यात्रीलाई सास्ती

कान्तिपुर संवाददाता

पर्वत — मध्यपहाडी लोकमार्ग आयोजनाको कास्की–पर्वत–बागलुङ निर्माणका लागि अघिल्लो सातादेखि दैनिक ७ घण्टा सडक अवरोध भएसँगै पहिरो र बाढीले समेत सास्ती दिएको छ ।

यो खण्डमा डबल लेनको सडक बनाउन साँघुरो स्थानमा भीरपहरा काट्न बन्द गरिएको निर्माण कम्पनी एपेक्स कन्सट्रक्सनले जनाएको छ । भीर कटान गर्नाले झरीसँगै सडकमा पहिरो खस्दा यात्रीले निकै सास्ती पाउनेगरेका हुन् ।

आयोजना पक्षले सम्झौता अनुसार काम नगर्दा यात्रीहरूले निकै सास्ती पाउने गरेका छन् । ‘जाममा नपरियोस् भनेर समय तालिका हेरेर हिँड्छौं,’ सवारीचालक श्याम खत्रीले भने, ‘बाटोमा एक–दुई घण्टा नरोकिएको कुनै दिन छैन । कहिले पहिरोले, कहिले बाढीले थुन्छ । आयोजनाका डोजर भन्ने मात्रै हो ।’ बसमै गैंची–बेल्चा बोकेर हिँड्नुपरेको सवारीचालकले बताए ।

Yamaha

आयोजना निर्माण पक्षले पर्वतको कुश्मा नगरपालिकामा पर्ने चुवाको भीर र मोदी गाउँपालिकामा पर्ने डिमुवास्थित माहुरीभीर सडक बन्द गरेको हो । कुस्माको खरेहा खोलादेखि मोदीको अँधेरीखोलासम्म बिहान १० बजे देखि दिउँसो १२ बजे र दिउँसो १ देखि ४ बजे बन्द गर्ने तालिका बनाएको छ ।

त्यस्तै पर्वत र कास्कीको सिमानामा पर्ने बेतेनी–नयाँपुल–गिरिचोक सडक फराकिलो पार्न साँझ ६–८ बजेसम्म सडक अवरुद्ध हुन्छ । निर्माण कम्पनी लामा कन्ट्रक्सनका व्यवस्थापक गोविन्द भुसालका अनुसार माहुरीभीरमा २ स्थानबाट सडक फराकिलो बनाउने काम भइरहेकाले केही समय सडक अवरुद्ध भएको हो । ‘हाम्रा हेभी इक्युपमेन्ट तयारी अवस्थामा हुन्छन्,’ उनले भने, ‘खबर हुँदासाथ सडक खुलाइन्छ ।’ दिउँसोको कामले थकित चालकहरू राति छिटै सुत्ने भएकाले रातको समयमा बाटो रोकिँदा केही समस्या भएको उनले बताए ।

यात्रीहरूले रातिकै समयमा सडकमा बढी समस्या हुने भएकाले सडक निर्माण पक्षले राति बढी ध्यान दिनुपर्ने बताउँछन् । ‘दिउँसो केही भइहाले उद्धार गर्न सहज हुन्छ,’ म्याग्दीको बेनीकी माया सुनारले भनिन्, ‘राति पहिरोले पुरिए कसरी उद्धार हुन्छ ?’

पोखरा–बागलुङ खण्डको कास्की र पर्वत सिमानास्थित पर्वत प्रवेशद्वारदेखि मालढुंगासम्मको २३.७६ किलोमिटर स्तरोन्नतिको काम लामा कन्स्ट्रक्सनले जिम्मा लिएको छ । कम्पनीले ८३ करोड ९८ लाख रुपैयाँमा पर्वतखण्ड डबल लेनको बनाउन ठेक्का पाएको हो ।

हालसम्म करिब १५ प्रतिशत काम सकिएको कम्पनीले जनाएको छ । वर्षाको समय यात्रीको समस्यालाई ध्यानमा राखेर काम गर्न निर्देशन दिए पनि प्राकृतिक प्रकोपका कारण समस्या आइरहेको प्रमुख जिल्ला अधिकारी गुरुदत्त ढकालले बताए ।

Esewa Pasal

प्रकाशित : असार २८, २०७५ ११:०७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सिंगो बस्ती व्यवसायिक गाईपालनमा

दूध बिक्रीबाट आम्दानी र गोबरबाट मल
भीरकोट ६ का २९ घरधुरीमा दुधालु पशुपालन
प्रतिक्षा काफले

स्याङ्जा — सिमलचौरको सिंगो बस्ती व्यावसायिक गाईपालनमा लागेको छ । भीरकोट नगरपालिका ६ को उक्त बस्तीका २० घरधुरी सबैले दुधालु पशुपालन गरेका छन् । केहीको व्यक्तिगत छ भने केहीले समूहमा गाईपालन गरेका छन् ।

स्याङ्जाको भीरकोट नगरपालिका ६ सिमलचौरमा व्यावसायिक गाईपालन फर्म । तस्बिर : कान्तिपुर

दूध बिक्रीबाट हुने आम्दानी राम्रो भएपछि पशुपालनमा पशु सेवा कार्यालयले पनि स्थानीयलाई हौस्याएको हो । ‘वर्ष दिन हुन लाग्यो, अभियानकै रूपमा गाईपालन घरघरै छ,’ पशु प्राविधिक डोलराज गैरेले भने, ‘घाँस सजिलै पाइने, दूध बिक्रीबाट आम्दानी र गोबरबाट मल हुने बुझेकाहरूले सामुहिक लगानीमा पनि गाईपालन थालिएको छ ।’

भूकम्पपीडित ७० वर्षीया सावित्रा जिटीका चार गाई छन् । ‘टहराको बास भए पनि पेटले खान मागिहाल्छ,’ उनले भनिन्, ‘पशु कार्यालयले आम्दानीको बाटो देखाइदियो । अनि गाईपालन गरेकी हुँ ।’ दैनिक ३२ देखि ३५ लिटरसम्म दूध बेच्ने गरेको उनले बताइन् । गाईपालनको तरिका बताएर घाँसको पनि व्यवस्था गरिदिएकाले सजिलो भएको उनको भनाइ छ ।

४९ वर्षीय मानबहादुर जिसीका गोठमा ९ गाई छन् । ‘अहिले ६ वटाले दूध दिँदैछन्,’ उनले भने, ‘घरमा अलिकति खान राखेर दिनको सरदर ७० लिटर जति बेचिन्छ ।’ खर्च कटाएर मासिक करिब ४० हजार हाराहारी आम्दानी हुने गरेको उनले बताए । ‘दु:ख गर्न सके आम्दानी राम्रै छ,’ उनले भने, ‘गोठ स्याहार्नेले एक रात बाहिर कतै जान्छु भनेर पनि नपाउने समस्याचाहिँ हुने रहेछ ।’ गाईपालनका लागि उनले पशु कार्यालयको सिफारिसमा स्थानीय सहकारीबाट ६ लाख रुपैयाँ ऋण लिएका थिए । त्यसको साँवा र ब्याजको मासिक १४ हजार रुपैयाँ बुझाउन सजिलै भएको उनले बताए । उनले भने, ‘पशुपालनका लागि हामी खेतीकिसानी गर्नेले धेरै तालिम पनि लिनु नपर्ने रहेछ । गर्दै आएकै काममा थोरै सुधार गरे पुगेको छ ।’

पशुपालक किसानलाई पशु सेवा कार्यालयले विभिन्न जातका पोषक घाँसको खेती गर्न सिकाएको छ । ‘पशु पालेर मात्रै हुँदैन, पालेका बस्तुभाउका आहारको इन्तजाम पनि गर्नुपर्छ,’ प्राविधिक गैरे भन्छन् ‘पशुपालकका लागि घाँस लगाउन अनिवार्य गरेका छौं ।’ परम्पारगत विधि जसरी गाईलाई थोरै घाँसले नपुग्ने भएकाले पोषक घाँस र दाना दिने तरिका पनि किसानलाई सिकाइएको उनले बताए । ‘सुरु सुरुमा घाँसको बिउ हामी दिन्छौं,’ उनले भने, ‘लगेर लगाएपछि बीउ उत्पादन गरेर किसानले फिर्ता दिनुपर्छ । त्यो बीउ फेरि अर्को किसानलाई दिन्छौं ।’

व्यावसायिक पशुपालन सुरु भएपछि घरघरै दूध उत्पादन भएको छ । तर, केही किसानले भने अझै राम्रो बजार नभएको गुनासो गरेका छन् । पाँचवटा गाई पालेकी कमला गोदार भन्छिन्, ‘राम्रो भाउ आउनेगरी सजिलै बिक्री हुँदै जान सके मात्रै फाइदा सबैले बराबर पाउँछन् ।’ पशु कार्यालयले विधि सिकाउने र सहकारीले ऋण दिने गरेपछि पशुपालनमा आकर्षित किसान अझै पनि राम्रो भाउ पाइने बजारको खोजीमा रहेको उनले बताए । ‘श्रीमान् कमाउनकै लागि भनेर विदेशमा हुनुहुन्छ,’ उनले भनिन्, ‘छोराछोरीसँग घरै बसेर गाईपालनबाट आम्दानी गर्न सकिन्छ भन्ने जानियो । यतिसम्म राम्रै हो, दूधले भाउ पाइनेगरी खरिद गरिदिने पनि खोजीदिनुपर्छ ।’ किसानहरूले बजारको खोजीमा सघाउन नगरपालिकालाई पनि आग्रह गरिरहेको उनले बताइन् ।

प्रकाशित : असार २८, २०७५ ११:०६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT