पर्यटक तान्दै गोरखा संग्रहालय

कान्तिपुर संवाददाता

गोरखा — गोरखा संग्रहालय परिसरमा आइपुगेर खिचेका फोटा इमेल वा सामाजिक सञ्जालमा पोष्ट गर्न अब आगन्तुकले आफ्नो शुल्कले मोबाइल डाटा चलाउनु पर्दैन । यहाँ सोमबारदेखि नि:शुल्क वाईफाई सेवा सुरु भएको छ । 

गोरखा नगरपालिका–६ स्थित गोरखा दरबार संग्रहालय ।तस्बिर : हरिराम उप्रेती/कान्तिपुर

गोरखा नगरपालिकाको नगरपरिषद्बाट स्वीकृत योजना तथा बजेटले यहाँका सात ठाउँमा फ्रि वाईफाई सेवा सुरु हुन लागेको हो । योजनाअन्तर्गत नगरपालिकाले पर्यटकको चाप भइरहने संग्राहालयबाट सेवा सुरु गरेको छ ।

Yamaha

आन्तरिक तथा वाह्य पर्यटकलाई लक्षित गरी पश्चिमकाली, गोरखा दरबार, चिल्ड्रेन पार्क, भीमसेन पार्क, पुरानो बसपार्क र लोकतान्त्रिक चोकमा पुसभित्रै वाईफाई जडान गरिने नगरपालिकाका सूचनाप्रविधि अधिकृत सुयोगरमण खनालले बताए । ‘नगर परिषद्बाट चालु वर्ष ७ लाख रुपैयाँको बजेट स्वीकृत भएको छ,’ उनले भने, ‘प्रविधिमैत्री नगर बनाउन वाईफाई जडानगरेका हौं ।’

इन्टरनेट प्रदायक संस्था सुविसुसँगको सहकार्यमा ५० एमबीपीएस क्षमताको इन्टरनेट उपलब्ध गराउने उनले बताए । वाईफाई जडान भएसँगै पर्यटकलाई सजिलो हुने योजनाको अपेक्षा हो । ‘वाईफाई कनेक्ट गर्नुभन्दा पहिले एउटा पेज खुल्छ । त्यहाँ नगरपालिकाको सामान्य परिचय र गतिविधि देख्न मिल्ने बनाउन लागेका छौं । त्यहाँ ओके गरेपछि मात्र नेट चल्ने भयो,’ अधिकृत खनालले भने, ‘यसो हँुदा नगर क्षेत्रको प्रचारप्रसार पनि हुने भयो ।’

एक ठाउँमा जडान भएको डिभाइसबाट करिब चार सय जनाले एकैसाथ इन्टरनेट चलाउन सक्ने उनले बताए । ‘पर डिभाइस सयवटा कनेक्सन हुन्छन्, सय मिटर रेन्जमा डिभाइसले नै काम गर्ने भयो । त्यहाँबाट नटिप्ने ठाउँमा आवश्यकता अनुसार रिपिटर राखेर तीन/चार सय जनाले एकैचोटि कनेक्ट गर्न मिल्ने बनाउँछौं,’ उनले भने ।

चालु आर्थिक वर्ष सात ठाउँका वाईफाई जडान गर्ने र आगामी वर्षदेखि आवश्यकताअनुसार अन्य ठाउँमा पनि नि:शुल्क इन्टरनेटको सेवा विस्तार गर्ने योजना नगरपालिकाको छ । नि:शुल्क वाईफाई सेवा सुरु भएसँगै पर्यटक आवागमन पनि वृद्घि हुने गोरखा संग्रहालयका प्रमुख नवराज अधिकारीले बताए । ‘संग्रहालय आएका पर्यटकले यहीं भित्रबाट फोटो पोस्ट गर्न सक्ने भए,’ उनले भने, ‘यसो हँुदा पर्यटकीय स्थलको प्रचारप्रसार छिटो र सजिलोगरी हुने नै भयो ।’

नगर क्षेत्रमा सीसी क्यामेरा
गोरखा नगरपालिकाको मुख्य बजार क्षेत्रमा सीसी टीभी क्यामेरा जडान गरिएको छ । सामुदायिक सेवा केन्द्रको संयोजनमा गोरखा नगरपालिकासहित वित्तीय, टोल विकास र विभिन्न संघ संस्थाको आर्थिक सहयोगमा ३९ वटा क्यामेरा जडान गरिएिको हो ।

यसकालागि २६ लाख ७७ हजार खर्च भएको सामुदायिक सेवा केन्द्रले जनाएको छ ।

योजनाका लागि गोरखा नगरपालिकाले मात्र १८ लाख रुपैयाँ उपलब्ध गराएको छ । नयाँ बसपार्क, ठूलोआँगन, पाटेचौर, गोरखा अस्पताल र लोकतान्त्रिक चोकलगायतका मुख्य क्षेत्रमा क्यामेरा जडान भएको केन्द्रका उपाध्यक्ष कैलाशबाबु श्रेष्ठले बताए । जिल्लाभरको सुरक्षा चुनौती विश्लेषण गर्दा गोरखा नगरमा बढी चुनौती देखिएको सुरक्षा प्रमुखहरूले बताउँदै आएका थिए ।

बजार क्षेत्रमा हुने आपराधिक घटना न्यूनीकरणका लागि सीसी क्यामेरा सहयोगी हुने नगरप्रमुख राजनराज पन्तले बताए । यसको व्यवस्थापन चुनैतीपूर्ण रहेको भन्दै यसको सुरक्षा र व्यवस्थापनमा टोलवासीले जिम्मेवार बन्नुपर्ने सरोकारवालाले बताएका छन् ।

बसपार्कमा आइल्यान्ड
गोरखा नगरपालिकाको वातावरण तथा पर्यटन विकास कार्यक्रमअन्तर्गत पुरानो बसपार्कमा आइल्यान्ड निर्माण गरिएको छ ।

नगरपालिकाले ११ लाख ७० हजार लागतमा पानीको फोहरासहितको आइल्यान्ड निर्माण गरेको हो । फूलका गमला, पानीका फोहरा र बत्तीसहितको आइल्यान्डले बसपार्कको आकर्षण बढेको छ ।

प्रकाशित : मंसिर २०, २०७५ ११:३२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

माथिल्लो दोर्दी ‘ए’ जलविद्युत् : चैतदेखि परीक्षण उत्पादन

२५ मेगावाटको आयोजनाको ८५ प्रतिशत काम सकियो
कान्तिपुर संवाददाता

लमजुङ — दोर्दी खोलामा निर्माणाधीन २५ मेगावाटको माथिल्लो दोर्दी ‘ए’ जलविद्युत् आयोजनाले आगामी चैतमा परीक्षण उत्पादन थाल्नेगरी कामलाई तीव्रता दिएको छ ।

लमजुङको दोर्दीखोलामा २५ मेगावाटको माथिल्लो दोर्दी ‘ए’ जलविद्युत् आयोजनाको विद्युत् उत्पादनका लागि पानी ल्याउन निर्माण गरिएको सुरुङ ।तस्बिर : आश गुरुङ/कान्तिपुर

दोर्दी गाउँपालिका ६ ढोडेनी र ७ फलेनीबीचको दोर्दीखोलामा बन्दै गरेको जलविद्युत्को निर्माण कार्य ८५ प्रतिशत सकिएको आयोजनाले जनाएको छ ।

२ हजार ६ सय २३ मिटर लम्बाइको सुरुङ निर्माण भइकेको छ । सुरुङको निर्माण कार्य वाइबा इन्फ्राटेक प्रालिले गरेको हो । २ हजार ८ सय ५४ मिटर लामो पेनस्टक पाइपको जडान कार्य सकिएको छ ।

पेनस्टकको सिभिल र हाइड्रोमेकानिकलको काम माछापुच्छ्रे जेभीले गर्दै आाएको छ । आयोजनाका अनुसार हेडवक्र्स र विद्युत् गृहको निर्माणकार्य करिब ७० प्रतिशत सकिएको छ । हेडवक्र्स र पावरहाउस वज्रगुरु कन्स्ट्रक्सन प्रालिले गरिरहेको छ ।

दोर्दी गाउँपालिकाको ढोडेनी तल्लो सिमीस्थित लोंदोखोला दोभानमा बाँध बाँधेर कीर्तिपुरबेंसी नजिकै मालेबगरमा निर्मित विद्युत् गृहमा पानी खसालेर विद्युत् उत्पादन गरिनेछ । नदीको बहावमा आधारित (रन अफ रिभर) को उक्त आयोजनाको अन्डरग्राउड (भूमिगत) विद्युत् गृह हुनेछ ।

उक्त विद्युत् गृहमा १२ दशमलव ५ मेगावाटका २ वटा पेल्टन टर्बाइन रहनेछन् । आयोजनाको प्रवद्र्धक लिबर्टी इनर्जी कम्पनी लिमिटेडका अध्यक्ष कुशकुमार जोशीका अनुसार आगामी जनवरी १४ (माघ महिना) भित्र विद्युत् निर्माणका ‘मेजर’ कार्य सक्ने कार्यतालिका छ ।

फागुनसम्म सम्पूर्ण संरचना निर्माण तथा उपकरण जडान गर्नेछ । चैत महिनाभित्र विद्युत् उत्पादन गरिने उनले बताए । ‘निर्माणकार्य ८५ प्रतिशतभन्दा बढी सकियो । हामी तोकिएको समयमै काम पूरा गर्छौं,’ उनले भने । नेपाल विद्युत् प्राधिकरणका निर्देशक कुलमान घिसिङले उत्पादित विद्युत् १ मेगावाट पनि खेर जान दिन्नाैं भनेकाले विद्युत् खेर नजानेमा आशावादी रहेको उनले बताए ।

दोर्दी करिडोरमा निर्माणाधीन १३२ केभीको राष्ट्रिय प्रसारण लाइन निर्माणकार्य देखिने गरी अघि नबढेको भन्दै उनले छिटो निर्माण गर्न आग्रह गरे । ‘ट्रान्समिसन लाइन निर्माण गर्न सरकार जिम्मेवार बन्नुपर्छ । कतिपय आयोजनाको विद्युत् यतिकै खेर गइरहेको छ । यो नियति हामीले व्यहोर्नु नपरोस्,’ नेपाल उद्योग वाणिज्य महासंघका पूर्वअध्यक्षसमेत रहेका जोशीले भने ।

प्रदेश सांसद धनञ्जय दवाडीले लमजुङ लगानीमैत्री जिल्ला भएकाले ढुक्क भएर लगानी गर्न निजी क्षेत्रलाई आग्रह गरे । ‘निर्माणका क्रममा देखिएका समस्या समाधान गर्न राजनीतिक दल, स्थानीय सरकार र प्रशासनको पूर्ण सहयोग छ,’ उनले भने । जलविद्युत्बाट आर्थिक समृद्धिको परिकल्पना गण्डकी प्रदेशले गरेको भन्दै जलविद्युत्को समुचित विकास हुनुपर्ने औंल्याए ।

‘गण्डकी प्रदेशले उज्यालो प्रदेश घोषणा गरिसकेको छ । सरकारी घोषणालाई सबै मिलेर कार्यान्वयन गरौं,’ उनले भने ।आयोजनाका प्रबन्ध निर्देशक आत्माराम घिमिरेका अनुसार नेपाल इन्भेस्टमेन्ट बैंकको अगुवाइमा ९ वटा बैंकले आयोजनामा ऋण लगानी गरेका छन् ।

प्रकाशित : मंसिर २०, २०७५ ११:३१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT