भिमाद–रिसिङ श्रृंगपथ : ४ पटक म्याद थप, काम भएन

श्रृंगपथमा ओटासिलको काम ३ बर्ष अघि सकिनु पर्नेमा अझै ४ किमीमा ग्राभेलबाहेकको काम भएको छैन
प्रताप रानामगर

दमौली — तनहुँको भिमाददेखि रिसिङ जोड्ने श्रृंगपथको ओटासिलको काम ३ वर्ष अघिनै सकिनुपर्ने हो । पटकपटक म्याद थपे पनि ठेकेदारको लापरबाहीले कामको प्रगति भने हुन सकेको छैन । सडक स्तरोन्नति नहुँदा स्थानीयबासी र यात्रुले सास्ती खेप्नु परेको छ ।

पटकपटक म्याद थप गर्दा पनि काम नभएको जिल्ला पूर्वाधार विकास कार्यालय नवलपुरका प्रमुख लक्ष्मी भण्डारीले बताए । ‘श्रृंगपथको ओटासिल गर्ने कार्य प्रगति नाजुक अवस्था छ,’ उनले भने, ‘थप गरिएको म्याद पनि सकिएको छ ।’


चोथौ पटक थप गरिएको म्याद गत कात्तिकमा सकिएको छ । अहिलेसम्म ४५ प्रतिशत मात्र काम भएको उनले बताए । रिसिङसम्मको १७ किलोमिटरमध्ये रिसिङतर्फको ४ किमी दुरी ओटासिल छ । अर्को ४ किमी सडकमा ग्राभेलको काम भए पनि वर्षाको पानीले बगाएको छ । नाली पनि केही मात्रामा बनेको छ ।

Citizen

‘ठेकेदारलाई धैरैपटक म्याद थप गरियो, उनले भने, ‘तर, कामले गति लिएन । ठेक्का तोड्ने तयारीमा छौं ।’ ठेक्का तोड्नका लागि प्रक्रिया सुरु गरेको र कामको प्रगतिका बारेमा जानकारी गराउन पत्रपत्रिकामा सूचना प्रकाशन समेत गरिएको छ । ‘ठेकेदार कार्यालयमा आएर काम गर्ने प्रतिबद्धता जनाउँदै जाने गर्छन, उनले भने, ‘तर, काम गर्दैनन् ।’ सडक स्तरोन्नतिको जिम्मा स्वच्छन्द मना संयुक्त जेभीले लिएको हो ।


म्याद सकिएपछि ठेकेदार औपचारिक सम्पर्कमा नआएको ग्रामिण यातायात सुदृढीकरण कार्यक्रमका इन्जिनियर दिलिप उप्रेतीले बताए । ‘म्याद सकिएपछि ठेकेदार सम्पर्कमा छैनन्,’ उनले भने । लामो समयसम्म सडक स्तरोन्नति नहुँदा स्थानीय र यात्रुले सास्ती खेप्नुपरेको श्रृंगपथ माझकोट सडक खण्डका सचिव धनबहादुर थापाले बताए । ‘ठेकेदारको लापरवाही भयो,’ उनले भने, ‘तीन वर्षअगाडि सम्पन्न गर्नुपर्ने ओटासिल अझै हुन सकेको छैन ।’

उपभोक्ता समिति र स्थानीयले पटकपटक ठेकेदारलाई दबाव, सम्बन्धित कार्यालयमा डेलिगेसनदेखि सडक अबरुद्धसम्म गर्दा पनि सुनुवाइ नभएको स्थानीयले बताए । ठेकेदारले चरम लापरबाही गरेको र अब पनि म्याद थपेमा काम सम्पन्न गर्ला भन्ने नलागेको स्थानीयको भनाइ छ । ठेक्का तोडेर नयाँ प्रक्रियामा जादा उपयुक्त हुने भन्दै थापाले इमान्दार र समयमा काम सक्ने ठेकेदार कम्पनी छनौट गर्नुपर्ने बताए ।


दैनिक सयभन्दा बढी सवारी साधन चल्ने सडक हिउँदमा धुलाम्मे र बर्खायाममा हिलाम्मे हुन्छ । ग्रामिण सडक भएपनि सवारी साधनको चाप छ । यसले छेउछाउका बस्तीलाई ठूलो असर परेको छ । धुलोका कारण स्वास्वप्रश्वासमा समस्या देखिएको स्थानीय मायादेवी थापाले बताइन । ‘सडकको धुलोले घर पुरिन्छ’ उनले भनिन्, ‘धुलोले सास फेर्न पनि गाह्रो हुन्छ ।’ खाना र लत्ताकपडामा पनि धुलोले हैरानी पार्ने उनको भनाइ छ । ठेकेदारले समयमा बाटो बनाइदिए यस्तो समस्या हुन्थेन भन्ने उनलाई लागेको छ ।


निर्माण कम्पन्नी स्वछन्द मनाले भमादको पुरानो स्कुलदेखि रिसिङसम्म १७ किमी सडक ओटासिलको काम ०७३ असोज मसान्तमा सक्नुपर्थ्यो । १८ महिनाभित्र काम सक्नुपर्ने भनिए पनि पटकपटक म्याद थप गरिएको तर प्रगति भने नभएको हो । १० करोड ५८ लाखमा काम सक्नुपर्ने सम्झौता छ ।


‘श्रंगपथको ओटासिल गर्न संयुक्त रूपमा काम गर्ने भनेर ठेक्का लिइयो,’ ठेकेदार जयराम लामिछानेले भने, ‘पाटर्नरले धोका दिए ।’ ठेकेदार महेन्द्र अधिकारीले कामको सबै जिम्मा लिएर पनि जिम्मेवारी पूरा नगरेको र अहिले एक वर्षदेखि सम्पर्कमै नरहेको उनले बताए । आवश्यक कच्चा पदार्थको पैसा पनि क्रसर उद्योगलाई अधिकारीले नदिएको र यसले थप कच्चा पदार्थ उद्योग ल्याउन नपाएको उनको गुनासो थियो । म्याद सकिए पनि असार मसान्तसम्म देखिने गरी कार्यालयसंग प्रतिबद्धता गरेको उनले बताए ।


सडकको ट्र्याक २०२० सालमा खुलेको हो । अहिले तनहुँको भिमाद, रिसिङ, घिरिङ, पाल्पाको रामपुर, नवलपुरको डेढगाउँ जाने मुख्य प्रवेशद्धार मानिन्छ । यही सडक खण्डलाई गण्डकी प्रदेश सरकारले कोरलादेखि त्रिवेणी नाका जोड्ने प्रदेशको मुख्य सडकको रूपमा लिएको छ ।

प्रकाशित : जेष्ठ १, २०७६ १०:५९
ADVERTISEMENT
प्रतिक्रिया
पठाउनुहोस्

मेयरको वडामा ५० योजना

प्रतीक्षा काफ्ले

स्याङजा — सदरमुकाम पुतलीबजार नगरपालिका– ३ नयाँबजारको लत्रेपिपलमा १ करोड ८१ लाख रुपैयाँको लागतमा ढडुवा–बिचारीडाँडा लिफ्टिङ खानेपानी योजना संचालन हुँदैछ  । यो वडाको ठूलो योजना हो  ।

टेन्डर भइसकेको योजनामा संघीय सरकार र नगरपालिकाको ४०/४० प्रतिशत् र उपभोक्ताको २० प्रतिशत लागत रहनेछ ।


यो नगरप्रमुख सीमा क्षेत्रीको वडा पनि हो । नगरका १४ वडामध्ये सवैभन्दा बढी ५० योजना यही वडामा रहेका छन । नगरको यति धेरै योजना सञ्चालन भएको यो एउटै हो ।

वडाले सडक, खानेपानीलाई प्राथमिकतामा राखेर योजना बनाएको छ । वडामा ती योजनाका लागि दिनहुँजसो सम्झौता, मूल्यांकन र फरफारकका लागि आउने गर्छन । धेरै योजना छनोट भए पनि बजेट भने न्यून रहेको वडाध्यक्ष अमृत श्रेष्ठको दावी छ । ‘बजेट कम भएकाले सबै काम सोचेजसरी पूरा नहुने भए’ उनले भने, ‘वडाकै कतिपय योजना प्रदेश र संघीय सरकार समक्ष पेश गरेका छौं ।’


प्रगतिनगर–वाहाकोट–काल्खु सडकखण्डका लागि ४० लाख रुपैयाँको योजना पनि सोही वडामा छ । बाडखोलाको सामाग्रीचोकबाट हमालडाँडा पुग्ने भित्री ग्रामीण सडकको पनि कालोपत्रे गरिने काम केही दिनअघि मात्रै सम्पन्न भएको छ । ४ सय ९ मिटर कालोपत्रे र ८० मिटर लामो नयाँ नाला निर्माण गरिएको वडाध्यक्ष अमृत श्रेष्ठले बताए । श्रेष्ठका अनुसार नगरपालिकाको २० र जनसहभागिताको ६ लाख गरी २६ लाख लागतमा उक्त काम सम्पन्न गरिएको हो ।


सदरमुकामसँगै जोडिएको वडा भएपनि सबै वडामा जस्तै २५ लाख बराबर समान बजेट पाएको वडाले जनाएको छ । वडामा एकदेखि २ लाखसम्मका साना र ३ लाखदेखी १ करोड बढीसम्मका ठूला योजना छ ।

गतवर्ष नयाँ ट्रयाक खोलिएको गोद्गोदे–गुडीखोला–नुवाकोट ग्रामीण सडकको निर्माण कार्य धमाधम अगाडि बढेको भए पनि आगामी आर्थिक वर्षमा नगरपालिकाबाट बजेट सम्बोधन हुन्छ हुदैन कुनै एकिन नरहेको हुँदा प्रदेश सरकारसँग पेश गरिएको वडाले जनाएको छ । कार्यालयका अनुसार १९ करोडको डिपिआर तयार भएको यस सडकको लागी नगरपालिकाले गतवर्ष ३० र चालु वर्ष १४ लाख रुपैयाँ विनियोजन गरेको थियो ।


प्रदेश राजधानी पोखरा जोड्ने छोटो सडकमा रूपमा रहेको यो सडक निर्माणको कार्य रोक लगाउनका लागि नगरपालिका स्वयंले निर्देशन दिएको स्रोतले जनाएको छ । बजेट र समयले भ्याएसम्मका काम भने पूरा गरिने वडा सदस्य तेजप्रसाद शर्मा बताउँछन् ।

पुतलीबजारले सामान्य २० हजार रुपैयासम्मका योजना आफैले सम्झौता गर्ने, रकम भुक्तानी गर्ने गरेकाले स्थानीयले झन्झटिलो प्रक्रियामा त्यति चासो नदेखाउने जनप्रतिनिधिको गुनासो छ । यसैरी नै वडाले बजार क्षेत्रको खानेपानी एकद्धार प्रणलीबाट लैजाने योजना पनि संगसंगै अगाडि बढाएको बताएको छ ।

साना–ठूला सवै योजनाको काम सुरु गरिएको वडाध्यक्ष श्रेष्ठले बताए । नगर कार्यपालिकाको अनुसार जनसंख्या र भूगोलले पनि ठूलो वडा भएकाले यहाँ धेरै योजना परेका हुन् ।

वडा कार्यालयका अनुसार ४१ वटा वडास्तरीय योजनामध्ये ३९ वटाको कार्यक्रम सम्झौता भइसकेको छ भने २० वटा योजनाको निर्माण कार्य सम्पन्न भइसकेको योजना अधिकृत ताराचन्द्र ढकालले बताए । उनका अनुसार वडा ३ मा ९५ प्रतिशत योजनाको काम सम्पन्न भइसकेको छ ।


ढकालका अनुसार सबैभन्दा बढी योजना वडा ३ र ५ मा ४१/४१ छन । सबैभन्दा कम १३ वडामा २४ योजना छ । सबै वडामा १५ वटा नगर गौरवमका योजना छ ।

त्यस्तै एक सय ८६ नगरस्तरीय योजना छन । पुतलीबजार–१ का विमल खाँतीले सदरमुकामको वडा भएकाले एक नम्बरमा बढी रकम विनियोजन भएको हुनसक्ने बताए । वडा कार्यालयले पाउने २५ लाख रुपैयाँअन्तर्गतका साना योजना पनि वडास्तरीयमा समावेश गरिएको नगरफालिकाका योजना अधिकृत ढकालले बताए ।

प्रकाशित : जेष्ठ १, २०७६ १०:५७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT