सडक मापदण्ड तोकियो

कान्तिपुर संवाददाता

म्याग्दी — यहाँको एक गाउँपालिकाले ग्रामीण सडकको पनि क्षेत्राधिकार तोकेको छ । भौगोलिक रूपमा जिल्लाकै सानो र मिलेको मानिएको मंगलाले गाउँपालिकाका भित्री सडकलाई ‘क’ देखि ‘घ’ सम्म चार श्रेणीमा विभाजन गरी सडकको मापदण्ड कायम गरेको हो । 

गाउँपालिकाको मंगलबार सम्पन्न चौथो गाउँसभाले सिम–टोडे, पुल्चोक–पोक–देउराली, पखेर–झाँक्रेपानी र पुल्चोक–छिस्वाङ सडकलाई ‘क’ वर्गमा राखेर सडक क्षेत्राधिकार १३ मिटर तोकेको छ । भाइबाङ–हिदी, सातबीसे–बरंजा–बुकेनी, सिमलचौर–टोडे, मुहाने–पाँखु–धारा–सिर्कुम–टिकाबाङ ‘ख’ श्रेणी र सडक क्षेत्राधिकार ११ मिटर तोकेको छ ।

बाँकी सबै ग्रामीण सडक ‘ग’ श्रेणी तथा सडक क्षेत्राधिकार ९ मिटर तथा गाउँपालिका मुकाम रहेको बाबियाचौर बजार
क्षेत्रभित्रका सबै गल्ली कम्तीमा ६ मिटर कायम गरिएको र सबै सडकमा २ मिटर सेटब्याक छाड्नुपर्ने भएको छ ।

यसैगरी ‘ख’ वर्गमा सूचीकृत भाइबाङ–हिदी, सातबीसे–बरंजा–बुकेनी, सिमलचौर–टोडे, मुहानेखोला–पाखु–धारा–सिर्कुम–टीकाबाङ सडकको क्षेत्राधिकार ११ मिटर कायम भएको छ । ‘ग’ वर्गका सडकको ९ र ‘घ’ वर्गका बजारका भित्री गल्लीको सडकको क्षेत्राधिकार ६ मिटर कायम गरिएको छ । सबै सडकको डेढ मिटर सेटब्याक छाड्नुपर्ने भएको छ ।

गाउँपालिका उपाध्यक्ष सिजना केसीका अनुसार गाउँपालिकाको हिउँदे अधिवेशनले गत असारमा पारित वार्षिक बजेटलाई पनि संशोधन गरेको छ । जनप्रतिनिधि र कर्मचारीको कार्यअनुभवको कमीले वार्षिक बजेट बनाउँदा पुँजीगतमा राख्नुपर्ने वित्तीय सबलीकरणतर्फको करिब ३ करोडभन्दा बढी बजेट चालु शीर्षकमा परेको थियो ।

प्रकाशित : पुस २७, २०७५ ०९:५०
ADVERTISEMENT
प्रतिक्रिया
पठाउनुहोस्

२ विधेयक प्रदेशसभामा

प्रदेश सहकारी सम्बन्धमा व्यावस्था र वर, पीपल र चौतारो संरक्षण तथा व्यावस्थापन गर्न बनेका विधेयक प्रदेशसभामा प्रस्तुत
कान्तिपुर संवाददाता

पोखरा — प्रदेशसभाको विधायन समितिले सामान्य संशोधनसहित प्रदेश सहकारी सम्बन्धमा व्यवस्था गर्न बनेको विधेयकलाई प्रदेशसभामा बिहीबार प्रस्तुत गरेको छ ।

समितिका सभापति मोहनप्रसाद रेग्मीले बिहीबारको प्रदेशसभा बैठकमा विधेयकमाथि दफावार छलफल भएको र सरोकारवालासँग अन्तरक्रियासमेत भएको बताए । विधेयक भदौ ३१ को प्रदेशसभा बैठकले दफावार छलफलका लागि विधायन समितिमा पठाएको थियो ।

सहकारी मूल्य मान्यता र सिद्धान्त अनुरूप सर्वसाधारण वा समुदायमा छरिएर रहेको पुँजी, प्रविधि, ज्ञान, सीप, श्रम र प्रतिभालाई स्वावलम्बन तथा पारस्परिकताका आधारमा एकीकृत गरी सदस्यरूको आर्थिक, सामाजिक र सांस्कृतिक उन्नयन एवं समाजवाद उन्मुख अर्थतन्त्रको विकास गर्न भन्दै प्रदेश सरकारले सहकारी विधेयक ल्याएको हो ।

समुदायमा आधारित सदस्य केन्द्रित, लोकतान्त्रिक, स्वायत्त र स्वशासित संगठनको रूपमा सहकारी संस्थाको दर्ता, सञ्चालन, नियमन तथा प्रवद्र्धन गर्ने उद्देश्य विधेयकको छ । प्रदेशसभामा पेस भएका मध्ये सहकारी विधेयक सबैभन्दा ठूलो हो । ४९ पृष्ठको विधेयकमा १ सय ३ दफा छन् । वर, पीपल र चौतारो संरक्षण तथा व्यवस्थापन गर्न बनेको विधेयकलाई पनि विधायन समितिले बिहीबारकै प्रदेशसभा बैठकमा प्रतिवेदनसहित पेस गरेको छ ।

सार्वजनिक तथा निजी स्थानमा रहेका वर, पीपललगायत महत्त्वपूर्ण वृक्ष र चौतारो तथा यीसँग सम्बन्धित कुवा, कुण्ड र पोखरी मास्न नपाइने भन्दै उद्योग, पर्यटन, वन तथा वातावरण मन्त्रालयले विधेयक ल्याएको हो । विधेयकमा सबै स्थानीय तहले त्यस्ता वृक्ष र स्रोतको अभिलेख राख्नुपर्ने अनिवार्य व्यवस्था गरेको छ ।

सार्वजनिक स्थानमा भएका प्राकृतिक, सांस्कृतिक, ऐतिहासिक, वातावरणीय एवं प्राकृतिक प्रकोप न्यूनीकरणका हिसाबले महत्त्वपूर्ण स्रोत भएकाले संरक्षणमा जोड दिँदै विधेयक ल्याइएको हो । सार्वजनिक, निजी वा जुनसुकै जग्गामा प्राकृतिक रूपमा उम्रिएका तथा रोपिएका वर, पीपल, समी, सोमी, लाँकुरी, कदम, आँपजस्ता रूख र चौतारो तथा यीसँग सम्बन्धित कुवा, कुण्ड र पोखरीसमेत संरक्षण सूचीमा छन् । विधेयक असोज १ को बैठकले दफावार छलफलका लागि विधायन समितिमा पठाएको थियो ।
बागलुङ निर्वाचन क्षेत्र नम्बर २ (ख) खाली
जनमोर्चाका प्रदेशसभा सदस्य टेकबहादुर घर्तीमगरको गत मंसिर २७ मा निधन भएपछि बागलुङ–२ ‘ख’ निर्वाचन क्षेत्र सांसदविहीन भएको छ ।

सभामुख नेत्रनाथ अधिकारीले प्रत्यक्ष निर्वाचित प्रदेशसभा सदस्यको निधनले उक्त क्षेत्र रिक्त हुन पुगेको सभालाई जानकारी गराए । संविधानको धारा १८० (च) अनुसार निर्वाचन क्षेत्र रिक्त भएको सूचना प्रदेशसभा नियमावलीको दफा १८५ बमोजिम सभामुखले सभासमक्ष जानकारी गराएका हुन् । कलेजोको रोगबाट पीडित ४७ वर्षीय घर्तीमगरको भारतको नयाँदिल्लीमा उपचारका क्रममा निधन भएको थियो ।

प्रकाशित : पुस २७, २०७५ ०९:४९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT