रत्ननगर उद्योग वाणिज्य संघ अध्यक्ष पक्राउ

रमेशकुमार पौडेल

चितवन — प्रहरीले बुधबार साँझ रत्ननगर उद्योग वाणिज्य संघ अध्यक्ष राजाराम रेग्मीलाई गिरफ्तार गरेको छ । जेठ ३ गते भरतपुर गोन्द्राङमा एकजना प्रहरी जल्ने गरेर सडक बोर्डको सडक शुल्क संकलन केन्द्रमा भएको आगजनी घटनामा संलग्न भएको आशंकामा रेग्मी पक्राउ परेका हुन् । चितवन जिल्ला प्रहरी कार्यालयका प्रवक्ता प्रहरी नायव उपरीक्षक (डिएसपी) दुर्गाराज रेग्मीले राजाराम साँझ ६ बजे पक्राउ परेको बताए ।

उक्त घटनामा प्रहरी सहायक निरीक्षक (असई) कल्पना खड्का पौडेल आगोले पोलेर गम्भीर घाइते भएकी थिइन् । उनको भरतपुरको नयाँ मेडिकल कलेजको शिक्षण अस्पतालमा उपचार भइरहेको छ । रत्ननगर उद्योग वाणिज्य संघले गोन्द्राङमा कर संकलन गर्दा पुर्वी चितवनवासीलाई मर्का पर्ने भन्दै जेठ १ गते मात्रै ज्ञापनपत्र बुझाएको थियो । कर संकलन केन्द्र जिल्लाको सुरुआत विन्दुमा हुनु पर्ने संघको माग छ । जेठ ३ गते आगजनी हुँदा अध्यक्ष रेग्मी कर संकलन केन्द्रमा थिए ।

प्रहरीले यसअघि आगजनी घटनामा संलग्न भएको आरोपमा तीन जनालाई समाएर अभद्र व्यवहारमा मुद्दा दायर गरिसकेको छ । मुद्दा दायर भएपछि पक्राउ परेका तीनजना बुधबार ५४ हजार रुपैयाँ धरौटी बुझाएर रिहा भएका थिए । रेग्मीलाई पनि बिहीबार चितवन जिल्ला प्रशासनमा उपश्थित गराइने र बाँकी कारवाही प्रक्रिया अगाडि बढ्ने डिएपी दुर्गाराज रेग्मीले जानकारी दिए ।

प्रकाशित : जेष्ठ ८, २०७६ २०:१७
ADVERTISEMENT
प्रतिक्रिया
पठाउनुहोस्
ADVERTISEMENT

७ कस्मेटिक व्यापारीलाई जरिवाना

राजु चौधरी

काठमाडौँ — सरकारले काठमाडौं मलमा सञ्चालित ७ कस्मेटिक व्यापारीलाई जरिवाना गरेको छ । व्यवसायीले बिक्री गरेको कस्मेटिक सामग्रीमा मनोमानी मूल्य लिएको पाएपछि आपूर्ति विभागले अनुगमनस्थलमै जरिवाना गरेको हो । 'अनुगमनका क्रममा व्यापारीहसँग बिलबिजक थिएन ।

त्यो भनेको जति मूल्यमा पनि बिक्री गर्न सक्छन्,' विभागका अनुगमन शाखा अधिकृत दीपक पोखरेलले भने, 'बिलबिजक उलब्ध गराउन नसकेकाले जरिवाना गरेका छौं ।' विभागका अनुसार ६ व्यापारीलाई जनही १० हजार र एकलाई ५ हजार रुपैयाँ जरिवाना गरिएको छ ।

उपभोक्ता संरक्षण ऐन २०७५ को दफा १५ अनुसार बिक्रेताले बिक्री प्रयोजनका लागि खरिद गरेको वस्तु तथा सेवाको खरिद र बिक्री गरेको मूल्यको बिल आफूसँग सुरक्ष्ाित रूपमा राख्नुपर्छ । अनुगमन निरीक्षकले माग गरेको अवस्थामा बिल उपलब्ध गराउनुपर्छ । बिलबिजक नै देखाउन नसकेपछि कारबाहीको दायरामा ल्याएको विभागका प्रवक्ता पवन तिमिल्सिनाले बताए । विभागले मूल्य र बिलबिजकको अनुगमन गरे पनि गुणस्तरको भने अनुगमन गरेको छैन ।

यसअघि गुणस्तर तथा नापतौल विभागले गरेको परीक्ष्ाणमा पनि अधिकांश कस्मेटिक सामग्रीहरू मापदण्डविपरीत फेला गरेको थियो । विभागले तयार पारेको प्रतिवेदनमा ६६ ब्रान्डका सौन्दर्य सामग्रीको परीक्षण गर्दा तयार रसायनको मात्रा अधिक रहेको उल्लेख छ । विभागले सबै ब्रान्डका स्वदेशी तथा आयातित सौन्दर्य सामग्री परीक्षण गरेको थियो । त्यसक्रममा सिसा, मर्करी, क्रोमिएम, टिटानियमको मात्रा मापदण्डभन्दा बढी रहेको पाइएको थियो ।

सौन्दर्य सामग्रीमा हानिकारक रसायनको मात्रा अत्यधिक फेला परेपछि गुणस्तर तथा नापतौल विभागले पहिलोपटक सौन्दर्य सामग्रीको मापदण्ड बनाएको छ । विभागले तयार पारेको मापदण्ड गुणस्तर परिषद्मा छिट्टै पेस गरिने गुणस्तर विभागका महानिर्देशक विश्वबाबु पुडासैनीले बताए । 'विभागबाट तयारी अवस्थामा छ,' उनले भने, 'अब बस्ने परिषदको बैठकमा पेस हुन्छ । परिषद्बाट स्वीकृत भएपछि कार्यान्वयनमा जान्छौं ।'

प्रकाशित : जेष्ठ ८, २०७६ २०:१०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT