिकाको साझेदारीमा पर्यटन प्रवर्द्धन गर्ने कार्यक्रम ल्याएको गाउँपालिका प्रमुख तामाङले बताए । टुण्डी मैदान, म्यागङ, किम्ताङ, चामछप्पा मैदान, बुङताङको माइथान लगायत स्थानलाई पर्यटकीय स्थल बनाउन लागिएको छ । पर्यटकका लागि पूर्वाधारको रूपमा रेस्टुराँ र होटलको निर्माण हुने उनले बताए ।

प्रकाशित : वैशाख ४, २०७६ ०९:०४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT