भूस पोल्ने मेला

पाल्पाको अर्गलीबाट आएको हुनाले ताराखोला २ को बस्तीको नाम पनि अर्गल रहेको जनविश्वास छ । अर्गली मगर समुदायका सदस्यले घामको झुल्कोसँगै विधिवत् प्रकृति पूजापछि भूस पोल्न सुरु गर्छन् । पर्वका रूपमा गरिने यो मेलामै वर्षभरी निधन भएकाहरूको सम्झनामा श्राद्ध गर्ने गरिन्छ । यो पूजापछि हिउँदे अन्नबाली लगाउने समय सुरु भएको विश्वास गरिन्छ ।

अर्गली पूजा र भूस पोलेपछि धान काट्ने समय सुरु हुने गाउँपालिका अध्यक्ष प्रकाश घर्तीले बताए । भूस पोल्ने र खेतबारी खन्ने काममा तन्नेरीहरू हानथाप गर्छन् । पर्व मनाउन गाउँभरिका बासिन्दा सहभागी हुन्छन् । खेतबारी खनेर भूस पोलेपछि सबै मिलेर गाउने र नाच्ने पनि गरिन्छ ।