बनेन विद्यालय भवन

कान्तिपुर संवाददाता

सिन्धुलीमाढी — सिन्धुलीको तिनपाटन गाउँपालिका २ भीमस्थानमा रहेको भवानी माध्यमिक विद्यालयको भवन ७ वर्षसम्म पनि निर्माण हुन सकेको छैन । 

निर्माण सम्झौता सकिएको ५ वर्ष बितिसक्दासमेत निर्माण सम्पन्न हुन नसकेको हो । निर्माण कम्पनीले काम नगर्दा विद्यालय भवन निर्माण कार्य अलपत्र बनेको छ । विद्यालय भवन निर्माणको ठेक्का लिएको सिद्धबाबा कन्स्ट्रक्सनले हेलचेक्र्याइँ गरेकाले ७ वर्षसम्म पनि भवन निर्माण पूरा हुन नसकेको प्रधानाध्यापक पवनराज दाहालले बताए ।

२०६९ मा निर्माणको जिम्मा लिएको कन्स्ट्रक्सनले २०७१ जेठ २६ गते निर्माण पूरा गर्ने सम्झौता गरेको थियो । २०७१ जेठ मसान्तसम्म पनि निर्माण सम्पन्न गर्न नसकेपछि सिद्धबाबा कन्ट्रक्सनले २०७२ जेठ २६ गते निर्माण सम्पन्न गर्छौं भनेर १ वर्षका लागि समय थप गरेको उनले बताए । विद्यालय भवन निर्माण सम्पन्न गर्ने भनेर १ वर्ष म्याद थप गर्दासमेत नसकेपछि भने अहिले कन्ट्रक्सनका दीपक कार्की आउन छाडेको दाहालले बताए ।

३ तलाको २४ कोठे भवन निर्माणको जिम्मा लिएको कन्ट्रक्सनले निर्माण बीचमै छाडदा अलपत्र बनेको हो । दाहालका अनुसार हालसम्म पर्खाल लगाउने र प्लास्टरको कामबाहेक अरू केही भएको छैन । ‘झ्याल ढोका हाल्ने, रेलिङ लगाउने, पार्टेसन गर्ने, रंगरोगन गर्ने काम केही भएको छैन,’ उनले भने, ‘अगाडि गरेको प्लास्टर पनि उप्किन थालिसक्यो ।’ ३ करोड ८८ लाख रुपैयाँमा ठेक्का लागेको भवनको निर्माण हुन नसक्दा विद्यालय भवनको अभावमा विद्यार्थीको पठनपाठनमा समस्या भएको छ ।

प्रकाशित : असार २५, २०७६ ०७:५१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अनाहकमै हिरासत

कान्तिपुर संवाददाता

काभ्रे — धुलिखेल जाने क्रममा सोही बसमा बनेपाकी एक युवतीले आफूलाई अर्की महिलाले सुई हानेको भन्दै विवाद गर्न थालिन् । बनेपामा रोकिएको गाडीमा विवाद हुन लागेपछि खगेन्द्र पाठक बसबाट ओर्लिए । उनी बस रोकेर विवाद बढ्न थालेपछि पैदल लम्कन बसबाट झरे ।

उनी हिँड्नै लाग्दा सुई आक्रमण गरी भाग्न लागेको भन्दै भीडले खगेन्द्रलाई हातपात गर्दै कुटपिटसमेत गर्‍यो । पीडित भनिएकी युवतीले पछि ती युवाले आक्रमण नगरेको प्रहरीमा बयान दिएपछि बेलुका १० बजे मात्रै प्रहरी हिरासतबाट मुक्त भए । ‘प्रहरीले पक्रनेबित्तिकै गल्ती गरेको छैन भनेको थिएँ,’ उनले भने, ‘भीडले कुटपिट गर्न थालेपछि सुरक्षाका लागि प्रहरीसमक्ष गएको हुँ ।’

स्याङ्जाका खगेन्द्र सोमबार धुलिखेल अस्पतालमा शल्यक्रियापछि भर्ना गरिएका आफन्त भेट्ने हतारोमा थिए । मावि शिक्षक उनी काठमाडौंमा लोकसेवाको तयारीसमेत गर्दै थिए । उनले ठूली आमाको छोरा दाइको अप्रेसन धुलिखेल अस्पतालमा भएकाले भेट्न जाने क्रममा भीडले आक्रमण गर्‍यो । आरोप लागेकी अर्की महिला पनि स्थानीय विद्यालयमा अध्यापन गर्छिन् ।

जिल्ला प्रशासन कार्यालय जाने क्रममा सोही गाडी चढेकी उनलाई ती युवतीले शंकैका आधारमा आरोप लगाएकी थिइन् । प्रहरीले दुवैलाई पक्राउ गरेको थियो । परीक्षणका लागि टेकु पठाइएकी ती युवतीलाई सुई आक्रमणको आधार पुष्टि नभएपछि प्रहरी छलफलपछि दुवैलाई छाडिएको छ ।

प्रकाशित : असार २५, २०७६ ०७:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT