राजमार्ग अझै साँघुरो

बागलुङदेखि गलकोट हुँदै बुर्तिबाङ जाने खण्डमा १० मिटरभन्दा कम दूरीमा समेत घर बन्दै 
प्रकाश बराल

बागलुङ — पोखरा–बागलुङ सडक खण्ड राष्ट्रिय गौरवको मध्यपहाडी लोकमार्गमा पनि सूचीकृत छ । अहिले यहाँ धमाधम पुनर्निर्माणको काम जारी छ । अधिकांश स्थानमा पुरानै नाली भत्काएर त्यही जगमै नाली र पर्खाल बनाउने काम भइरहेको छ । 

मध्यपहाडी लोकमार्गअन्तर्गत पोखरा–बागलुङ खण्डमा पर्खाल निर्माण गरिँदै । तस्बिर : प्रकाश/कान्तिपुर 

करोडौं खर्चेको सडक फराकिलो नभएको भन्दै विभिन्न भेलामा कुरा उठ्ने गरेको छ । दुई/चार वर्षमै भत्काउनै पर्नेगरी सडक साँघुरो बनाइएको भन्दै निर्माणको तरिकामाथि प्रश्न उठेका छन् । सामान्यतया राजमार्गको मध्यभागदेखि २५ मिटरको दरले दायाँ–बायाँको खण्डमा घरटहरा बनाउन नपाइने प्रावधान पनि छ ।

Yamaha

बागलुङ सदरमुकामदेखि गलकोट हुँदै बुर्तिबाङ जाने खण्डमा १० मिटरभन्दा कम दूरीमा समेत घर बनिरहेका छन् । भूकम्पपीडितको पुनर्निर्माण र व्यावसायिक प्रयोजनका लागि धेरै घरटहरा बनेका हुन् । मापदण्ड नपुगेका स्थानमा बनेका घरलाई पुनर्निर्माण प्राधिकरणले अनुदान दिन नमिल्ने भए पनि स्थानीय तहले समेत धमाधम अनुमति दिएका छन् ।

पोखरादेखि बागलुङको निसीसम्मको झन्डै २ सय किमि सडक चक्लाउने, कालोपत्रे गर्ने र मर्मतको काम भइरहेको मध्यपहाडी लोकमार्ग आयोजनाका डिभिजन इन्जिनियर रमेश दृष्टिले बताए । ‘हामीले पुरानो ७ मिटरको बाटोलाई १० मिटर फराकिलो बनाउँदैछौं । केही ठाउँमा पहरा परेकाले बढाउन सकिएको छैन,’ उनले भने, ‘डिजाइनमा भएअनुसारकै काम गरिरहेका हौं । दायाँ–बायाँ चक्ल्याउन नमिलेको स्थानमा वाल उठाएर बनाउँछौं ।’ चालु वर्षभित्रै बागलुङ खण्डको अधिकांश भाग कालोपत्रे हुने उनले दाबीसमेत गरे ।

पर्वत सदरमुकाम कुश्मादेखि बागलुङ तर्फको घुम्ती, अर्मादी, नयाँपुल र सहश्रधारामा पुरानै नालीको जगमा निर्माण भइरहेको छ । साँघुरो सडक भएकाले निर्माण सम्पन्न नहुँदै दैनिक घण्टौं सवारी जाम हुने गरेको छ । मध्यपहाडी लोकमार्गको अधिकांश ट्रयाक खुलेकाले सुर्खेतदेखि पोखरासम्मका सवारीले यो बाटो प्रयोग गर्दा सडक झन् अस्तव्यस्त हुने यातायात व्यवसायी बताउँछन् ।

‘विकल्प नदिई काम भएकाले जाममा परिरहेका छौं,’ व्यवसायी खेमबहादुर जीसीले भने, ‘आधा घण्टाको बाटो २ घण्टासम्म लागेको छ ।’ सडक निर्माणको क्रममा केही अप्ठ्यारो भएको इन्जिनियर दृष्टिले स्वीकार गरे ।

उनले १० मिटर फराकिलो सडक बनाएर ७ मिटर कालोपत्रे हुने बताएका छन् । राजमार्गकै छेउमा निर्माणाधीन घरटहरा भने नीतिगत अस्पष्टताले रोक्न नसकेको उनले बताए । ‘राजमार्गको मापदण्ड २५ मिटर भन्ने त छ ।

तर, नयाँ घोषित राजमार्गका लागि कानुन बनेको छैन,’ उनले भने, ‘बरु स्थानीय तहले समन्वय गरेर नजिकमा संरचना बनाउन नदिँदा हुन्थ्यो ।’ कानुनी बाध्यताले सल्लाह मात्र दिन सकेको उनले बताए । पुनर्निर्माणको कामले भने गति लिएको छ तर सडकमै जोडेर घरटहरा बनाउने क्रम पनि बढिरहेको छ ।

गलकोट, बिहुँ, बडिगाड र बागलुङ नगरपालिकाभित्रै समेत अव्यवस्थित तरिकाले घर निर्माण भइरहेका छन् । मुख्य सडकमै जोडेर पेट्रोलपम्प, व्यावसायिक घर र पसलसमेत निर्माण भएका छन् । सडक छेउमै व्यापारिक सामग्री थुपार्ने प्रवृत्ति बढेकाले पैदलयात्रीले मूलबाटोमै हिँड्नुपर्ने बाध्यता छ ।

यसरी निर्माण भएका घरटहराले नक्सापास भने गरेका छैनन् । कतिपय घरको नक्सा पास नभएपछि मापदण्ड मिचेर बनेको टिप्पणी सुरु भएको छ । ‘हामीले मापदण्ड नपुगेर फिर्ता पठाएका कतिपय घर बनेको सुनेका छौं । त्यस्तो हो भने अनुगमन गरेर रोक्नेछौं,’ बागलुङ नगरपालिकाका प्रमुख जनकराज पौडेलले भने, ‘अनुगमन समितिलाई चुस्त बनाएर मापदण्ड लागू गराउन तयार छौं ।’

गलकोट नगरले भने सडकको मापदण्ड बनाएर लागू गरिसकेको प्रमुख भरत शर्मा गैरेले बताए । ‘राजमार्गको मापदण्ड हामीले बनाएका छैनौं, भित्री सडकमा भने तोकिएको मापदण्ड पूरा नभई नक्सा पास हुँदैन,’ उनले भने, ‘नगरपालिकाको सहमति बिना बनेका घरटहरा भत्काउँदा आफैं जिम्मेवार हुने भनेका छौं ।’

प्रकाशित : मंसिर २०, २०७५ ११:३५
प्रतिक्रिया
पठाउनुहोस्
ADVERTISEMENT

व्यापारीका विकासे नारा

कान्तिपुर संवाददाता

बागलुङ — बागलुङ उद्योग वाणिज्य संघको नेतृत्वका आकांक्षी व्यापारीले विकासे नारा अगाडि सारेका छन् । संघको १७ औं अधिवेशन आगामी शनिबार हुँदैछ ।

राजनीतिक दलले संसदीय निर्वाचनमा ल्याउने नारा संघको निर्वाचनमा आएका छन् । आफूले जितेमा सडक निर्माण गर्ने, पर्यटन प्रवद्र्धन र पर्यटकीय क्षेत्र घोषणा गर्ने तथा पञ्चकोट जाने केबुलकार निर्माण गर्ने समेत घोषणा गरेर उम्मेदवारले चुनाव प्रचार गरिरहेका छन् ।

निर्वाचनमा राजनीतिक रूपमै दुई प्यानल भएर व्यापारी बाँडिएका छन् । कांग्रेस, राष्ट्रिय जनमोर्चा र नयाँ शक्तिको एउटा प्यानलबाट युवराज राजभण्डारी र नेकपाको प्यानलबाट दयाराम पौडेलको नेतृत्वमा व्यापारीलाई चुनाव लागेको छ । राजभण्डारी संघका वर्तमान वरिष्ठ उपाध्यक्ष हुन् भने पौडेल महासचिव हुन् ।

झन्डै १ हजार २ सय मतदाता रहेको संघमा दुवै पक्षले आफ्नो बहुमत भएको दाबी पनि गरिरहेका छन् । ‘व्यावसायिक हितका लागि नारा लगाउनुपर्नेमा राजनीतिक नेताले झैं विकासका एजेन्डा अगाडि सारिनुले व्यापारीको चुनावमा राजनीति लागेको स्पष्ट हुन्छ,’ अधिवक्ता राम शर्माले भने, ‘व्यापारीको चुनावमा झन्डा ओढाएरआफ्नो बनाउने प्रवृत्ति हाबी भएको छ ।’ जनप्रतिनिधि र स्थानीय तहले गर्ने काम व्यपारीले गर्छु भन्दै एजेन्डा बनाएको उनले टिप्पणी गरे ।

राजभण्डारी समूहले विकाशे कामभन्दा व्यावसायिक हितमा काम गर्ने प्रतिबद्धता जनाएको दाबी सदस्यका उम्मेदवार नरेश कँडेलले गरे । ‘हरेक स्थानीय तहमा संघको इकाइ खोलेर राजस्व परामर्श समितिमा निजी क्षेत्रको प्रतिनिधि तोक्ने व्यवस्था गर्छौं भनेका छौं,’ उनले भने, ‘हामीले केबुलकार बनाउने नारा लगाएका छैनौं ।’ उनले करको वैज्ञानिक व्यवस्थापन गर्न स्थानीय तहमा पहल गर्ने नारा लगाएको दाबी गरे । कम्तीमा दुई सय महिलालाई पर्यटन व्यवसायसम्बन्धी तालिम दिने कार्यक्रम ल्याउने उनले बताए ।

पौडेल समूहले १९ बुँदे प्रतिबद्धता सार्वजनिक गरेको छ । उक्त समूहले केबुलकार र अग्लो पुल बनाउने नारा लगाएको हो । ‘नगरपालिकाले जथाभावी कर लगाएर व्यापारीको ढाड सेकेको छ । घटाएर व्यापारीलाई राहत दिने भनेका छौं,’ पौडेलले भने, ‘पर्यटन सूचना केन्द्र स्थापना गरेर पाहुना बढाउने योजना ल्याउँछौं ।’ व्यवस्थापन अभावमा सम्भावना भएका स्थानमा पर्यटक भित्र्याउन नसकिएको उनले बताए ।

दुवै पक्ष निर्वाचनमा घरदैलो, भेटघाटमा लागेका छन् । धार्मिक, राजनीतिक र सांस्कृतिक समूह बनाएर प्यानल जिताउने निर्णय गराउने र वनभोजसमेत गर्न थालेका छन् ।

प्रकाशित : मंसिर २०, २०७५ ११:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT