संक्रान्तिमा खाना महोत्सव

पाहुनालाई सडकमै राखेर रैथाने खानाको स्वाद चखाउने योजना
कान्तिपुर संवाददाता

म्याग्दी — बेनीमा माघे संक्रान्तिको मेलाको अवसर पारेर सडक खाना महोत्सव हुने भएको छ । प्राचीन भोट–मधेस (तिब्बत–भारत) चल्ने साल्ट ट्रेड रुटको प्रमुख व्यापारिक केन्द्र बेनीमा लाग्ने व्यापार मेलाको परम्परालाई परिस्कृत संस्कृतिका रूपमा मनाउन खाना महोत्सव गर्न लागिएको आयोजक महिला उद्यमी संघले जनाएको छ ।

म्याग्दी भ्रमण वर्ष अभियानसँगै आन्तरिक तथा बाह्य पाहुनालाई सडकमै राखेर विभिन्न रैथाने खानाको स्वाद दिन खाना महोत्सव गर्न लागिएको हो । सदरमुकाम बेनीको कालीपुल बसपार्कमा आयोजना गरिने सडक खाना महोत्सवमा स्थानीय जातजातिका रैथाने खानाका स्वाद उपलब्ध हुनेछन् ।

Citizen

माघे संक्रान्ति मेला एवं सडक खाना महोत्सवमा २० हजार पर्यटकलाई भित्र्याउने आयोजकको दाबी छ । महोत्सवमा आन्तरिक पर्यटकलाई आर्कषित गर्न खुला एकल लोकनृत्य, महिला उद्यमशीलता तथा म्याग्दी भ्रमण वर्ष झल्कने दोहोरी गीत र महिला छेलो प्रतियोगिता हुने छ । महोत्सवमा कृषि, हस्तकला तथा स्थानीय उत्पादनको स्टल प्रदर्शनी गरिने भएको छ । प्रतियोगितामा पहिलो, दोस्रो र तेस्रो हुनेले आकर्षक नगद पुरस्कार पाउने भएका छन् ।

‘सडक खाना महोत्सवलाई पाहुनाले यहाँको खानाको स्वाद, आतिथ्यता र आत्मीयतालाई सधंै स्मरण गर्न योग्य रहनेगरी तयारीमा छौं,’ महिला उद्यमी संघकी अध्यक्ष सुनीता केसीले भनिन्, ‘महोत्सवको तयारी पूरा भएको छ । म्याग्दीको संस्कार र संस्कृति झल्कने गरी बेनीको पुरानो बजार कालीपुलको सडकमा पाहुनालाई सत्कार गर्न लागेका छौं ।’

दुई नदीको निरन्तर कटानले त्रिकोणाकार रूपमा कुँदिएको बेनी बजार कालीगण्डकी र म्याग्दी नदीको संगमस्थल हो । म्याग्दी सदरमुकाम बेनीको इतिहास भने लामो छ । भारत–भोट व्यापारको केन्द्र रहेको बेनी समृद्ध चौबीसे राज्य पर्वतको राजधानी थियो । चौबीसे राज्य पर्वतको राजधानी रहेको समयावधिलाई यो बजारको स्वर्णकाल मानिन्छ ।

प्रकाशित : पुस २८, २०७५ ०९:२८
प्रतिक्रिया
पठाउनुहोस्

कार्यालय बस्दैनन् कर्मचारी

निगरानी गर्दैन सरकार
सेवाग्राही प्रभावित
सन्तोष सिंह

धनुषा — जलस्रोत तथा सिँचाइ विकास डिभिजन कार्यालयका प्रमुख भगवान झाको कार्यालयीय नेमप्लेटमा शुक्रबार बाहिर लेखिएको थियो । हाजिरी गरेर उनी ‘फिल्ड’ मा निस्केको कर्मचारीले बताए । बिहीबार अपराह्न पनि उनको कोठामा चुकुल लागेको थियो ।

जलस्रोत तथा सिँचाइ विकास डिभिजन कार्यालय जनकपुर परिसरमा घाम तापेर बसेका कर्मचारी । तस्बिर : सन्तोष/कान्तिपुर

कार्यालयका लेखापाल नविनकुमार झाको कोठामा बिहीबार र शुक्रबार दुबै दिन ताल्चा झुन्डिएको छ । उनी चार दिनदेखि हाजिरी छैनन् । तर, कार्यालय बेलाबेलामा आउने गरेको बताउँछन् । बिहीबार राति अबेरसम्म कार्यालयमै रहेको दाबी गर्ने लेखापाल झा भने कार्यालय समयमा भेटिदैनन् । ‘अबेर रातिसम्म कार्यालयमै बस्छु । त्यसैले बिहान–दिउँसो कार्यालय आउँदिन,’ झाले भने । लेखापाल झाले पुस महिनामा थोरै दिन मात्र कार्यालय पुगेको हाजिरी रेकर्डमा देखिन्छ । तीन दिन काज र एक सातासम्म भैपरीमा उनी बिदा बसेका छन् ।

११ जना कर्मचारी खटिएको सिँचाइ डिभिजन कार्यालयमा दुई–चार जना मात्र भेटिन्छन् । बाँकी सबै ‘फिल्ड’ मा रहेको बताइन्छ । सिँचाइ कार्यालयलाई ५ महिनाअघि प्रदेश सरकार मातहत ल्याइएको हो । कार्यालय आउने र हाजिरी गरेर टाप कस्ने कर्मचारीको प्रवृत्ति देखिएको छ । प्रदेश सरकार मातहत ल्याइएका कार्यालय कर्मचारीको कामचोर प्रवृत्ति, व्यवस्थापनको कमी, आन्तरिक किचलो र प्रदेश सरकारले ध्यान नदिँदा लथालिङ बनेको छ । सेवाग्राही झन् पीडित बनेका छन ।

प्रदेश मातहतमा आएको कार्यालयको बोर्ड त फेरियो । तर, कर्मचारीकोशैली पुरानै छ । कर्मचारीको ढिलासुस्ती, गैरजिम्मेवारीले सेवाग्राहीले दु:खपाइरहेको छ । कार्यालयमा आएर हाजरी गर्ने र समय काट्ने कर्मचारीको दिनचर्या यथावतै छ । सिँचाइ डिभिजनका लेखापाल झा कार्यालय समयमा खाना र नास्ताको बहाना बनाउँदै कार्यालयमाआउँदैनन् । लेखापाल झा कार्यालय नआउँदा सेवाग्राही दिनहुँ कार्यालय धाए पनि सेवा पाउन नसकेको त्यहाँका कर्मचारी बताउँछन् ।

डिभिजनमा कार्यरत १० जना कर्मचारी नियमित आउने गरेको हाजरी सुपरभाइजर योग्यानन्त झाले देखाए पनि कार्यालयमा उपस्थित ५ कर्मचारी हाजरी गरी घाम तापिरहेका देखिए । कार्यालयका फाँट प्रमुखहरूले कामको जिम्मेवारी पाएका छैनन् । भौतिक विकास मन्त्रलायअन्र्तगत सिँचाइ डिभिजनजस्तै सामाजिक विकास मन्त्रालय मातहत रहेको स्वास्थ्य कार्यालयका कर्मचारी पनि कामविहीन छन् । प्रदेश जनस्वास्थ्य कार्यालयमा तत्कालीन जिल्ला जनस्वास्थ्य कार्यालय राखिएको छ ।

कार्यालयमा कामको जिम्मेवारी नपाउँदा कर्मचारी हाजिर गरी चिया खाँदै घाम तापेर दिन बिताउँछन् । कार्यालय सञ्चालनमा ढिलाइ र कामको अख्तियारी समयमा नआउँदा प्रदेश स्वास्थ्य कार्यालय कामविहीन बनेको समाजिक विकास मन्त्रलाय स्वास्थ्य महाशाखाका प्रमुख नवल झाले बताए ।

विकास निर्माण र नियमित सेवा ठप्प भएको छ । प्रदेश सरकारको बजेट समेत खर्च हुन सकेको छैन । प्रदेशमा पर्याप्त कर्मचारी नरहेको कारण काम गर्न समस्या भएको प्रदेश सरकारले संघीय सरकारलाई आरोप लगाइरहदा भएको कर्मचारीलाई समेत प्रदेश सरकारले काम दिन सकेको छैन ।

चालु आर्थिक वर्षको ६ महिना बित्नै लाग्दा पनि प्रदेश सरकारले विकास निर्माण सुरु गर्न सकेको छैन । जनताको प्रत्यक्ष सरोकार रहेको सामाजिक विकास मन्त्रालय, भौतिक पूर्वाधार विकास मन्त्रालयसँग सम्बन्धित कार्यालयलाई समयमा अख्तियार नजाँदा विकास निर्माण गति लिन नसकेको मुख्मन्त्री तथा मन्त्रिपरिषद् कार्यालयका सचिव हरि फुयाँलले बताए ।

प्रकाशित : पुस २८, २०७५ ०९:०१
पूरा पढ्नुहोस्
प्रतिक्रिया
पठाउनुहोस्