संघलाई तर्साउन खोजेको हैन : गुरुङ

गण्डकी प्रदेशसभामा आइतबार विशेष सम्बोधन गर्दै उनले भने, ‘संविधानमै भएका व्यवस्था लागू गर्न आनाकानी गर्दा प्रदेश सरकार कमजोर देखिएको छ । केही परिणाम नआउँदा प्रदेश सरकारको कामै रहेनछ भन्ने लाग्नु स्वाभाविकै हो । चाँडोभन्दा चाँडो यो व्यवस्थालाई कसरी सफल बनाउने र जनतालाई कसरी सुखसुविधा दिने, यसको औचित्य पुष्टि गर्नुपर्छ ।’

पोखरामा भएको मुख्यमन्त्री भेलाका निर्णयबारे उनले भने, ‘यो कसैप्रति घेराबन्दी होइन, आलोचना पनि होइन । संविधानमा भएका व्यवस्था कार्यान्वयन होस् मात्रै भनेका हौं ।’ उनले प्रदेश सरकार सफल पार्नका लागि, प्रदेश सरकारको गौरव बढाउनका लागि, गण्डकी प्रदेशको विकासको चाहना पूरा गर्नका लागि आफू फाँसीमा झुन्डिन पनि तयार रहेको बताए । सरकार सञ्चालन गर्दा भोगेका समस्या पहिचान गरी तिनको समाधानमा साझा धारणा बनाउन संवैधानिक व्यवस्थाअनुरूप नै मुख्यमन्त्रीको भेला बोलाएको उनले बताए । उक्त अवसरमा उनले प्रदेश सरकारले गरेका कार्यप्रगति पनि सदनमा सुनाएका थिए ।