सेवाग्राहीले बुझेनन् अनलाइन व्यवस्था

सेवाग्राही भन्छन्– ‘सुविधाको बहानामा सास्ती भयो’
‘सिस्टम बिग्रिएर समस्या आउनसक्छ’ - गोकुल शर्मा, निमित्त प्रमुख, यातायात व्यवस्था कार्यालय गण्डकी
लाइसेन्सको दरखास्तै भर्न हैरान
विना थापा

कास्की — यातायात व्यवस्था विभागले सवारीचालक अनुमतिपत्र (लाइसेन्स) का लागि गरेको अनलाइन व्यवस्थालाई सेवाग्राहीले बुझ्न सकेका छैनन् । साउन तेस्रो सातादेखि खुलेको अनलाइन आवेदनको व्यवस्था नबुझ्दा सेवाग्राहीले हैरानी खेप्नुपरेको छ ।

‘भर्न पाइन्छ भन्ने सुनेर साइबर गई भर्न थालेको सिस्टमले कामै गरेन,’ रामबजारकी स्मिता गुरुङ भन्छिन्, ‘अर्को पटक पनि गएँ, बन्द रहेछ । यस्तो अवस्थामा कसलाई भन्नु ?’ यातायात कार्यालयका कर्मचारी पनि अनलाइन आवेदनको व्यवस्थाबारे प्रस्ट बुझाउन सक्ने नभएको उनले सुनाइन् । ‘जति पालो पर्खन परे पनि पहिलेकै ठीक थियो,’ उनले भनिन्, ‘सुविधा दिने बहानामा सेवाग्राहीलाई समस्या भएको छ ।’ आफूले जेठमा भरेको आवेदन रद्द भएर पुन: भर्न खोज्दा सिस्टम इरर आएको उनले बताइन् । सिस्टममा आएको समस्याबारे सेवाग्राहीले प्रष्ट बुझिने गरी जानकारी दिइनुपर्ने उनको सुझाव छ ।

आवेदन खुलेपछि सबै सेवाग्राहीले फारम भर्न पाउनुपर्ने पृथ्वीचोकका शिवहरि पन्त बताउँछन् । ‘आवेदन खुल्यो भन्छन्, भर्न लाग्यो बन्द भइसकेको हुन्छ,’ उनले भने, ‘सम्बन्धित निकायले यसको व्यवस्था गर्नुपर्छ ।’ पोखरा पृथ्वीचोककी शान्ति सुवेदीले दिनमा १ घण्टा मात्र खुलाएर केही आवेदकले भरेपछि सिस्टम बन्द हुने गरेको बताइन् । ‘हप्ता, महिना कसरी हुन्छ, समय अवधि राखेर खुलाउँदा सहज हुन्थ्यो,’ उनले भनिन् ।

Yamaha

सिस्टम बिग्रिएर समस्या आउनसक्ने यातायात व्यवस्था कार्यालयको सवारीचालक अनुमतिपत्र गण्डकीका निमित्त प्रमुख गोकुल शर्मा बताउँछन् । ‘भदौ मसान्तसम्म प्याक भइसकेकाले पनि समस्या आउन सक्छ,’ उनले भने । केन्द्रबाट गण्डकीका लागि मोटरसाइकलका ५०, स्कुटरका ५० र कार, जिप भ्यानका सवारीचालक अनुमतिपत्रका लागि सय जनाको आवेदन खुलाएको उनले बताए । ‘तर, विभागबाट आवेदन बन्द भएको कुनै जानकारी आएको छैन,’ उनले भने ।

आवेदन डेढ महिना बन्द गरी साउनको तेस्रो सातादेखि पुन: खुलेको हो । चालु आवको अन्त्यमा रि–ट्रायलबारे सबै काम सिध्याएर राजस्वलगायत हिसाब मिलाउन यातायात व्यवस्था विभागले आवेदन बन्द गरेको थियो । प्रमुख शर्माका अनुसार लाइसेन्सको आवेदन, लिखित र प्रयोगात्मक परीक्षासमेत स्थगित गरिएको थियो । त्यस्तै जेठका लागि भरिएका सबै आवेदन रद्द गरी रि–ट्रायल बाँकी रहेकाहरूको परीक्षा असार दोस्रो सातासम्म सम्पन्न गरिसक्ने निर्णय गरिएको थियो ।

प्रकाशित : श्रावण २९, २०७५ ०९:४५
प्रतिक्रिया
पठाउनुहोस्

फुटपाथ छेकेर व्यापार

विना थापा

कास्की — साउनका सोमबार पोखरामा बैदामको केदारेश्वर र अरू दिन विन्ध्यवासिनी मन्दिरका फुटपाथ खुद्रे व्यापारीले ढाक्छन् । साउनका सोमबार शिवजीका मन्दिर धाउनेमध्ये बोलबम तीर्थयात्री बगरको गाईघाटमा पुग्छन् ।

त्यहाँबाट सेतीको जल लिएर केदारेश्वर मन्दिर आइपुग्छन् । गेरु वस्त्र लगाउने बाहेक पनि सर्वसाधारणको भीड गाईघाट र केदारेश्वरमा उत्तिकै हुने गरेको छ ।


दुवै ठाउँ फुटपाथ ढाकेर फूलपाती, पूजा सामग्री, खेलौना र तरकारीको व्यापार चल्छ । मगन्ते पनि बग्रेल्ती बसेका हुन्छन् । अन्त बजार क्षेत्रमा जस्तो देवालय छेउछाउ महानगरपालिकाका नगर रक्षकले फुटपाथका व्यापारीलाई खेददैनन्् । त्यसैले पनि तीर्थालुलाई असजिलो पार्दै व्यापार गर्नेको रोजाइमा गाईघाट र केदारेश्वर छ । वर्षायाम, त्यसमाथि पोखराको भूगोल ।

बिहान बेलुकी पानी परेकै छ । सेतीको जल लिन पुगिने गाईघाट क्षेत्र झर्दा बाटामा जति फुटपाथे व्यापारीको भीड छ, त्योभन्दा धेरै भीड केदारेश्वरमा हुन्छ । गाईघाट क्षेत्रमा सडकमा पानी जम्दैन, त्यसैले हिलोको समस्या छैन तर केदारेश्वर क्षेत्र वर्षाले हिलाम्य हुन्छ । हिलाम्य बाटोका दायाँ–बायाँ मन्दिर आउजाउ गर्नेलाई बाधा पुग्ने गरी व्यापारी बसेका हुन्छन् । मन्दिरको भित्री गेटसम्म आउजाउ गर्नेलाई बाधा पार्दै बस्नेको ठूलो संख्या मगन्तेहरू हुन्छन् । सपरिवार बसेका मगन्तेले श्रद्धालुलाई हात समातेर रोक्दै सहयोगको याचना गर्ने गरेका छन् । यसरी बस्ने मगन्तेमा ९० प्रतिशत
भारतीय छन् ।

‘केदारेश्वरलाई व्यवस्थित बनाइनुपर्छ, जथाभावी व्यापार गर्नेहरू बसेर मान्छेलाई हिँड्न सकस हुन्छ, त्यसमाथि फोहोर पनि हुनेगरेको छ,’ स्थानीय माया पहारीले भनिन्, ‘व्यापार गर्न बसे पनि साँझ–बिहान आफूले गरेको फोहोर आफैं तह लगाउनुपर्छ ।’ पर्यटकीय क्षेत्र भएकाले फोहोर व्यवस्थापन हुन जरुरी रहेको उनले बताइन् । फुटपाथे व्यवसायी सोमबारका लागि आइतबार नै ठाउँ ओगटेर राख्छन् । बिहानैदेखि व्यपार गर्छन् । उनीहरू उठेपछि फोहोर त्यत्तिकै हुने मन्दिर आउजाउ गर्नेहरू बताउँछन् ।

केदारेश्वरमा फोहोर उठाउन पारिश्रमिकको व्यवस्था गरेर एकजना कामदार राखेको बैदामको मूलथोक टोलविकास संस्थाले जनाएको छ । ‘गएको सोमबार १० बोरा मैला निस्किएको थियो,’ अध्यक्ष हिरू पुनमगरले भने, ‘मन्दिर आउनेलाई चाहिने सामान बेच्नेलाई रोक्नु पनि राम्रो मानिँदैन । घर बाहिरको मैला महानगरपालिकाको गाडीले लान नमान्दा भने व्यवस्थापन अलि गाह्रो भएको छ ।’ सीमित क्षेत्र तोकेर महानगरपालिकाले फुटपाथको व्यवस्थापन टोलविकास संस्थालाई दिनुपर्ने उनले बताए ।

फोहोर र आवातजावतमा बाटो अवरोध भएको गुनासो आएको पोखरा ६ का वडाध्यक्ष जगतबहादुर पहारीले बताए । ‘धार्मिस्थलको व्यवस्थापन हामीले बाहिरबाट गर्दा हस्तक्षेपजस्तो देखिन्छ, मन्दिर व्यवस्थापन समितिको अगुवाइ भए मात्रै राम्रो हुन्छ,’ उनले भने, ‘सडक र फुटपाथ छेकेर बस्न, व्यापार गर्न पाइँदैन ।’ आस्थासँग जोडिएको संवेदनशील क्षेत्र भएकाले व्यवस्थापनका लागि आफूले छलफल चलाउने उनले बताए ।

प्रकाशित : श्रावण २३, २०७५ १०:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT