तोकिएको मितिमा आएन

नगेन्द्र अधिकारी

काभ्रे — वर्षे अधिवेशन आहृवान गरिसकेका स्थानीय तहले समयसीमाभित्र बजेट नभई नीति तथा कार्यक्रम पेस गरेर औपचारिकता पुर्‍याएका छन् । काभ्रेका १३ मध्ये केहीले मात्रै त्यसको परिपालना गरेका छन् । केहीले त्यसोसमेत गरेनन् ।

तीनवटै तहका सरकारले आफ्नो बजेट आफैं बनाउने संवैधानिक व्यवस्था छ । स्थानीय सरकार सञ्चालन ऐनले स्थानीय तहले आगामी आर्थिक वर्षको आय र व्ययको अनुमान असार १० गतेसम्म पेस गरिसक्ने उल्लेख गरेको छ ।

धुलिखेल, मण्डनदेउपुर नगरपालिका, बेथानचोक र महाभारत गाउँपालिकाले मात्रै आय र व्ययको अनुमान (बजेट) पेस गरेका हुन् । रोशी गाउँपालिकाले नीति तथा कार्यक्रम प्रस्तुत गर्दै ६५ करोड ८ लाखको बजेट अंक निर्धारण गरे पनि पूर्ण बजेट नै पेस गरेन ।

नमोबुद्ध नगरपालिका पनि आर्थिक विधेयक पेस गरेर बजेट अंक तोके पनि विवरण पेस गरेन । भुम्लु गाउँपालिकाले नीति तथा कार्यक्रम प्रस्तुत गरे पनि बजेट पेस गरेनन् । पनौती, पाँचखाल र बनेपा नगरपालिकाले बजेट अधिवेशन सुरु गरे पनि नीति तथा कार्यक्रम र बजेट प्रस्तुत गरेनन् । पनौतीले २३ गते गर्ने तयारी गरेको नगरप्रमुख भीम न्यौपानेले बताए ।

पाँचखालमा प्रमुख अतिथिका कारण नीति तथा कार्यक्रम र बजेट प्रस्तुत गर्ने समय केही पर सरेको छ । पूर्वप्रधानमन्त्री एवं नेकपा अध्यक्ष पुष्पकमल दाहालले असार १८ वा १९ गते आउन सक्ने बताएकाले सोहीअनुसारको तयारी गरिएको प्रमुख प्रशासकीय अधिकृत लोकबहादुर भण्डारीले जानकारी दिए ।

बनेपा नगरपालिकाले अधिवेशन सुरु गरे पनि २० गते मात्रै नीति तथा कार्यक्रम प्रस्तुत गर्ने गरी तयारी थालेको छ । खानीखोला र चौरीदेउराली गाउँपालिकाले असार १५/१६ गते मात्रै प्रस्तुत गर्ने तयारी थालेका छन् । खानीखोला गाउँपालिका अध्यक्ष कृष्णबहादुर खुलालले सबै काम सकिए पनि प्रस्तुत गर्न केही दिन लाग्ने बताए । तेमाल गाउँपालिकामा भने दलीय द्वन्द्वका कारण प्रस्तुत हुन सकेन । बहुमतमा रहेका नेकपाका तर्फबाट निर्वाचित जनप्रतिनिधिले बहिष्कार गरेका कारण नीति तथा कार्यक्रम र बजेट प्रस्तुत हुन नसकेको हो ।

बाबुआमा स्याहार गर्नेलाई सम्मान
जिल्लाका विभिन्न स्थानीय तहले नौला कार्यक्रमसहितका नीति तथा कार्यक्रम प्रस्तुत गरेका छन् । रोशी गाउँपालिकाको नीति तथा कार्यक्रममा बाबुआमाको स्याहारसुसार र संरक्षण गर्नेमध्ये वडाबाट २ जनाका दरले सम्मान गरिने उल्लेख छ । सुत्केरीलाई पोषिलो खानाअन्तर्गत कुरिलोको प्याकेट वितरण गरिने छ ।

प्रकाशित : असार ११, २०७६ ०७:२२
ADVERTISEMENT
प्रतिक्रिया
पठाउनुहोस्
ADVERTISEMENT

अभ्यास गर्ने मैदान पनि भएन

नगेन्द्र अधिकारी

काभ्रे — जिल्लाको विकट मानिने खानीखोला गाउँपालिकाको भलिबल टिमले दुई वर्ष लगातार जिल्लास्तरीय प्रतियोगिता जित्यो । खानीखोला र बेथानचोक गाउँपालिकाले आयोजना गरेका जिल्लास्तरीय प्रतियोगिताको उपाधि पनि दुवैपटक खानीखोलाको टिमले नै उचाल्यो । 

हालै सम्पन्न बेथानचोक कप भलिबल प्रतियोगितामा त उपविजेता पनि खानीखोलाको ‘बी’ टिम नमुना प्रगति युवा क्लब नै भयो । तर जिल्लामा नै पहिचान बनाएको टोली खेल मैदानको अभावमा विद्यालयको चौरमा अभ्यास र प्रतियोगिता गर्न बाध्य छ ।

‘खहरे खोलालाई माटोले पुरेर खेल मैदान बनाउँदै छौं, त्यो पनि पर्याप्त बजेट नहुँदा पूरा हुन सकेको छैन,’ टिमका क्याप्टेन सुमन थोकर भन्छन्, ‘स्कुल सुरु हुनुअघि र छुट्टी भएपछि स्थानीय विद्यालयको चौरमा खेल्छौं, व्यक्तिका खेत खाली भएपछि त्यहाँ पनि अभ्यास गर्दै आएका छौं ।’

थोकरका अनुसार, जिल्ला खेलकुद विकास समितिले खेल मैदान निर्माणका लागि ४ लाख बजेट छुट्याए पनि मैदानले पूर्णता पाएको छैन । खानीखोला गाउँपालिकाले २ लाख बजेट विनियोजन गरे पनि खर्च हुन सकेन । ‘४०/५० टिप माटो ल्याएर हालेका छौं, खहरे भएकाले बेलाबेलामा पुर्छ,’ उनले भने, ‘गाउँपालिकालाई एकै पटकमा पूरा हुनेगरी पर्याप्त बजेट दिन अनुरोध गरेका छौं तर त्यसो हुन सकेको छैन ।’

खानीखोला भलिबल खेलका लागि चर्चित छ । यही टिमले काभ्रे र छिमेकी जिल्ला मकवानपुर, ललितपुरलगायत जिल्लामा हुने प्रतियोगितामा सहभागिता जनाएर उपाधि जित्दै आएको छ । जिल्लाको प्रतिनिधित्व गर्दै क्षेत्रीय र राष्ट्रियस्तरका प्रतियोगितामा पनि खानीखोला गाउँपालिकाको टिमका सदस्य नै सहभागी हुने गरेका छन् ।

‘पूर्वाधार र प्रशिक्षण हुने हो भने अझै राम्रो गर्न सकिन्थ्यो,’ स्थानीय खेलाडीलाई प्रशिक्षणसमेत दिँदै आएका थोकर भन्छन्, ‘८ वर्षअघि सामान्य प्रशिक्षण लिएर म खेल्न थालेको थिएँ, अभ्यासकै आधारमा यो उपलब्धि हो ।’ उनले खेलाडीलाई नै प्रशिक्षण दिन नसकिएको भन्दै यसले नतिजामा असर परिरहेको बताए ।

प्रकाशित : असार ८, २०७६ ०७:३४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT