गुरुकुल विद्यालय अन्योलमा

कान्तिपुर संवाददाता

नवलपरासी — दुम्कौलीस्थित चौधरी उद्योगग्रामको शास्वतधामद्वारा सञ्चालित वैदिक कर्मकाण्ड गुरुकुल विद्यालयलाई जिल्ला शिक्षा समन्वय इकाईको परिपत्रले अन्योल भएको छ । गुरुकुल विद्यालयलाई ८ कक्षा बन्द गराउन इकाइबाट पत्र पठाइएको छ ।

दुम्कौलीस्थित शाश्वतधामद्वारा सञ्चालित वैदिक सनातन कर्मकाण्ड गुरुकुलका विद्यार्थी । तस्बिर : नारायण शर्मा

संस्कृतमा विद्यालयले ७ कक्षासम्म पढाउँदै आएको छ । कक्षा ८ पढाउन सुरु गरेको विद्यालयलाई इकाई प्रमुख कृष्णचन्द्र पोखरेलले पत्र पठाएका हुन् । गत पुस ३० मा ८ कक्षा सञ्चालनका लागि स्वीकृति माग गर्दै उक्त विद्यालयले इकाईमा निवेदन दिएको थियो । ‘अनुमतिका लागि तोकिएको समयमै गुरुकुलले सरकारी निकायमा लिखित पत्र दर्ता गराएको हो । अनुमति पाइएन, कक्षा नचलाउनु भन्ने पत्र आयो,’ गुरुकुलका प्राचार्य विष्णु घिमिरेले भने, ‘बन्द गर्नु भन्ने पत्रका कारण बैतडीदेखि ताप्लेजुङ सम्मका अभिभावक चिन्तित भएका छन् ।’

आफूहरूले सरकारले तोकेको म्यादभित्र पत्र पठाउँदा अनुमति नदिएर एक्कासि बन्द गर्नु र त्यसको जानकारी दिनु भन्ने पत्रले सबैलाई आतंकित र निराश बनाएको उनले बताए । इकाई प्रमुख पोखरेलले भने अनुमति दिन नमिल्ने भएकाले विद्यालयलाई पत्राचार गरिएको बताएका छन् । उनले भने, ‘अहिले अनुमति दिन नमिल्ने भएकाले कक्षा नचलाउनु भनिएको हो ।’

विद्यालयलाई कक्षाको अनुमति नदिनु अन्याय भएको वडा १३ का वडाध्यक्ष दिलबहादुर खत्रीले बताए । ‘यो देशकै सबैभन्दा सुविधासम्पन्न गुरुकुल हो, कक्षा बन्द गराउनु भन्ने आशयको पत्र दुराशययुक्त र पूर्वाग्रही छ,’ उनले भने । संस्कृत शिक्षा जोगाउनुपर्नेमा अनुमति नदिनु बेइमानी भएको उनले आरोप लगाए ।

प्रकाशित : भाद्र १०, २०७५ ०९:३८
प्रतिक्रिया
पठाउनुहोस्

शव भेटिन्छन्, पहिचान खुल्दैन

अगन्धर तिवारी

पर्वत — फलेवासमा गत असार २९ मा एक जनाको शव फेला पर्‍यो । अन्दाजी ४५/५० वर्षका पुरुषको फलेवास–६ देवीस्थानमा फेला परेको शवको अनुहार र शरीर फुलेको र कपाल झरिसकेको अवस्थामा थियो ।

प्रहरीले जिल्ला अस्पतालमा पठाएर पोस्टमार्टम गर्न लगायो । सनाखतका लागि कोही आउँछन् कि भनेर केही दिन शव अस्पतालमै राखियो ।

कोही नआएपछि फलेवास नगरपालिकाले शवको अन्तिम संस्कार गरायो । उनको अझैसम्म पहिचान खुलेको छैन । गत जेठ २५ मा मोदी गाउँपालिका–६ गिज्यानमा पनि एउटा लास फेला परेको थियो । केही दिनदेखि गाउँ वरपर डुल्दै गरेको देखिएका राजकुमार बस्नेत नाम र ठेगाना सोलुखुम्बुको सल्लेरी बताउने अन्दाजी ४० वर्षीय उनको पनि शव लिन कोही आएनन् । मृतकको ठेगानाका आधारमा पर्वत प्रहरीले सोलुखुम्बुको सम्बन्धित ठेगानामा खबर गरे पनि लासको दाबी गर्न आफन्त नआएपछि करिब दुई सातापछि मोदी गाउँपालिकाले दाहसंस्कार गर्‍यो ।

यस्ता प्रकृतिका बेवारिसे लास फेला परे पनि लामो समयसम्म आफन्तले दाबी गर्न नआउँदा पर्वत प्रहरी र स्थानीय तहलाई टाउको दुखाइ बन्ने गरेको छ । भेटिएका लास व्यवस्थित गरी राख्ने प्रविधि र स्थानको अभाव, आफन्तको बेवास्तालगायतका कारणले प्रहरीलाई यस्ता लासका कारण हैरानी छ । प्रहरीका अनुसार गएको दुई वर्षमा विभिन्न प्रकृतिका बेवारिसे लासको संख्या ११ पुगेको छ । तीमध्ये ६ पुरुष र ३ महिला थिए । दुईवटा लिंग पहिचान हुनै नसक्ने अवस्थामा भेटिएका थिए ।

लासको सनाखत नहुँदा मृत्युको कारणबारे बुझ्न पनि प्रहरीलाई समस्या पर्ने गरेको छ । ‘सबै मृत्यु कालगतिले नहुन पनि सक्छ,’ प्रहरी नायब उपरीक्षक भुवनेश्वर तिवारीले भने, ‘सनाखत भए मृत्युको कारण खोज्न सकिन्थ्यो । दुर्घटना वा अन्य कारण पत्ता नलाग्दा बेवारिसे लास बढ्न सक्छन् ।’ कतिपय बेवारिसे फेला परेका लास अन्त्येष्टि गरिसकेपछि आफन्त आउँछन् ।

आफन्त दाबी गर्दै आउनेहरू प्रहरीको मुचुल्का बाहेक अरू केही लिन सक्ने अवस्था नभएको तिवारीले बताए । ‘अन्त्येष्टिपछि आउनेले लासको कुनै वस्तु नपाउने अवस्था छ,’ उनले भने, ‘त्यो समस्याबाट मुक्त हुन समाधिस्थल बनाएर सुरक्षित राख्ने योजनामा छौं । स्थानीय तहसँग समन्वय भइरहेको छ ।’ लासको दाबी गर्न आफन्त नआए मृतक फेला परेको सम्बन्धित स्थानीय तहले नै अन्त्येष्टि गर्नुपर्ने कानुनी प्रावधान छ । कालीगण्डकी र मोदी किनारमा धेरैजसो यस्ता लास फेला परेको प्रहरीले जनाएको छ ।

स्थानीय तहले भने समाधिस्थल बनाउन कानूनी प्रावधान भए पनि उचित स्थानको अभावले तत्काल सम्भव नभएको जनाएका छन् । ‘कानुनत: हाम्रो सीमाभित्रका बेवारिसे लासको जिम्मेवारी हामीले लिनुपर्छ,’ मोदी गाउँपालिकाका अध्यक्ष प्रेम पौडेलले भने, ‘समाधिस्थल बनाउनेबारे बहस चलाइएकै छैन । बनाउनैपर्ने भए ठाउँ खोज्नुपर्छ ।’

बेवारिसे धेरै लास भेटिने कुश्मा नगरपालिकाले पनि छुट्टै समाधिस्थलबारे सोच बनाएको छैन । कुश्मा–५ अन्तर्गत पर्ने मोदीवेणी र गोपाङघाट पुरानो समयदेखि अन्त्येष्टिका घाट भएकाले अरू विकल्प नखोजिएको कुश्माका नगरप्रमुख रामचन्द्र जोशीले बताए । प्रहरीले बेवारिसे फेला परेका लासबारे ठेगाना खुलेसम्म सोही ठेगानामा खबर गर्दै आएको छ ।

प्रकाशित : भाद्र १०, २०७५ ०९:३६
पूरा पढ्नुहोस्
प्रतिक्रिया
पठाउनुहोस्