सन्तान देखाउने र माग्नेको भीड

विवाह भएको १० वर्षसम्म पनि सन्तान नभएको अवस्थामा ईशानेश्वर मन्दिर आएर ठाडाबत्ती बालेपछि सन्तान सुख प्राप्त भएको उनीहरूको विश्वास छ । ‘पहिले हामीलाई विश्वास लागेन । पछि २/४ जनाले भनेपछि ३ वर्षअघि ठाडाबत्ती बाल्न आएका थियौं’ लजालु स्वभावमा टिंकुले भनिन्, ‘हुन त भगवानप्रति आस्था हो । विश्वास नगरौं भने पनि आफ्नै सन्तान भएपछि गर्न करै लाग्यो । अनि छोरी देखाउन पुन: मन्दिर आएँ ।’ उनीहरूसँगै काठमाडौंबाट शर्मिला पाण्डे आएकी छन् । ‘रातभरि उभिएर ठाडाबत्ती बालेमा सन्तान प्राप्त हुन्छ भन्ने विश्वास छ । म पनि ठाडाबत्ती बाल्न आएकी हुँ,’ उनले भनिन् ।

लमजुङकै मध्यनेपाल थानसिङ नेटाका कृष्ण गुरुङ र सम्झना गुरुङ पनि छोरा कृषलाई लिएर ईशानेश्वर मन्दिरको दर्शन गर्न आए । विवाह गरेपछि छोराको चाहना बोकेका गुरुङ दम्पतीले २ वर्षअघि रातभर जाग्राम बसेर ठाडाबत्ती बालेको बताए । ‘मनमा छोरा नै चिताएर ठाडाबत्ती बालेको थिएँ । रातभरिको कष्टपूर्ण तवरले बत्ती बालेरै उभिएर रात कटाउनु कम दु:ख थिएन । त्यसैले छोरा प्राप्त भो, मनले सोचेको जस्तै भयो’ कृष्णले भने । ईशानेश्वर महादेव मन्दिरमा रातभरि ठाडाबत्ती बालेमा सन्तान प्राप्त हुने वा मनोकामना पूरा हुने विश्वास लिएर मन्दिर दर्शनको लागि आएको कास्की लेखनाथस्थित एभरेस्ट बैंक तालचोक शाखाकी प्रिती बनियाले बताइन् । नबिल बैंक न्यूरोड शाखा काठमाडौंकी देवी खड्काले पनि सन्तान प्राप्त हुने सुनेर ठाडाबत्ती बाल्न आएको बताइन् ।

ईशानेश्वर मन्दिर क्षेत्र विकास समितिका अध्यक्ष रामचन्द्र घिमिरे ‘शास्त्री’ का अनुसार सन्तान प्राप्ति, पुत्रपुत्री लाभका लागि शिवरात्रिको रातभर उभिएरै ठाडाबत्ती बाल्ने गरिन्छ । सन्तान प्राप्त हुने धार्मिक विश्वास छ । ‘रातैभर उभिएर बत्ती बालेमा मागेका कुरा पूरा हुने धार्मिक विश्वास छ,’ उनले भने । मन्दिर परिसरमा मंगलबार राति ७ सय जनाले ५ सय रुपैयाँको टिकट काटेर सुरक्षित तवरले ठाडाबत्ती बालेको समितिले जनाएको छ । यस्तै ४ सयभन्दा बढीले आफ्नै ढंगले ठाडाबत्ती बालेको अनुमान गरिएको छ । ‘यस वर्ष हामी मन्दिर पुनर्निर्माण गर्दैछौं । अझै व्यवस्थित गर्न सकिएको छैन,’ उनले भने । करिब २० हजारको संख्याले पाल टाँगेर रातभर जाग्राम बसी बत्ती बालेको अनुमान मन्दिर क्षेत्र विकास समितिले जनाएको छ । मन्दिरका पुजारी दिव्यचन्द्र सोतीका अनुसार सन्तान वा पुत्रपुत्री लाभको कामना गर्दै भक्तजनले रातभर निराहार बत्ती बाल्छन् । सन्तानको इच्छा राखेर ईशानेश्वर महादेव मन्दिर परिसरमा रातभर उभिएर बत्ती बाल्ने, सन्तान वा पुत्रलाभ भएपछि मन्दिरमा आएर महादेवलाई सन्तान देखाउने, विवाह भएको लामो समयसम्म सन्तान नभएका जोडीका अन्य मनोकामना पनि पूरा हुने विश्वासले शिवरात्रिमा ईशानेश्वर महादेव मन्दिर परिसरमा ठाडाबत्ती बाल्न आउँछन् ।

विशेषगरी महिलाले रातभरि उभिएरै बत्ती बाल्ने गर्छन् । आफ्ना पतिको सुखशान्तिको कामना गर्दै बालिने बत्तीलाई पुरुषबत्ती भनिने पुजारीहरू बताउँछन् । उभिएरै बत्ती बाल्ने भएकाले यसलाई ठाडाबत्ती भनिएको उनीहरूको भनाइ छ । परिवारको सुखशान्तिको कामना गर्दै भक्तजनले लाखबत्ती पनि बालेका छन् । पुजारीहरूका अनुसार विदेशमा रहेका पतिको सुखशान्तिको कामना गर्दै बत्ती बाल्न आउनेको संख्या पनि बढेको छ । ठाडाबत्ती बाल्न र मन्दिरमा दूध चढाउन हिमालदेखि तराईसम्मका भक्तजन आएका पुजारी सोतीले बताए ।

महाशिवरात्रि पर्वको अवसरमा ईशानेश्वरमा हरेक वर्ष मेलाको आयोजना हुँदै आएको छ । मेलामा छेलो हान्ने, ठाडोभाका गाउने, सप्ताह ज्ञान महायज्ञ, भजन गाउने, लोकदोहोरी, भलिबल प्रतियोगिता, कृषि प्रदर्शनी लगायतका कार्यक्रम गरिँदै आएको छ ।