मन्दिरको भेटी सामाजिक काममा

घनश्याम खड्का

म्याग्दी — अन्नपूर्ण गाउँपालिकाको खयरवाराही मन्दिरले भेटी तथा दानको रकम सार्वजनिक गरी सामाजिक काममा खर्च गर्न थालेको छ । भेटी र दानको रकम बैंकमा जम्मा गरी त्यसको ब्याजबाट मन्दिरका पुजारी, सरसफाइ कर्मचारी, जेष्ठ नागरिक आश्रम र वेदविद्याश्रम संस्कृत विद्यालय आदि व्यवस्थापनमा खर्च गर्ने गरिएको हो ।

नागीवाराही, हिस्तानको प्यारीवाराही र मालिकाको मालिका मन्दिर हुँदै गलेश्वरले पनि हरहिसाब सार्वजनिक गर्न थालेका छन् । यसअघि धार्मिकस्थलले वर्षौंदेखि पुजारीको खटनपटनमा छाडेका थिए ।

साउनको तेस्रो सोमबार मात्रै ३ लाख २३ हजार रुपैयाँ संकलन भएको गलेश्वर शिवालय क्षेत्र विकास कोषले जनाएको छ । सदरमुकाम बेनीदेखि ३ किलोमिटर उत्तरमा अवस्थित गलेश्वरधाममा मंगलबार गणना गरिएको साउनका तीन सोमबारको भेटी ९ लाख १९ हजार रुपैयाँ पुगेको छ ।

Yamaha


साउनका हरेक सोमबार, बालाचतुर्दशी, शिवरात्रि पर्वको भोलिपल्ट र अन्य समय महिनाको पहिलो दिन मन्दिरमा भक्तजनले चढाएको भेटी तथा दानको रकम प्रहरी र स्थानीय अगुवासमेतको रोहवरमा सार्वजनिक रूपमा गणना गर्न थालिएको छ ।


‘पवित्र धार्मिक स्थललाई आर्थिक रूपमा पारदर्शी बनाउन दानदातव्य, भेटी र चन्दाको हिसाबलाई सार्वजनिक गर्दै आएका छौं,’ गलेश्वर शिवालय क्षेत्र विकास कोषका सचिव माधवप्रसाद रेग्मीले भने, ‘नीतिगत एवं निर्णय प्रक्रिया पनि पारदर्शी बनाउँदै लगेका छौं ।’ धार्मिक संस्था अपारदर्शी रहेको आलोचना हुन नदिन सबै गन्तव्यका सञ्चालक समितिले हिसाबकिताब सार्वजनिक गर्नु राम्रो हुने उनले बताए ।


गलेश्वर मन्दिरले भने साउने सोमबार, शिवरात्रि, बालाचतुर्दर्शीजस्ता विशेष पर्वमा हुने पूजाअर्चनाको भेटी भोलिपल्ट र बाँकी समय हरेक महिनाको अन्तिम दिन प्रहरी, स्थानीय र कोषका पदाधिकारीको रोहवरमा गणना गरी आम्दानी बाँध्ने गरेको जानकारी उनले दिए ।

प्रकाशित : श्रावण २३, २०७५ १०:५८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अस्पताल भवन निर्माण अलपत्र

घनश्याम खड्का

म्याग्दी — क्षमता विस्तार गर्दै ५० शय्याको हुने भनिएको म्याग्दी जिल्ला अस्पतालको भवन निर्माण अलपत्र परेको छ । निर्माण सम्झौता भएको १८ महिनामा भवनको जगको पनि काम पूरा नगरी ठेकेदार आउन छाडेपछि यस्तो भएको हो ।

निर्माणको काम अघि बढाउन धेरै पटक पत्राचार गरेको सहरी विकास तथा भवन निर्माण विभागले अब भने कारबाहीको तयारी थालेको छ । ‘निर्माणमा ठेकेदारले ढिलासुस्ती गरेका छन् । साउन ११ सम्ममा आठौंपटक पत्राचार गरिसक्यौं,’ बागलुङस्थित डिभिजन कार्यालयका प्रमुख प्रकाश अर्यालले भने, ‘आगामी शनिबारसम्म पनि ठेकेदार निर्माणस्थलमा आएनन् भने धरौटी जफतसहितको कारबाहीको तयारीमा छौं ।’ ठेक्का सम्झौताअनुसार समयावधि रहे पनि कामको प्रगतिका आधारमा कारबाही गरिने उनले बताए । ‘अझ अस्पताल भनेको अरू जस्तो होइन, जनस्वास्थ्य सरोकारको संस्था हो,’ उनले भने, ‘ठेकेदारले संवेदनासमेत ख्याल गरेका छैनन् ।’

२०७६ असोजभित्र काम पूरा गर्ने गरी डिभिजन कार्यालयले २०७३ पुस २१ मा काठमाडौंको महादेव खिम्ती, गल्वा रफिना जेभीलाई १८ करोड ९० लाखमा ठेक्का दिएको छ । २४ करोड ४ लाख २२ हजार लागत अनुमान गरिए पनि ठेकदारले ५ करोड ५० लाख न्यून अंकमा बोलकबोल गरी निर्माण सम्झौता गरेका थिए । ठेकेदार कम्पनीले अस्पताल भवनको जगको काम गर्दागर्दै छाडेपछि फलामे डन्डीहरूमा खिया लागेको छ । जग वरपरबाट भत्किएर पुरिन थालेको छ ।

सम्झौताको १९ महिना बित्दासम्म ठेकेदारले अन्डरग्राउन्ड अस्पताल भवनको जग निर्माण गर्दागर्दै काम छाडेका छन् । साइडबाट पहिरो झरेकाले फाउन्डेसनको केही भाग पुरिन थालेको छ । डिभिजन कार्यालयका अनुसार अस्पतालका लागि ५ हजार ३ सय वर्गमिटरमा एक तला अन्डरग्राउन्डसहित तीनतले भवन बनाउने डिजाइन स्टिमेट छ । पहिलो तलामा ओपीडी, दोस्रोमा इनडोर र तेस्रोमा प्रशासनिक कार्यालय रहने छ । भवनबाहेक बगैंचा र प्यासेजलगायत थप काम पनि छन् । नयाँ भवन बन्ने भनिएपछि पुरानोबाट सेवा दिन पनि अस्पताललाई गाह्रो परेको छ । पुरानो भवन साँघुरो र सबै उपकरण राखेर सेवा दिन समस्या छ ।

एकपटक आफैंले कारबाही गरेको ठेकेदारलाई डिभिजन कार्यालयले अर्को ठेक्का दिएको थियो । ठेक्का लिएको संयुक्त निर्माण कम्पनीमध्येको रिफिना कन्स्ट्रक्सनले यसअघि पनि जनस्वास्थ्य कार्यालयको अर्को भवन ठेक्का लिएर समयमा काम नगरेपछि कारबाहीमा परेको थियो । रेफिनाले ०६९ वैशाख २० मा २ वर्षको समय लिएर जनस्वास्थ्यको भवन निर्माणको ठेक्का लिएको थियो । थप २ वर्ष ढिला गरी अधकल्चो निर्मित भवन हस्तान्तरण गरेको थियो ।

समयमै भवन पूरा नगरेपछि त्यसबेला ठेकेदारलाई ५ लाख ८२ हजार जरिवानासहित कारबाही गरिएको थियो ।‘जोइन्ट भेन्चरमध्येको मुख्य रफिना कन्स्ट्रक्सन यसअघि पनि कारबाहीमा परेको ठेकेदार कम्पनी हो,’ डिभिजन प्रमुख अर्यालले भने, ‘म्याग्दी जिल्ला अस्पतालकै अर्को भवन निर्माणमा पनि ढिलाइ गरेकाले ६० दिनको ५ लाख ८२ हजार जरिवाना गरेका थियौं ।’

प्रकाशित : श्रावण २२, २०७५ ०९:४९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT