मध्यपहाडी लोकमार्ग : घुम्तीमा सडक विस्तार

घुम्ती र साँघुरा सडकलाई फराकिलो बनाउन डिलतर्फ पर्खाल लगाउने र कुनातर्फ भत्काउने काम धमाधम
अगन्धर तिवारी

पर्वत — मध्यपहाडी लोकमार्गको पर्वत खण्ड विस्तारको काम धमाधम अघि बढेको छ । लोकमार्गको बागलुङ र पर्वतखण्डको डबल लेन सडक तीन वर्षमा निर्माण पूरा गर्ने लक्ष्यसहित आयोजनाले काम गरिरहेको छ ।

मध्यपहाडी लोकमार्गको कुश्मा–बागलुङ खण्डअन्तर्गत कुश्माको छमर्केनजिक सडक फराकिलो पार्न पुराना ग्याबिन निकाल्दै कामदार । तस्बिर : अगन्धर । कान्तिपुर

पर्वत खण्डमा पर्ने मोदी गाउँपालिकाको नयाँपुल, तिलाहार, डिमुवा, कुश्मा नगरपालिकाको दोबिल्ला, चुवा, छमर्के, अर्मादी, नयाँपुल र मालढुंगा आसपासका घुम्तीमा सडक विस्तारको काम धमाधम अघि बढेको छ । लोकमार्गको पर्वत खण्डमा भएका अधिकांश साँघुरा घुम्तीलाई फराकिलो पारेर सवारी आवागमनमा सहज बनाउन लागिएको सडक आयोजना कार्यालयले जनाएको छ ।

पर्वत खण्डमा पर्ने घुम्ती र साँघुरा सडकलाई फराकिलो बनाउन सडकको डिलतर्फ पर्खाल लगाउने र कुनातर्फ भत्काउन आवश्यक मेसिन र जनशक्ति परिचालन गरिएको छ । चीन सरकारको सहयोगमा ०४७ सालमा पोखरा–बागलुङ राजमार्गको ट्रयाक खुलेको थियो । यो सडक उतिबेलै डबल लेनको बनाउने स्टिमेट थियो तर ठेकेदारले धेरैजसो स्थानमा सिंगल लेनको मात्रै बनाएका थिए ।

Yamaha

आयोजना कार्यालयले सडक चौडा पार्ने क्षेत्रमा आवश्यकताअनुसार आवागमन रोकेरै कामलाई तीव्रता दिएको छ । सडकको चुवा, दोबिल्ला, डिमुवा, नयाँपुल र गिरिचोकलगायत साँघुरो क्षेत्रमा डबल लेनको बनाउन साइड कटिङ गर्नुपरेकाले दैनिक ६ घण्टासम्म अवरुद्ध भएको एपेक्स कन्स्ट्रक्सनका प्रतिनिधि काँशीराज बोहोराले बताए । उनका अनुसार बिहान ७ देखि साँझ ५ बजेसम्म आवश्यकताअनुसार सडक अवरुद्ध हुँदैआएको छ ।

लोकमार्गको १ हजार ७ सय ७६ किलोमिटर लम्बाइमध्ये पश्चिमक्षेत्रमा पर्ने १ हजार ९५ किमिलाई पछिल्लो तीन वर्ष प्राथमिकतामा राखिएको आयोजनाको दाङस्थित पश्चिम क्षेत्रका प्रमुख सूर्य भाटले बताए । ‘पछिल्लो समय पश्चिम क्षेत्र हाम्रो प्राथमिकतामा छ,’ उनले भने, ‘त्यसमा पनि पोखरा–बागलुङ धार्मिक पर्यटक आउजाउ गर्ने व्यस्त सडक हो । यसलाई अरूभन्दा बढी चासो दिएर काम विस्तार गरेका छौं ।’ धार्मिक पर्यटकका कारण बढेको सवारीचापलाई मध्यनजर गर्दै यहाँको ६१ किमिमा बढी चासो दिइएको उनले बताए । मनसुनअघि नै साँघुरा मोडलाई फराकिलो पार्ने लक्ष्यअनुरूप काम अघि बढाइएको ठेकेदार कम्पनीले जनाएको छ ।

सडकको दुवैतर्फ नाली, ग्याभिन जाली, ‘रिटेनिङ वाल’ सहित कालोपत्रे पनि सँगसँगै हुने निर्माण कम्पनीले जनाएको छ । नयाँपुलदेखि पर्वतको मालढुंगासम्म पर्ने साँघुरो क्षेत्र प्राथमिकतामा राखिएको हो । ‘यो क्षेत्र तीन वर्षको लक्ष्य हो,’ आयोजना प्रमुख भाटले भने, ‘यही गतिमा काम भए दुई वर्षमै कम्प्लिट हुने अनुमान छ ।’ यसअघि सडक विभागको क्षेत्रीय र अञ्चल कार्यालयले मर्मतसम्हारको काम गर्दै आएकोमा गत वैशाखदेखि लोकमार्ग आयोजना कार्यालयले विस्तारसहित सडकका सबै जिम्मेवारी लिएको थियो ।

सडक फराकिलो पार्ने क्रममा घना बस्ती र सवारी चाप बढी हुँदा दैनिकजसो यात्री र सर्वसाधारणले समस्या भोग्दैआएका छन् । कुश्मा, चुवा र तिलाहार लगायतमा सडकमा जमेको हिलोले यात्रु र सर्वसाधारणलाई सास्ती भएको छ । घाम लाग्दा धूलो र पानी पर्दा हिलोले सास्ती भएको चुवाका विष्णु सुवेदीले बताए ।

प्रकाशित : भाद्र १, २०७५ ०९:१०
ADVERTISEMENT
प्रतिक्रिया
पठाउनुहोस्
ADVERTISEMENT

एक घर एक टनेल

अगन्धर तिवारी

पर्वत — सबै गाउँलेलाई आत्मनिर्भर बनाउन महाशिला गाउँपालिकाले एक घर एक टनेल कार्यक्रम सुरु गरेको छ । गाउँपालिकाले बजेट छुट्याएर कम्तीमा ५० प्रतिशत घरधुरीमा व्यावसायिक तरकारी खेती विस्तार गर्ने भएको हो । महाशिलामा करिब दुई हजार घरधुरी छन् ।

टनेलभित्र तरकारीमा थोपा सिँचाइ प्रविधि जडान गर्दै किसान । तस्बिर : अगन्धर । कान्तिपुर

गाउँपालिकाका अध्यक्ष राजु पौडेलले त्यसका लागि ३३ लाख रुपैयाँ बजेट विनियोजन गरिएको बताए । ‘सबै गाउँलेलाई आत्मनिर्भर बनाउने लक्ष्य लिएका छौं,’ उनले भने, ‘टनेल र बीउ गाउँपालिकाले दिनेछ, अरू संरचना किसानले आफैं बनाउनुपर्छ ।’ पहिलो चरणमा यसअघि नै मौसमी तथा बेमौसमी तरकारी खेतीमा लागेका किसानलाई प्राथमिकतामा राखिएको उनले बताए । किसानलाई वितरण गर्न महाशिलाले एक हजार प्लास्टिकका टनेल खरिद प्रक्रियासमेत थालिसकेको छ ।

गाउँपालिकाका प्रवक्ता जीवनविक्रम उचैठकुरीका अनुसार कृषि प्राविधिक र विज्ञका सुझावअनुसार कार्यक्रम सुरु गरिएको हो । गाउँसभाले किसानको व्यावसायिक समूह बनाउने निर्णयसमेत गरेको छ । एकै प्रकारको तरकारी उत्पादन गर्दा बजार पाउन समस्या हुने भएकाले किसान समूह गठन गरेर बालीमा चक्रीय प्रणाली अपनाइने उनले बताए ।

‘हरेक १० किसानको एउटा समूह हुन्छ,’ उनले भने, ‘एउटा समूहको टनेलमा टमाटर मात्रै लगाउनुपर्छ । अर्को समूहमा काँक्रा, अर्कोमा करेला ।’ हजार किसानका सय समूह बनाउने योजना गाउँपालिकाको छ । ती समूहमध्ये हरेकलाई गाउँपालिकाले छुट्टाछुट्टै बीउ वितरण गर्छ । स्थानीय बजारमा आवश्यक तरकारीको बिक्रीवितरण समूहले नै गर्छ । समूहलाई समस्या भए गाउँपालिकाले कृषि प्राविधिक र विज्ञको सल्लाहमा अन्यत्र पठाउन सहजीकरण गर्नेछ ।

गाउँपालिकाले अघिल्लो वर्ष एक घर, एक रोजगार कार्यक्रम लागू गरेको थियो । त्यसमध्ये ३ सय ७५ जनाले विकास स्वयंसेवक छनोट भई तालिम पाइसकेका छन् । स्वयंसेवकले हरेक महिना १५ दिन अनिवार्य गाउँपालिकाले खटाएको काम गर्नुपर्छ । बाँकी १५ दिन घरकै काममा व्यस्त गराउने गरी गाउँपालिकाले यस्तो योजना ल्याएको हो ।

यसबाट किसानले प्रतिवर्ष एक लाखदेखि १ लाख ३० हजार रुपैयाँसम्म आम्दानी गर्न सक्ने अनुमान छ । हाल वितरण गर्न थालिएको एक हजार टनेलमध्ये विकास स्वंयसेवक प्राथमिकतामा परेका छन् । गाउँपालिकाले कृषिमा विशेष कार्यक्रम ल्याउन अघिल्लो वर्ष नै निर्णय गरेको थियो । गाउँसभाले गरेका निर्णय कार्यान्वयन गर्ने क्रममा यस वर्ष व्यावसायिक खेतीलाई प्राथमिकतामा राखिएको प्रवक्ता ठकुरीले बताए । स्थानीय युवा किसान प्रकाश पौडेलले गाउँपालिकाको निर्णयबाट व्यावसायिक कृषि गर्न हौसला मिलेको बताए ।

प्रकाशित : श्रावण ३१, २०७५ ०७:२५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT