त्रिभुवन राजपथ र छोटो मार्ग अवरुद्ध

सुवास विडारी

मकवानपुर — हेटौंडाबाट संघीय राजधानी काठमाडौं प्रवेश गर्ने त्रिभुवन राजपथ र छोटो मार्गहरु वर्षासँगै आएको पहिरो कारण अवरुद्ध भएका छन् । त्रिभुवन राजपथ, हेटौंडा-फाखेल-काठमाडौं, हेटौंडा-सिस्नेरी-काठमाडौं, कान्तिलोकपथ सडक वर्षात्सँगै खसेको पहिरो कारण अवरुद्ध भएका छन् ।

शुक्रबार विहानको वर्षात्सँगै भीमफेदी गाउँपालिका-१, बाघझोरामा आएको बाढीका कारण त्रिभुनवराजपथ र छोटो मार्गहरु अवरुद्ध भएको जिल्ला प्रहरी कार्यालय मकवानपुरले जनाएको छ । ईन्द्रसरोवर गाउँपालिका-२, देउराली भन्दाएक किलोमिटर तल शुक्रबार बिहान पानीले लेदो माटोसहितको पहिरो खस्दा सडक अवरुद्ध भएको भएपनि हाल भने उक्त पहिरो हटाइसकिएको छ ।

अहिले बाटो अवरुद्धहुँदा काठमाडौंबाट हेटौंडा र हेटौंडाबाट काठमाडौं हिँडेका सवारी बाघझोरामा रोकिएको जिल्ला प्रहरी कार्यालय मकवानपुरका प्रहरी उपरीक्षक मुकेश कुमार सिंहले बताएका छन् । उक्त स्थान हेटौंडाबाट सात किलोमिटर उत्तरतर्फ पर्दछ । हेटौंडा-काठमाडौं जोड्ने छोटो दुरीको सडक अन्तर्गतको इन्द्रसरोवर २ र ३ को सीमा छेपारो गएको पहिरो हटाउन नसक्दा अझै सडक अवरुद्ध नै रहेको छ ।

वर्षाका कारण पूर्णरुपमा सडकमा भएको पहिरो हटाउन नसकेकोले अवरुद्ध बनेको सडक खुलाउन नसकिएको र सडक खुलाउने प्रयास भइरहेको प्रहरीले जनाएको छ ।

निरन्तर परेको वर्षासँगै गएको पहिरोले गर्दा सोमबारदेखि अवरुद्ध कान्तिलोकपथ अझै सञ्चालनमा आउन सकेको छैन । कान्तिलोक पथअन्तर्गत् भीमफेदी गाउँपालिका-८, गंगटे, कालोपहिरो भन्ने ठाउँमा सोमबार दिउँसो पहिरो र मंगलबार बिहान लेनडाँडा सिमात खोला नजिकै ठुलो ढुङ्गा खस्दा राजपथ अवरुद्ध बनेको हो ।

हेटौंडा-५, गर्दोहीमा वर्षात्सँगै आएको भेलका कारण तीनवटा घर डुवानमा परेका जिल्ला प्रहरीले जनाएको छ । प्रहरी उपरीक्षक सिंहका अनुसार डुवान क्षेत्रमा प्रहरी परिचालन गरी डुवा प्रभावितलाई सुरक्षित स्थानमा सारिएको छ ।

यसैगरी, प्रदेश ३ को मुकाम हेटौंडा आसापास रहेका राप्ती, कर्रा, त्रिवेणी, सामरी खोलाको बहाब समेत बढेको छ । वर्षात्सँगै विभिन्न स्थानमा गएको सानासान पहिरोका कारण विद्युत् सेवा अवरुद्ध रहेको छ ।

प्रकाशित : असार २७, २०७६ १३:२३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

फिल्डमा खटियो त्रिवि टोली

सुवास विडारी

मकवानपुर — कृषि तथा वनविज्ञान विश्वविद्यालयले आफ्नो जग्गामा भवन निर्माण गर्न थालेपछि त्रिभुवन विश्वविद्यालयले खटाएको अध्ययन टोली सोमबार हेटौंडा आइपुगेको छ ।

मन्त्रिपरिषद् र दुई विश्वविद्यालयको सहमतिविपरीत कृषि विश्वविद्यालयले जग्गा अतिक्रमण गरी भवन निर्माण
थालेको त्रिवि पदाधिकारीको आरोप छ ।

त्यसैले विस्तृत अध्ययनका लागि त्रिविले टोली खटाएको हो । राजेन्द्र पौडेल संयोजकत्वको टोलीमा प्राडा विनोद पराजुली, प्राध्यापक संघका महासचिव केशवराज शर्मा, कानुनी सल्लाहकार राजेन्द्र खनाल, कर्मचारी संघका वरिष्ठ उपाध्यक्ष पुण्यप्रसाद आचार्य सदस्य छन् ।

उक्त टोलीले सोमबारै कृषिले भवन निर्माण थालेको क्षेत्र र वनविज्ञान अध्ययन संस्थानका लागि छुट्याइएको पश्चिम दक्षिण क्षेत्रको जग्गाको अवलोकन गरेको छ । मन्त्रिपरिषदको निर्णयले छुट्याएर दिएको जग्गाभन्दा बाहिर गएर त्रिविको जग्गामा भवन निर्माण सुरु गरेको पाइएको टोलीले जनाएको छ । ‘प्रदेश ३ का मुख्यमन्त्री र प्रदेश सरकारले नै कानुनविपरीत सुरु भएको काममा सहयोग गरेको पाइएको छ,’ संयोजक राजेन्द्र पौडेलले भने । प्रदेश सरकारका पदाधिकारीसँग भेट्न खोजे पनि मुख्यमन्त्री डोरमणि पौडेल जिल्लाबाहिर भएकाले नसकिएको उनले बताए ।

‘कानुनविपरीत निर्माण सुरु भएको भवन कुनै पनि हालतमा रोक्नुको विकल्प छैन,’ त्रिविका कानुनी सल्लाहकार राजेन्द्र खनालले भने, ‘जबर्जस्ती गरिए न्यायिक उपचारमा जान हामी तयार छौं ।’ दुवै विश्वविद्यालयबीच भएको सहमति र सरकारको निर्णयको बेवास्ता गर्दै कृषि तथा वन विश्वविद्यालय एकलौटी रूपमा अगाडि बढेको अवस्था रहेको त्रिविको वन संकायका डिन कृष्णराज तिवारीले आरोप लगाए ।

हेटौंडा–१० मा रहेको त्रिविको १ सय ५८ बिघा जग्गामध्ये ६० बिघा जमिन कृषि विश्वविद्यालयलाई भोगाधिकार दिने निर्णय भएको थियो । दुई विश्वविद्यालयका पदाधिकारीले पश्चिमतर्फको जग्गा कृषि विश्वविद्यालयले भोगचलन गर्ने सहमति यसअघि भएको थियो ।

कृषिले भने दक्षिणतर्फ १० करोड रुपैयाँ लागतमा शैक्षिक भवन निर्माणको तयारी सुरु गरेपछि विवाद भएको हो । त्रिविबाट अध्ययनका लागि टोली र एएफयू हेटौंडाको पदाधिकारीबीच भेटवार्ता पनि भएको छ ।

प्रकाशित : असार १७, २०७६ ०७:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT