पाँच नेपालीसहित १४ जनाले चढे पाल्दोर हिमाल

हरिहरसिंह राठौर

धादिङ — पाँच नेपालीसहित १४ जनाले जिल्लाको सबैभन्दा अग्लो पाल्दोर हिमाल सफल आरोहण गरेका छन् । जिल्लाको पर्यटन विकासका लागि भन्दै ७ जना कोरियन, २ जना मंगोलियन र ५ जना नेपालीले गणेश हिमाल छेउमा रहेको  पाल्दोर (पाविल) हिमाल आरोहण गरेका हुन् । उक्त हिमालको उचाई ५ हजार ९ सय ३ मिटर छ ।

'धादिङ जिल्लाको पर्यटन विकासका लागि गणेश हिमाल छेउमा रहेको पाल्दोर हिमालको सफल आरोहण गरिएको हो ' नेपाल पर्वतारोहण संघका महासचिव कुलबहादुर गुरुङले भने, 'आरोहण टोलीले पाल्दोर हिमाल चुचुरोमा पर्यटन वर्ष २०२० को लोगो अंकित झन्डा फहराएका छन् ।'

आरोहण टोली चैत २४ मा काठमाडौंबाट हिँडेर धादिङको गल्छी, नुवाकोट, रसुवा स्याफ्रबेंसी, गत्लाङ, सोम्दाङ, रुबीभ्याली हुँदै ५ हजार ९ सय ३ मिटरको उचाई रहेको पाल्दोर पिक पुगी २०७६ वैशाख २ मा काठमाडौं फर्किएको हो । टोलीले संयूक्त रूपमा आरोहण गरेको यो दोस्रो पटक हो । यसअघि सन् २०१० मा पाल्दोरमै संयुक्त आरोहण गरिएको थियो ।

संयुक्त आरोहण गर्दा एक अर्काका सीप तथा कला सिक्ने अवसर पनि पाउने गुरुङको भनाइ छ । पाल्दोर हिमालमा हालसम्म ३०० भन्दा बढी आरोहीले आरोहण गरिसकेको पर्वतारोहण महासंघको तथ्याङ्कमा उल्लेख छ ।

प्रकाशित : वैशाख ५, २०७६ १९:०८
ADVERTISEMENT
ADVERTISEMENT
प्रतिक्रिया
पठाउनुहोस्

सरकारद्वारा सचिवहरुको सरुवा, बढुवा 

विमल खतिवडा

काठमाडौँ — सरकारले केही सचिव, सहसचिवहरुको बढुवा र सरुवा गरेको छ । सञ्चार तथा सूचना प्रविधि मन्त्रालयका अनुसार सहसचिव हरिप्रसाद बस्याललाई बढुवा गरी प्रदेश नम्बर ४ को मुख्यमन्त्री तथा मन्त्रिपरिषद्‌को कार्यालयमा प्रमुख सचिवकको रुपमा पदस्थापन गरिएको छ ।

त्यस्तै केवल भण्डारीलाई कर्णाली प्रदेशको मुख्यमन्त्री तथा मन्त्रिपरिषद्को कार्यालयको प्रमुख सचिवमा पदस्थापन गरिएको छ ।

सञ्चार तथा सूचना प्रविधिमन्त्री गोकुल बाँस्कोटाका अनुसार स्वास्थ्य मन्त्रालयका सचिव चन्द्र घिमिरेलाई महिला बालबालिका तथा जेष्ठ नागरिक मन्त्रालयमा, कर्णाली प्रदेशका मुख्यमन्त्री तथा मन्त्रिपरिषद् कार्यालयका प्रमुख सचिव रामप्रसाद थपलियालाई स्वास्थ्य मन्त्रालयमा पदस्थापन गरिएको छ ।
प्रदेश १ का मुख्यमन्त्री तथा मन्त्रिपरिषद् कार्यालयका प्रमुख सचिव केदार न्यौपानेलाई काठमाडौं महानगरपालिकाको प्रमुख प्रशासकीय अधिकृतको रुपमा र उनको ठाउँमा संघीय मामिला तथा सामान्य प्रशासन मन्त्रालयका सहसचिव सुरेश अधिकारीलाई कायममुकाम बनाइ प्रमुख सचिवमा पदस्थापन गरिएको छ । काठमाडौं महानगरपालिकाका प्रमुख प्रकाशसकीय अधिकृत यादव कोइरालालाई संघीय मामिला तथा सामान्य प्रशासन मन्त्रालयको सचिवको रुपमा पदस्थापन गरिएको छ ।
त्यस्तै अतिरिक्त समूहमा सचिव रहेका डा. हरि पौडेललाई प्रधानमन्त्री तथा मन्त्रिपरिषद्को कार्यालय सचिवमा र राष्ट्रिय महिला आयोगका सचिव अनिलकुमार ठाकुरलाई प्रधानमन्त्री तथा मन्त्रिपरिषद्को कार्यालयमा सचिवको रुपमा पदस्थापन गरिएको छ ।

प्रकाशित : वैशाख ५, २०७६ १८:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT