बेंसीसहर–चामे सडक अवरुद्ध

अबिरल वर्षाका कारण मर्स्याङ्दी गाउँपालिका–४, च्याम्चे नजिकै पहिरो खसेपछि सडक बगाएको स्थानीयको भनाइ छ । स्थानीय होटल व्यवसायी खरसिंह तामाङका अनुसार बाटो अवरुद्ध भएपछि सवारी साधन चलेका छैनन् ।

बाटोमा हिँडेका यात्रु समेत वारपार गर्न समस्या परेको छ । मनाङको नासों गाउँपालिका–१ तालका बुधराज गुरुङले पहिरो गएपछि सोमबार दिउँसो ३ बजेदेखि नै च्याम्चेमा बस्नुपरेको बताए । उनका अनुसार पहिरोसंगै ठूलाठूला ढुंगा खसेका छन् । सवारी साधन बाटोमै अलपत्र परेको उनले बताए ।

लमजुङको बेंसीसहरदेखि मनाङतर्फ करिब ३० किलोमिटरको दुरीमा पर्ने च्याम्चेमा खसेको पहिरोले चक्रीय अन्नपूर्ण पदमार्गमा हिँड्ने पर्यटक तथा यात्रुलाई समस्या बनाएको स्थानीयले बताएका छन् ।

वर्षाका कारण बेंसीसहर–चामे सडकको लमजुङ खण्डमा प्राय: गइरहने पहिरोले सवारी आवागमन नियमित हुन नसकेको चालकहरुले बताएका छन् । डीएसपी यादव ढकालले बाटो खुलाउनको लागि डोजरले प्रयास थालिसकेको बताए । ‘प्रहरीलाई खटाएका छौं । स्थानीय पनि हुनुहुन्छ । डोजरको माध्ययमबाट बाटो खुलाउने प्रयास गरेका छौं’ उनले भने ।