मन्दिरको भेटी सामाजिक काममा

घनश्याम खड्का-

म्याग्दी — अन्नपूर्ण गाउँपालिकाको खयरवाराही मन्दिरले भेटी तथा दानको रकम सार्वजनिक गरी सामाजिक काममा खर्च गर्न थालेको छ । भेटी र दानको रकम बैंकमा जम्मा गरी त्यसको ब्याजबाट मन्दिरका पुजारी, सरसफाइ कर्मचारी, जेष्ठ नागरिक आश्रम र वेदविद्याश्रम संस्कृत विद्यालय आदि व्यवस्थापनमा खर्च गर्ने गरिएको हो ।

नागीवाराही, हिस्तानको प्यारीवाराही र मालिकाको मालिका मन्दिर हुँदै गलेश्वरले पनि हरहिसाब सार्वजनिक गर्न थालेका छन् । यसअघि धार्मिकस्थलले वर्षौंदेखि पुजारीको खटनपटनमा छाडेका थिए ।

साउनको तेस्रो सोमबार मात्रै ३ लाख २३ हजार रुपैयाँ संकलन भएको गलेश्वर शिवालय क्षेत्र विकास कोषले जनाएको छ । सदरमुकाम बेनीदेखि ३ किलोमिटर उत्तरमा अवस्थित गलेश्वरधाममा मंगलबार गणना गरिएको साउनका तीन सोमबारको भेटी ९ लाख १९ हजार रुपैयाँ पुगेको छ ।

Yamaha


साउनका हरेक सोमबार, बालाचतुर्दशी, शिवरात्रि पर्वको भोलिपल्ट र अन्य समय महिनाको पहिलो दिन मन्दिरमा भक्तजनले चढाएको भेटी तथा दानको रकम प्रहरी र स्थानीय अगुवासमेतको रोहवरमा सार्वजनिक रूपमा गणना गर्न थालिएको छ ।


‘पवित्र धार्मिक स्थललाई आर्थिक रूपमा पारदर्शी बनाउन दानदातव्य, भेटी र चन्दाको हिसाबलाई सार्वजनिक गर्दै आएका छौं,’ गलेश्वर शिवालय क्षेत्र विकास कोषका सचिव माधवप्रसाद रेग्मीले भने, ‘नीतिगत एवं निर्णय प्रक्रिया पनि पारदर्शी बनाउँदै लगेका छौं ।’ धार्मिक संस्था अपारदर्शी रहेको आलोचना हुन नदिन सबै गन्तव्यका सञ्चालक समितिले हिसाबकिताब सार्वजनिक गर्नु राम्रो हुने उनले बताए ।


गलेश्वर मन्दिरले भने साउने सोमबार, शिवरात्रि, बालाचतुर्दर्शीजस्ता विशेष पर्वमा हुने पूजाअर्चनाको भेटी भोलिपल्ट र बाँकी समय हरेक महिनाको अन्तिम दिन प्रहरी, स्थानीय र कोषका पदाधिकारीको रोहवरमा गणना गरी आम्दानी बाँध्ने गरेको जानकारी उनले दिए ।

Esewa Pasal

प्रकाशित : श्रावण २३, २०७५ १०:५८
ADVERTISEMENT
प्रतिक्रिया
पठाउनुहोस्
ADVERTISEMENT

उपाध्यक्षमा शर्मा

कान्तिपुर संवाददाता

पोखरा — गण्डकी प्रदेशको नीति तथा योजना आगोगको उपाध्यक्ष नियुक्त गिरीधारी शर्मा पौडेलले मंगलबार पद तथा गोपनियताको सपथ लिएका छन् ।

मुख्यमन्त्री पृथ्वीसुब्बा गुरुङले उनलाई सपथ खुवाउँदै प्रदेशको विकासमा योजना बनाएर अघि बढ्न अनुरोध गरे । प्रदेश सरकारले स्याङ्जाको आँधिखोला गाउँपालिका ४ का पौडेललाई उपाध्यक्षमा नियुक्त गरेको हो ।


पौडेल योजना र विकास विज्ञ मानिन्छन् । संयुक्त राष्ट्रसंघीय विकास कार्यक्रम (युएनडीपी) मा काम गरेका उनी राष्ट्रिय योजना आयोगमा कार्यरत रहेकै बेला राजीनामा दिएर यता आएका हुन् । उनले प्रदेशको समृद्धिका लागि आफूले काम गर्ने र सहयोगका लागि सबै पक्षसँग अनुरोध गरे । आयोगमा उनी राष्ट्रिय योजना, अनुगमन तथा मूल्यांकन, क्षमता सुदृढीकरण आयोजनाका प्रबन्धक थिए । उनले थाइल्यान्डको एसियन इन्स्टिच्यूट अफ टेक्नोलोजीबाट विकास योजनामा एमएससी र पिएचडी गरेका छन् । २१ वर्ष नेपाल परिवार नियोजन संघमा काम गरेका उनी त्यहाँ महानिर्देशक थिए ।


उपाध्यक्षमा नियुक्त पौडेलले प्रदेशको आर्थिक समृद्धिमार्फत विकास गर्ने योजना सुनाए । पर्यटन र ट्राभल्सको पूर्वाधार, ऊर्जाको विकासबाट पेट्रोलियम पदार्थको आयातलाई कम गर्दै जाने र ग्यास विस्थापित गर्ने, कृषिको आधुनिकीकरण र व्यवसायिकीकरण र मझौला उद्योगमार्फत आर्थिक वृद्धि गरी गरिबी न्यूनीकरण गर्ने काममा लाग्ने बताए । प्रदेशको निरपेक्ष गरिबी २१ प्रतिशत रहेकोमा एक दशकमा त्यसलाई घटाएर ५ प्रतिशतमा झार्ने उनको भनाइ छ । ‘दिगो विकास लक्ष्यको प्रतिबद्धता पूरा गर्दै आर्थिक योजना तर्जुमा गरी अघि बढ्नेछु,’ उनले भने ।


प्रदेश नीति तथा योजना आयोग (गठन तथा कार्य सञ्चालन) आदेश २०७४ ले मुख्यमन्त्री अध्यक्ष रहने व्यवस्था गरेको छ । साथै कम्तीमा एक महिलासहित चार सदस्यीय आयोगमा अब दुई सदस्य थप्नुपर्छ । एकजना विज्ञ भने तीन महिनाका लागि नियुक्त गरिसकेको छ ।

प्रकाशित : श्रावण २३, २०७५ १०:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT