नवदुर्गा महोत्सव सुरु

कान्तिपुर संवाददाता

कास्की — पोखराको विन्ध्यवासिनी मन्दिरमा बडा दसैंको अवसरमा नवदुर्गा महोत्सव सुरु भएको छ  । बुधबार नगर परिक्रमा र्‍यालीपछि सुरु भएको महोत्सव नवमीसम्म विन्ध्यवासिनी धार्मिक क्षेत्र विकास समिति सचिव तीर्थ श्रेष्ठले बताए  ।

सिंगारेर चिटिक्क पारिएको बागलुङस्थित कालिका भगवती मन्दिर र पूजाका लागि आएका भक्तजनको भीड ।तस्बिर : कान्तिपुर

महोत्सवअघि आयोजित भगवती शोभायात्रामा उल्लेख्य संख्यामा नगरवासी सहभागी भएका छन् । देवीका नौ रूपको स्वरूप नौ कन्याका नौ रथ, मन्दिरको प्रतिकात्मक स्वरूप सजिएको झाँकी, १ सय ८ कलश, भजन समूह र विभिन्न जातजातिका वेशभूषासहितको सांस्कृतिक झाँकी र्‍यालीमा थियो । र्‍यालीमा नेपाली सेना, प्रहरी, सशस्त्र प्रहरी, स्काउट, आमा समूह, धार्मिक, सामाजिक र शैक्षिक संघसंस्थाहरूको सहभागिता थियो । शोभायात्राले मोहरियाटोल, भैरवटोल र महेन्द्रपुललगायत बजारका विभिन्न भागको परिक्रमा गरेको थियो । महोत्सवको उद्घाटन गण्डकीका मुख्यमन्त्री पृथ्वीसुब्बा गुरुङले गरेका थिए ।

आन्तरिक तथा बाह्य धार्मिक पर्यटन प्रवद्र्धनका लागि विगत ११ वर्षदेखि महोत्सव हुँदै आएको समिति अध्यक्ष गणेशबहादुर श्रेष्ठले बताए । तीन सय वर्षको इतिहास बोकेको मन्दिरमा स्याङ्जा, तनहुँ, लमजुङ र गोरखा लगायतका जिल्ला र छिमेकी राष्ट्र भारतबाट समेत धेरै भक्तजन दर्शनका लागि आउने गरेका छन् ।

बागलुङ कालिकामा भीड
बागलुङ (कास)– घटस्थापनाको दिन बागलुङ भगवती मन्दिरमा सयौं भक्तजनको भीड लागेको छ । बिहान ४ बजेदेखि लामबद्ध भएर पूजा गर्नेको भीड दिउँसो १२ बजेसम्म लागेको थियो । कालिकाप्रति विश्वास भएकाले भक्तजनहरू आउने गरेका हुन् । सोह्र श्राद्धमा मुक्तिनाथ गएका अधिकांश भक्तजनसमेत घटस्थापनाको दिन मन्दिरमा पूजा गर्न आएका थिए । ‘टाढाबाट आएकाले कालिकाको पूजा पनि गरेर जाऔं भनेर एक दिन यतै बसियो’ चितवनका हरि कोइरालाले भने, ‘छिमेकीहरूले पनि कालिकाको शक्तिबारे गुणगान गाएकाले आएको हुँ ।’ समय–समयमा छिमेकीहरू कालिका मन्दिर आएकाले आफू पनि आएको उनले बताए ।

पूजा र बलि व्यवस्थापन गर्दै सरसफाइ गरिएकाले कालिका मन्दिर चिटिक्क देखिएको थियो । घटस्थापनादेखि सुरु हुने विशेष पूजा कोजाग्रत पूर्णिमासम्म चल्ने कालिका भगवती गुठी व्यवस्थापन समितिका अध्यक्ष राजु खड्काले बताए । राजमार्गबाट ७ सय मिटरभित्र जंगलमा रहेकाले भक्तजनले मन्दिर पुग्दा पनि आनन्द अनुभव गर्छन् । गुठीले पञ्चवर्षे योजनासहित गुरुयोजना बनाएर काम गरिरहेकाले केही वर्षदेखि मन्दिर आउने भक्तजन बढिरहेका छन् । खानेपानी, सार्वजनिक टेलिफोन, सुरक्षाकर्मीलगायतको व्यवस्थापनले भक्तजनले सुरक्षित महसुस गरेको मन्दिर आएकी गीता थापाले बताइन् ।

घटस्थापनाकै दिन पारेर बागलुङ नगरपालिका ९ तित्याङमा पुनर्निर्माण गरिएको मनकामना मन्दिर उद्घाटन गरिएको छ । नगरप्रमुख जनकराज पौडेलले मन्दिर उद्घाटन गरे । नगरपालिकाको ४ लाख रुपैयाँ खर्चेर मन्दिर पुननिर्माण गरिएको हो ।

Yamaha

प्रकाशित : आश्विन २५, २०७५ ०९:२३
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

मुडिकुवा–झकलाक सडक कालोपत्रे सुरु

कान्तिपुर संवाददाता

पर्वत — फलेवास नगरपालिकाको मुडिकुवा–झकलाक सडकको कालोपत्रे काम सुरु भएको छ  । नगरप्रमुख पदमपाणि शर्माका अनुसार ठेकेदार कम्पनीले अघिल्लो सातादेखि काम सुरु गरेको हो  ।

पर्वतको फलेवास नगरपालिकास्थित मुडिकुवा–झकलाक सडक ।तस्बिर : अगन्धर तिवारी/कान्तिपुर

पटक–पटकको दबाबका बीच काम छोडदै सम्पर्कमा आउँदै गरेका ओएसिस इन्जिनियरिङ एन्ड बिल्डर्स कम्पनीका ठेकेदारले काम थालेका हुन् । गत असारभित्रै काम सक्ने सम्झौता भए पनि सम्पर्कमा आउन आनाकानी गरेपछि फलेवासका नगर प्रमुखसहितको टोलीले ठेकेदार अच्यूत पाण्डेलाई १० असोजमा स्थानीय विकास मन्त्रालयको स्थानीय पूर्वाधार विकास तथा कृषि सडक आयोजना (डोलिडार) कार्यालयमै डाकेर काम छिटो सक्न दबाब दिएका थिए ।

‘वर्षाले बिग्रिएको काम मर्मत गर्ने र गिट्टी ओसार्ने काम गर्दैछ,’ शर्माले भने, ‘अब मंसिरभित्र काम सक्न दबाब दिएका छौं ।’ सम्झौताअनुसार ७ किलोमिटर सडकको ३.७५ मिटर चौडा कालोपत्रे गर्नुपर्ने छ । नगरपालिकाले अघिल्लो वर्ष सडकको नयाँ मापदण्ड बनाएअनुसार उक्त सडकको चौडा कम हुने भएपछि नगरपालिकाले ४ मिटर चौडा कालोपत्रे गर्न डोलिडारलाई आग्रह गरेको नगरप्रमुख शर्माले जानकारी दिए ।

दोस्रो पटक सम्झौता मिति थपिएको करिब ३ महिनापछि काम सुरु गरको ठेकेदार कम्पनीलाई भने अब काम सकेपछि मात्रै भुक्तानी दिइने भएको छ । यसअघि तत्कालीन जिल्ला प्राविधिक कार्यालयबाट कामको प्राविधिक मूल्यांकन र भुक्तानी हुँदै आएकोमा १० असोजमा डोलिडार कार्यालयमा भएको छलफलपछि जिल्लास्थित ग्रामीण सडक सञ्जाल सुधार आयोजना कार्यालय र नगरपालिकाले समन्वय गर्ने छलफल भएको हो । डोलिडार प्रमुख रामचन्द्र श्रेष्ठको रोहरवरमा भएको छलफलमा कामको प्राविधिक निरीक्षण तथा भुक्तानीमा नगरपालिकाले समन्वय र सहयोग गर्ने निर्णय भएको थियो । निर्णयअनुसार ठेकेदार कम्पनीले काम सकेपछि मात्रै भुक्तानी पाउनेछ ।

कालोपत्रेको सबै काम मंसिर मसान्तसम्म सक्ने र ठेकेदारलाई बाँकी रकम भुक्तानी गर्नका लागि बजेट व्यवस्था गर्ने निर्णय भएको तत्कालीन जिल्ला इन्जिनियर एवं ग्रामीण सडक सञ्जाल सुधार आयोजना कार्यायका प्रमुख जगदीश शर्माले बताए । ‘धेरैजसो काम सकिएको छ,’ शर्माले भने, ‘गिटी बिछ्याउने र कालोपत्रे गर्ने २० प्रतिशत काम बाँकी हो । मंसिरभित्र सक्नेगरी सम्झौता भएको छ । अब काम सकेपछि मात्रै भुक्तानी दिने हो ।

दोस्रो पटक थप भएको मितिअनुसार गत असार २० सम्ममा सडक निर्माण सक्नुपर्ने थियो । प्राविधिकका अनुसार ठेकेदारले गरेको काममध्ये १ करोड रुपैयाँ भुक्तानी गर्न बाँकी छ । चालु आर्थिक वर्षमा बाँकी काम सम्पन्न गर्न आवश्यक पर्ने ४ करोड रुपैयाँ रकम बजेटमा व्यवस्था भएको छैन । निर्माण कम्पनीलाई अहिलेसम्म ८ करोड १८ लाख रुपैयाँ भुक्तानी भएको छ । फलेवास नगरपालिकासहित महाशिला, बिहादी र पैयुँ गाउँपालिका जोड्ने मुख्य सडकको ७ किमि खण्ड कालोपत्रे गर्न ०७२ माघमा चितवनस्थित ओएसिस इन्जिनियरिङ एन्ड बिल्डर्स कम्पनीले ठेक्का सम्झौता गरेको थियो । पछिल्लो कामको विवरणबारे जानकारी माग गर्दा कम्पनी सञ्चालक अच्यूत पाण्डेले जानकारी दिन मानेनन् ।

स्थानीय विकास मन्त्रालयको ग्रामीण पुनर्निर्माण तथा पुन:स्र्थापना आयोजना (आरआरआरएसडीपी) को १२ करोड रुपैयाँ लगानीमा ६.७५ किलोमिटर सडकको काम ०७२ माघमा सम्झौता भई ०७४ असार २० मा सक्नुपथ्र्यो । ओएसिस कम्पनीले जिम्मा लिएको काम बीचैमा छाडेर ठेकेदार लामो समय सम्पर्कविहीन भएका थिए । बीचैमा काम छाडेर बेखबर भएका ठेकेदार पाण्डे स्थानीयवासी र सरोकारवालाको दबाबपछि झन्डै एक वर्षपछि काममा फर्किएका थिए ।

प्रकाशित : आश्विन २५, २०७५ ०९:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT