मोदीका बजारमा सडकबत्ती

डिमुवा, पातीचौर, अम्बोट र बेतेनीलगायतका बजार क्षेत्रमा सडकबत्ती जडान
सडकबत्ती जडान गरिएका क्षेत्रमा सीसीटीभी क्यामेरा राख्ने योजना
कान्तिपुर संवाददाता

पर्वत — मोदी गाउँपालिकाले मुख्य सडकका बजार क्षेत्रमा सडकबत्ती जोडेको छ । गाउँपालिका अध्यक्ष प्रेम पौडेलका अनुसार डिमुवा, पातीचौर, अम्बोट र बेतेनीलगायतका बजार क्षेत्रमा सडकबत्ती जडान गरिएको हो ।

मोदी गाउँपालिकाको डिमुवामा सडकबत्ती जडान गर्दै प्राविधिक । तस्बिर : कान्तिपुर

‘सुरक्षाका दृष्टिले जरुरी भन्दै गाउँ कार्यपालिकामा पेस भएको प्रस्ताव पारित गरेर भदौभित्र सडकबत्ती जडान गर्ने योजना नै थियो,’ उनले भने, ‘मध्यपहाडी लोकमार्गको एरियाका मुख्य बजारमा सडकबत्ती जडान गरेका हौं ।’ अब हरेक दिन रातभर पोलमा बत्ती बल्ने उनले बताए ।


५० वटा सडकबत्ती स्थानीय बजार व्यवस्थापन समितिबाट सहयोग लिएर जडान गरिएको मोदी ६ का वडाध्यक्ष तथा गाउँपालिकाका प्रवक्ता विमल लामिछानेले बताए । ‘अब राजमार्गमा बढी चाप हुने सिजन आयो,’ उनले भने, ‘चाडबाडमा बजारक्षेत्रमा पनि चहलपहल बढ्छ । चौबीसै घण्टा उज्यालो भएपछि सुरक्षा चिन्ता हुँदैन ।’ सडकबत्ती जडान गरिएका क्षेत्रमा सीसीटीभी क्यामेरा पनि राख्ने योजना छ ।

Yamaha

‘कतिपय स्थानमा पहिल्यै सीसी क्यामेरा थिए,’ गाउँपालिकाका प्रमुख प्रशासकीय अधिकृत कुमानसिंह गुरुङले भने, ‘बिग्रिएकालाई मर्मत गरेर नयाँ पनि थपिँदैछ ।’ अँध्यारोमा सीसी क्यामेराको भिडियोले काम नगर्ने भएकाले सडकबत्तीले सहज हुने उनले बताए । सडकबत्तीका लागि गाउँसभाले १ लाख ६० हजार रुपैयाँ विनियोजन गरेको थियो । बजारक्षेत्रमा बल्ने बत्तीका लागि विद्युत् स्थानीय मोदीखोला जलविद्युत्ले उपलब्ध गराउने गाउँपालिकासँग सम्झौता छ ।


सीसी क्यामेरा जडान गर्ने उपयुक्त स्थान छनोट र तिनको कन्ट्रोल रुम राख्ने भवन निर्माण पनि भइरहेको छ । सीसी क्यामेराको कन्ट्रोल कक्ष डिमुवा प्रहरी चौकीमा राखिने भएको छ ।

Esewa Pasal

प्रकाशित : भाद्र २९, २०७५ १०:४४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

टहरामै स्वास्थ्यचौकी

जनप्रतिनिधिको ध्यान नपुग्दा संवेदनशील क्षेत्र अझै टहराबाटै सञ्चालन
गाउँका घर र स्कुल बनाउन सरकारी तथा गैरसरकारी संस्था आए पनि स्वास्थ्यचौकी बनाइदिन कोही नआएको स्थानीयको गुनासो
कान्तिपुर संवाददाता

लमजुङ — विनासकारी भूकम्पको तीन वर्ष बित्यो । त्यसबेला भवन भत्किएको यहाँको दूधपोखरी गाउँपालिका १ कल्लाबारीस्थित दूधपोखरी स्वास्थ्यचौकी अझै टहरामै छ । गोरखासँग सीमा जोडिएको दूधपोखरी भूकम्पबाट लमजुङको सबैभन्दा बढी प्रभावित क्षेत्र हो ।

लमजुङको दूधपोखरी गाउँपालिका १ कल्लाबारीमा टहरा बनाएर सञ्चालन गरिएको दूधपोखरी स्वास्थ्यचौकी । तस्बिर : कान्तिपुर

सरकारी तथा गैरसरकारी निकाय साथै जनप्रतिनिधिको ध्यान नपुग्दा स्वास्थ्य संस्थाजस्तो संवेदनशील क्षेत्र अझै टहराबाटै सञ्चालनमा रहेको हो । टहराबाट सेवा दिन गाह्रो भइरहेको स्वास्थ्यकर्मीको गुनासो छ । स्थानीयका अनुसार भूकम्पपछिको पुनर्निर्माणका सरकार र गैससहरूको ध्यान निजी घर निर्माणमा मात्रै केन्द्रित रह्यो । जनप्रतिनिधिले पनि ध्यान नदिँदा स्वास्थ्य चौकी टहरामै सञ्चालन भइरहेको हो ।


टिनको टहरामा चारवटा कोठा छन् । तिनमा गर्भवती परीक्षण, बिरामी बस्ने ठाउँ, ओपीडी र स्टोर कोठा बनाइएको स्वास्थ्य सहायक दीपेश विश्वकर्माले बताए । ‘हामी ५ जना छौं, सबै ओपीडीमै हुन्छौं,’ उनले भने, ‘भुइँमा हिलो, धूलो छ, बिरामीको उपचार गर्न राम्ररी उभिन मिल्ने पनि ठाउँ छैन । सामान राख्ने ठाउँ उस्तै अप्ठ्यारो छ ।’ गर्भवतीका लागि राख्न छुट्टै सुरक्षित र सफा ठाउँ व्यवस्था गर्न नसकेको उनले बताए । ‘बिरामी भएर चौकी आउने बिरामी झन् बिरामी पर्लान् र हामी स्वास्थ्यकर्मीसमेत बिरामी पर्ने डर छ,’ उनले भने ।


स्वास्थ्यचौकीमा उनीसहित अनमी शेषमाया थापा र मातृशिशु कार्यकर्ता वाग्मती गुरुङ दरबन्दीका हुन् । गाउँपालिकाले मञ्जु गुरुङलाई अहेव करारमा खटाएको छ । एकजना कार्यालय सहयोगी छन् । ‘न कर्मचारी बस्ने ठाउँ, न बिरामी उपचार गर्ने ठाउँ । बिजोग छ,’ उनले भने ।


भूकम्पले साबिकको गाविस भवनसँगैको स्वास्थ्यचौकी पनि भत्किएको थियो । स्वास्थ्यचौकी व्यवस्थापन समितिका अध्यक्ष एवं दूधपोखरी १ का वडाध्यक्ष मानसिंह गुरुङका अनुसार गत आर्थिक वर्ष १ लाख रुपैयाँ बजेट विनियोजन गरी टहरा बनाएर स्वास्थ्य चौकी राखिएको हो । ‘गाउँपालिकाबाट विनियोजित ५ लाख रुपैयाँले डोजर लगाएर स्वास्थ्यचौकी भवन निर्माणका लागि जग्गा सम्याएका थियौं,’ उनले भने, ‘यो पटकको वर्षाले सबै ठाउँमा बाढीपहिरो चलाइदियो ।’


भवन निर्माणका लागि गाउँपालिकाले चालु वर्ष २० लाख बजेट विनियोजन गरेको उनले बताए । ‘मैले ३० लाख छुट्याइदिनु भनेको थिएँ । पैसा पुगेन भनेर २० लाख मात्रै परेको छ,’ उनले भने, ‘त्यसले कस्तो स्वास्थ्यचौकी बनाउने होला ।’ गाउँका घर र स्कुल बनाउन सरकारी तथा गैरसकारी संस्था आए पनि स्वास्थ्य चौकी बनाइदिन कोही नआएको उनको गुनासो छ ।


चौकीको नाममा करिब ४ रोपनी जग्गा छ । जग्गा प्राप्तिमा ढिलाइ भएकाले भवन निर्माण हुन नसकेको जिल्ला जनस्वास्थ्य अधिकृत केशवप्रसाद चापागाईंले बताए । उनले भने, ‘भवन बनाउन जग खनिएको छ । नबनेसम्म स्वास्थ्यचौकीलाई टहरामै राख्नुपर्ने बाध्यता छ ।’

प्रकाशित : भाद्र २९, २०७५ १०:४३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT