शिक्षा सुधार्दै रूपा गाउँपालिका

दीपक परियार

लेखनाथ — एक कक्षामा १, दुई कक्षामा २ र तीन कक्षामा ३ विद्यार्थी । कतै दुई विद्यार्थीलाई ३ शिक्षक । कतै एक शिक्षकलाई ४ विषय । ग्रामीण भेगका सामुदायिक विद्यालयमा यस्तै हुन्छ । सामुदायिक विद्यालयको यही अवस्था सुधार्न कास्कीको रूपा गाउँपालिकाले नमूना कार्यक्रम लागू गरेको छ ।

रूपा गाउँपालिकाको देउरालीमा रहेको विश्वशान्ति माविमा जोडिएको दुई किलोवाट क्षमताको सोलार पावर ।तस्बिर : दीपक परियार/कान्तिपुर

गाउँपालिकामा १० माध्यमिकसहित ३४ विद्यालय छन् । रूपा आधारभूत शिक्षा सुनिश्चित गाउँपालिका घोषणा भइसकेको छ । ३९ औं राष्ट्रिय शिक्षा दिवस तथा ५२ औं अन्तर्राष्ट्रिय साक्षरता दिवसको अवसरमा भदौ २४ मा उक्त घोषणा गरिएको हो । ३४ वटै विद्यालयमा ५ कक्षासम्म अंग्रेजी माध्यममा पढाइ हुन्छ । गाउँपालिकाले प्रत्येक विद्यार्थीलाई अंग्रेजी माध्यमको एक/एक सेट किताब नि:शुल्क उपलब्ध गराएको छ ।

अंग्रेजी किताबका लेखकलाई गाउँपालिकामा बोलाएर शिक्षकलाई तालिम पनि प्रदान गरेको छ । वर्षमा तीनपल्ट दिइने त्यस्तो तालिम दुईपल्ट भइसकेको छ । गाउँपालिका अध्यक्ष नवराज ओझाले विज्ञान, गणित, अंग्रेजी र सामाजिक विषयका किताब लेखकले तालिम दिएको बताए । उनका अनुसार तालिमले शिक्षकको क्षमता अभिवृद्धिमा मद्धत पुग्छ ।

गाउँपालिकाले १० वटै माविमा शिक्षक र कर्मचारीलाई विद्युतीय हाजिरीको व्यवस्था गरेको छ । क्रमिक रूपमा सबै विद्यालयमा विद्युतीय हाजिरी पुर्‍याउने गाउँपालिकाको लक्ष्य छ । पाठय योजनासहितको शिक्षक डायरी गाउँपालिकाले तयार गरेको छ । गाउँपालिकाभित्रका सबै विद्यालयमा एउटै पाठयक्रम र कार्यक्रमसहितको शैक्षिक क्यालेन्डर लागू भएको छ । गाउँपालिकाकै सहयोगमा प्रत्येक विद्यालयका छात्रालाई नि:शुल्क सेनिटरी प्याड वितरण हुँदै आएको छ । शिक्षिकालाई समेत सेनिटरी प्याड नि:शुल्क वितरण हुन्छ । ‘छात्रा महिनावारी हुँदा विद्यालय नआउने समस्या देखेपछि सेनिटरी प्याड बाँड्न थाल्यौं,’ गाउँपालिका अध्यक्ष भन्छन्, ‘यसले छात्राको हाजिरी बढाएको छ ।’

गाउँपालिकाका १० वटै माविमा दुई/दुई किलोवाट क्षमताको सोलार पावर जडान गरिएको छ । वैकल्पिक ऊर्जा प्रवद्र्धन केन्द्रको सहयोगमा प्रत्येकमा ४ लाख ७० हजार रुपैयाँ बराबरको सोलार जडान गाउँपालिकाले गरेको हो । उक्त सोलारबाट कम्प्युटर, प्रिन्टर चलाउन, बत्ती बाल्न पर्याप्त रहेको गाउँपालिका अध्यक्ष ओझाले बताए । गत आर्थिक वर्षमा शिक्षामा ५७ लाख रुपैयाँ विनियोजन गरेको गाउँपालिकाले चालु आर्थिक वर्षमा १ करोड रुपैयाँ छुटयाएको छ ।

प्राथमिकतामा प्राविधिक शिक्षा
एसईईपछि विद्यार्थीले गाउँ छाड्ने क्रम बढेपछि गाउँपालिकाले प्राविधिक शिक्षाको योजना ल्याएको छ । जसअन्तर्गत तीन विद्यालयले प्राविधिक शिक्षाको अनुमति लिएर कक्षा सञ्चालनको तयारीमा छन् । विद्यालयले प्राविधिक शिक्षा तथा व्यावसायिक तालिम परिषद् (सीटीईभीटी) बाट सम्बन्धन लिएर पढाइ सुरु गर्न लागेका हुन् ।

देउरालीको विश्वशान्ति माविमा सिभिल इन्जिनियरिङको तीन वर्षे डिप्लोमा कोर्स सुरु भएको छ । सीटीईभीटीको प्रवेश परीक्षामाफर्त छनोट भएका २० विद्यार्थीको भर्ना विद्यालयले लिइसकेको छ । यही असोज ७ देखि कक्षा सञ्चालन भएको विद्यालयका प्रधानाध्यापक वसन्त पहारीले बताए ।

‘इन्जिनियरिङलाई आवश्यक भवन, ल्याबलगायत भौतिक संरचना तयार गरिसकेका छौं,’ उनले भने । खाल्डेको गाउँफर्क माविमा पशुविज्ञान र रामकोट माविमा बालीविज्ञानको पढाइ हुन लागेको छ । दुवै कोर्स १८ महिने हुन् । पशुविज्ञान र बालीविज्ञानमा प्रवेश परीक्षामार्फत २०/२० विद्यार्थी छनोट भएका छन् । गाउँपालिकाले प्राविधिक शिक्षालय स्थापना गर्ने लक्ष्यसहित बजेटमार्फत २४ लाख रुपैयाँ विनियोजन गरेको थियो ।

Yamaha

प्रकाशित : आश्विन २५, २०७५ ०९:२४
ADVERTISEMENT
प्रतिक्रिया
पठाउनुहोस्
ADVERTISEMENT

नवदुर्गा महोत्सव सुरु

कान्तिपुर संवाददाता

कास्की — पोखराको विन्ध्यवासिनी मन्दिरमा बडा दसैंको अवसरमा नवदुर्गा महोत्सव सुरु भएको छ  । बुधबार नगर परिक्रमा र्‍यालीपछि सुरु भएको महोत्सव नवमीसम्म विन्ध्यवासिनी धार्मिक क्षेत्र विकास समिति सचिव तीर्थ श्रेष्ठले बताए  ।

सिंगारेर चिटिक्क पारिएको बागलुङस्थित कालिका भगवती मन्दिर र पूजाका लागि आएका भक्तजनको भीड ।तस्बिर : कान्तिपुर

महोत्सवअघि आयोजित भगवती शोभायात्रामा उल्लेख्य संख्यामा नगरवासी सहभागी भएका छन् । देवीका नौ रूपको स्वरूप नौ कन्याका नौ रथ, मन्दिरको प्रतिकात्मक स्वरूप सजिएको झाँकी, १ सय ८ कलश, भजन समूह र विभिन्न जातजातिका वेशभूषासहितको सांस्कृतिक झाँकी र्‍यालीमा थियो । र्‍यालीमा नेपाली सेना, प्रहरी, सशस्त्र प्रहरी, स्काउट, आमा समूह, धार्मिक, सामाजिक र शैक्षिक संघसंस्थाहरूको सहभागिता थियो । शोभायात्राले मोहरियाटोल, भैरवटोल र महेन्द्रपुललगायत बजारका विभिन्न भागको परिक्रमा गरेको थियो । महोत्सवको उद्घाटन गण्डकीका मुख्यमन्त्री पृथ्वीसुब्बा गुरुङले गरेका थिए ।

आन्तरिक तथा बाह्य धार्मिक पर्यटन प्रवद्र्धनका लागि विगत ११ वर्षदेखि महोत्सव हुँदै आएको समिति अध्यक्ष गणेशबहादुर श्रेष्ठले बताए । तीन सय वर्षको इतिहास बोकेको मन्दिरमा स्याङ्जा, तनहुँ, लमजुङ र गोरखा लगायतका जिल्ला र छिमेकी राष्ट्र भारतबाट समेत धेरै भक्तजन दर्शनका लागि आउने गरेका छन् ।

बागलुङ कालिकामा भीड
बागलुङ (कास)– घटस्थापनाको दिन बागलुङ भगवती मन्दिरमा सयौं भक्तजनको भीड लागेको छ । बिहान ४ बजेदेखि लामबद्ध भएर पूजा गर्नेको भीड दिउँसो १२ बजेसम्म लागेको थियो । कालिकाप्रति विश्वास भएकाले भक्तजनहरू आउने गरेका हुन् । सोह्र श्राद्धमा मुक्तिनाथ गएका अधिकांश भक्तजनसमेत घटस्थापनाको दिन मन्दिरमा पूजा गर्न आएका थिए । ‘टाढाबाट आएकाले कालिकाको पूजा पनि गरेर जाऔं भनेर एक दिन यतै बसियो’ चितवनका हरि कोइरालाले भने, ‘छिमेकीहरूले पनि कालिकाको शक्तिबारे गुणगान गाएकाले आएको हुँ ।’ समय–समयमा छिमेकीहरू कालिका मन्दिर आएकाले आफू पनि आएको उनले बताए ।

पूजा र बलि व्यवस्थापन गर्दै सरसफाइ गरिएकाले कालिका मन्दिर चिटिक्क देखिएको थियो । घटस्थापनादेखि सुरु हुने विशेष पूजा कोजाग्रत पूर्णिमासम्म चल्ने कालिका भगवती गुठी व्यवस्थापन समितिका अध्यक्ष राजु खड्काले बताए । राजमार्गबाट ७ सय मिटरभित्र जंगलमा रहेकाले भक्तजनले मन्दिर पुग्दा पनि आनन्द अनुभव गर्छन् । गुठीले पञ्चवर्षे योजनासहित गुरुयोजना बनाएर काम गरिरहेकाले केही वर्षदेखि मन्दिर आउने भक्तजन बढिरहेका छन् । खानेपानी, सार्वजनिक टेलिफोन, सुरक्षाकर्मीलगायतको व्यवस्थापनले भक्तजनले सुरक्षित महसुस गरेको मन्दिर आएकी गीता थापाले बताइन् ।

घटस्थापनाकै दिन पारेर बागलुङ नगरपालिका ९ तित्याङमा पुनर्निर्माण गरिएको मनकामना मन्दिर उद्घाटन गरिएको छ । नगरप्रमुख जनकराज पौडेलले मन्दिर उद्घाटन गरे । नगरपालिकाको ४ लाख रुपैयाँ खर्चेर मन्दिर पुननिर्माण गरिएको हो ।

प्रकाशित : आश्विन २५, २०७५ ०९:२३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT