नदीको दोहन रोक्न चुनौती

कान्तिपुर संवाददाता

पर्वत — नदीजन्य पदार्थ उत्खननको ठेक्का स्थानीय तहका लागि आन्तरिक आम्दानीको प्रमुख स्रोत हो । यसको समुचित व्यवस्थापन हुन नसक्दा हुने अनधिकृत गतिविधि रोक्न प्रहरीलाई चुनौती छ । 


जिल्ला प्रहरी प्रमुखको जिम्मेवारी सम्हालेलगत्तै प्रहरी नायब उपरीक्षक श्यामु अर्यालले अनधिकृत गतिविधि रोक्न ठूलो चुनौती देखिएको बताएका हुन् । पर्वतमै प्रहरी निरीक्षकको जिम्मेवारीमा पनि काम गरिसकेका उनले मंगलबार प्रहरीलाई पर्ने सबैभन्दा बढी समस्या र टाउको दुखाइको विषय 'नदी दोहन' भएको दाबी गरे ।

नवआगन्तुक डीएसपी र सञ्चारकर्मीबीच हुने नियमित परिचयात्मक कार्यक्रममा बोल्दै उनले अरू गम्भीर तथा संगठित अपराध नभए पनि पर्वतमा नदी दोहन, लागूपदार्थ ओसारपसार, महिला, बालबालिका र ट्राफिक व्यवस्थापन मुख्य चुनौती भएको बताए । 'हामीले गर्ने हजार काम हुन्छन्,' उनले भने, 'तर, यहाँको सबैभन्दा ठूलो चुनौती नदी दोहन छ । एउटाले अनुमति दिन्छ, एउटाले कार्यान्वयन गर्छ । हामी बीचमा पर्छौं ।' उनले यस्ता विषयलाई समेत कानुनको परिधिभित्र बसेर समाधानको प्रयासमा जुट्ने प्रतिज्ञा गरे । पर्वतमा सञ्चालित मध्यपहाडी लोकमार्ग, निर्माणाधीन जलविद्युत्, कालीगण्डकी लोकमार्ग, कालीगण्डकी र मोदी प्रसारण करिडोरलगायतका ठूला आयोजनाको सुरक्षाको जिम्मा पनि प्रहरीलाई छ ।

त्यसबाहेक पछिल्लो समय धौलागिरिको नाकाको प्रवेशद्वार हुँदै गुड्ने सवारीको चाप बढदा ट्राफिक व्यवस्थापन पनि चुनौती बन्दै गएको छ । सबै चुनौती सामना गर्न सीमित प्रहरी र ट्राफिकको दरबन्दी छ । आफू प्रहरी निरीक्ष्ाक भएर बस्दा जिल्लाको धेरै विषयमा जानकार रहेको भन्दै प्रहरी नायब उपरीक्षक अर्यालले समस्या समाधान गर्न प्रहरी कहिल्यै पछि नहटेको र त्यसका लागि सञ्चार क्षेत्रको सहयोग आवश्यक रहेको बताए । अन्तरक्रियामा सञ्चारकर्मीले जिल्लामा नदीजन्य पदार्थ र बग्रेल्ती खुलेका क्रसर, तिनले गरेका अनियमितता, ठूला आयोजनाका बेथितिलगायतमा निगरानी बढाउन आग्रह गरे । निर्माणाधीन मध्यपहाडी लोकमार्गको कन्ट्याक्टर लामा कन्स्ट्रक्सनले सञ्चालन गरेको क्रसरले अन्यत्र सामान बिक्री गरिरहेकाले त्यसको खोजतलास हुनुपर्ने पत्रकार महासंघका अध्यक्ष्ा छविलाल तिवारीले बताए ।

आयोजनाकै प्रयोजनका लागि मात्र सञ्चालित क्रसरले व्यक्ति तथा अन्य आयोजनालाई गिटी, बालुवा बिक्री गर्दा पनि प्रशासनले छानबिनमा चासो नदिएको सञ्चारकर्मीको गुनासो छ । बजारक्षेत्रमा हुने चोरी र लुटपाटका घटना नियन्त्रण गर्न जडित सीसी क्यामेरा बिगि्रएको प्रति सञ्चारकर्मीले चासो राखे । विष्णु गौतमले महिला तथा बालबालिकाको मुद्दामा प्रहरी गम्भीर हुनुपर्ने बताइन् । पत्रकार महासंघका पूर्वअध्यक्ष्ा दुर्गाप्रसाद शर्माले प्रहरीभित्रै भएका केही आचरण सुधार गर्नुपर्ने बताए ।

प्रकाशित : वैशाख ४, २०७६ १२:०६
ADVERTISEMENT
प्रतिक्रिया
पठाउनुहोस्
ADVERTISEMENT

एक काम, एक सीप

कान्तिपुर संवाददाता

स्याङ्जा — युवा जनशक्तिलाई स्थानीय स्तरमा रोजगारीको अवसर वृद्धि गर्न पुतलीबजार नगरपालिकाले एक काम एक सीप अवधारणा अघि सारेको छ । रोजगारीको खोजीमा जनशक्ति बाहिरिनु र नगरको पैसा अन्यत्र जान थालेको भन्दै यस्तो अवधारणा अघि सारिएको हो । 

पुतलीबजारको इकाइ केन्द्रको सहकार्य नगर कार्यपालिकाको आयोजनामा मंगलबार युवाका लागि डकर्मी तालिमको सुरुवात गर्दै नगरप्रमुख सीमा क्षत्रीले युवा विदेश पलायन हुनुपर्ने समस्याको अन्त्य गर्नका लागि यस्ता कार्यक्रम अगाडि सारिएको बताइन् । उनले युवालाई रोजगारी दिने नगर कार्यपालिकाको उद्देश्यसमेत रहेको बताएकी थिइन् । 'युवालाई बाँच्न सक्ने आधार हामीले दिनुपर्छ,' उनले भनिन्, 'विदेश नजाऊ भन्ने तर रोजगारी नदिने गरेर पनि भएन । रोजगारीका लागि सबै दक्ष र सक्षम हुनुपर्छ । दक्ष बनाउने हेतुले नै एक काम एक सीप कार्यक्रमको अवधारणा ल्याएका हौं ।' उनले मंगलबार मात्रै ४० जनाको सहभागिता रहेको बताइन् । सहभागीमध्ये ४ जना महिला छन् । एक महिलाको उमेर भने १९ छ ।

तालिममा इन्जिनियर निरज सापकोटा, सन्तोष थापा, सविन श्रेष्ठ र खगेन्द्र ढकालले सहजीकरण गर्नेछन् । फिल्डमा खटिएर काम गराइने आयोजकले जनाएको छ । तालिममा लेबरलाई अदक्ष, मिस्त्रीलाई दक्षको भागबन्डा लगाइएको छ । यसैगरी व्यवस्थापकीय जिम्मेवारी सुपरभाइजरले समाल्नेछन् । तालिममा सहभागी दैनिक खाजासँगै ७ सय ५० रुपैयाँ अदक्षलाई र ९ सय ५० रुपैयाँ दक्षलाई दिइने इन्जिनियर सन्तोष थापाले बताए ।

सुपरभाइजरलाई भने काम अनुसार भत्ता उपलब्ध गराइने कार्यपालिकाले जनाएको छ । १५ दिनदेखि १ महिनासम्म फिल्डमा खटिने नगरप्रमुख क्षत्रीले बताइन् । उनका अनुसार कामदारलाई प्रेक्टिकल गराउँदा नगरपालिकाले बनाउन लागेको फोहोर सफाइ केन्द्रको बाहिरी संरचना निर्माण गरिनेछ । पुतलीबजार-४ का वडाध्यक्ष ओमबहादुर खड्काले स्थानीय युवा डकर्मी कार्यमा दक्ष भएमा विकास निर्माणका लागि छुट्याइएको बजेटको कुल रकममध्ये ५० प्रतिशत रकम बचत हुने बताए । 'बाहिरबाट आउने मान्छेलाई काम दिँदा यस क्षेत्रको रकम पनि बाहिर जान्छ र आधा प्रतिशत ठेक्का नोक्सान हुन्छ' उनले भने, 'नगरबाट वडामा गएको रकम वडाका युवाले नै काम गरिदिएमा वडाभित्र नै हुने थियो । युवालाई रोजगारी हुने थियो भने जुन ठाउँका लागि विनियोजित भएको पैसा थियो त्यो त्यहीं रहने थियो ।'

उनले यसरी स्थानीय युवाले काम गरेमा बचत भएको रकम उपभोक्ता समितिमा राखेर अन्य क्षेत्रमा पनि काम गर्न सकिने बताए । पुतलीबजार नगरपालिकाले तालिममा सहभागीलाई सर्टिफिकेट हस्तान्तरण गर्नेछ ।

प्रकाशित : वैशाख ४, २०७६ १२:०६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT