पाँच नेपालीसहित १४ जनाले चढे पाल्दोर हिमाल

'धादिङ जिल्लाको पर्यटन विकासका लागि गणेश हिमाल छेउमा रहेको पाल्दोर हिमालको सफल आरोहण गरिएको हो ' नेपाल पर्वतारोहण संघका महासचिव कुलबहादुर गुरुङले भने, 'आरोहण टोलीले पाल्दोर हिमाल चुचुरोमा पर्यटन वर्ष २०२० को लोगो अंकित झन्डा फहराएका छन् ।'

आरोहण टोली चैत २४ मा काठमाडौंबाट हिँडेर धादिङको गल्छी, नुवाकोट, रसुवा स्याफ्रबेंसी, गत्लाङ, सोम्दाङ, रुबीभ्याली हुँदै ५ हजार ९ सय ३ मिटरको उचाई रहेको पाल्दोर पिक पुगी २०७६ वैशाख २ मा काठमाडौं फर्किएको हो । टोलीले संयूक्त रूपमा आरोहण गरेको यो दोस्रो पटक हो । यसअघि सन् २०१० मा पाल्दोरमै संयुक्त आरोहण गरिएको थियो ।

संयुक्त आरोहण गर्दा एक अर्काका सीप तथा कला सिक्ने अवसर पनि पाउने गुरुङको भनाइ छ । पाल्दोर हिमालमा हालसम्म ३०० भन्दा बढी आरोहीले आरोहण गरिसकेको पर्वतारोहण महासंघको तथ्याङ्कमा उल्लेख छ ।