नेकपाका नेताद्वारा नगरपालिकामा तालाबन्दी

कान्तिपुर संवाददाता

बागलुङ — नेकपाका जिल्ला नेता कृष्ण पाठकले बागलुङ नगरपालिकामा तालाबन्दी गरेका छन्  । नगरपालिकाभित्र भ्रष्ट्राचार, लापरबाही, ढिलासुस्ती र अटेरी प्रवृत्ति मौलाएको भन्दै उनले बुधवार बिहान १० बजे नगरप्रमुख जनकराज पौडेल र प्रमुख प्रशासकीय अधिकृत भीमबहादुर कुँवरको कार्यकक्षमा ताला लगाएका हुन्  ।

नगर प्रमुखले कार्यपालिका सदस्यले उठाएका बिषयलाई समेत बेवास्ता गरेको टिप्पणी भइरहेको थियो । ‘बैठकमा के के भयो थाहा भएन, पार्टीको बैठकमा सोधिएका स्पष्टीकरणलाई समेत उहाँले कुल्चेकाले ताला लगाएर ध्यानाकर्षण गराएका हौं’ पाठकले भने, ‘पार्टीको टिकट पाएर मेयर भएकोले पार्टीले सुशासन र पारदर्शीताको बारेमा उठाएको जिज्ञासा समेत बेवास्ता गरियो ।’

पटकपटक उठेका जिज्ञासामा वेवास्ता गरेपछि मंगलवार जिल्ला तहका नेतृत्वले बैठकमा बोलाउँदा पनि पौडेल नगएको आरोप पाठकले लगाए । पाठक साविक एमाले बागलुङका उपाध्यक्ष र हाल नेकपा जिल्ला संयन्त्र सदस्य हुन ।‘नगरपालिका भ्रष्ट्राचारको दलदलमा फसेको छ, सुधार्ने भन्दा बढाउन मेयर लाग्नुभयो’ पाठकले भने, ‘आम नगरबासी आएर आन्दोलन गर्ने दिन नआओस भनेर सच्चिने मौका दिएको हुँ ।’

नगरपालिकाको बिकासमा आएको करोडौ रकम नियमबस फिर्ता गराइएको, जनहितका काममा भन्दा व्यक्तिगत फाइदाका काममा लागेको लगायत आरोप समेत उनले लगाए । दिउँसो १ बजे निमित्त प्रमुख प्रशासकीय अधिकृत युक्तप्रसाद सुवेदी र पौडेलका निजी सचिव ऋषिराम गौतमको उपस्थितिमा ताला फोडिएको छ ।

Citizen

‘तालाबन्दीको बिषयमा पछि छलफल गर्ने गरी ताला फोडेका छौं’ गौतमले भने, ‘आँफू फर्केपछि छलफल गर्ने मेयरसापले भन्नु भएको छ ।’ बुधवार नगरप्रमुख पौडेल मुख्यमन्त्री सहभागि एक कार्यक्रममा गलकोट गएका छन् भने प्रमुख प्रशासकीय अधिकृत कुँवर सेवाकालिन तालिममा काठमाडौंमा छन् ।

प्रकाशित : जेष्ठ २, २०७६ १०:३७
ADVERTISEMENT
प्रतिक्रिया
पठाउनुहोस्
ADVERTISEMENT

सफाइ कर्मचारी आन्दोलित

कान्तिपुर संवाददाता

धनुषा — जनकपुर उप–महानगरपालिकामा कार्यरत ज्यालादारी सरसफाइ मजदुर आन्दोलित भएका छन्  । दैनिक ज्यालादारीको नियुक्त पत्र र चार महिनादेखि नपाएको तलब तत्काल पाउनु पर्ने माग गर्दै सरसफाइ कर्मचारी सरसफाइ ठप्प गरी धर्ना बसेका हुन्  ।

उप–महानगरका मेयर लालकिशोर साहलाई नियुक्ति पत्रका लागि पटक–पटक जानकारी गराए पनि पहल नभएपछि काम छोडेर धर्नामा बसेको सरसफाइ कर्मचारी बाबुल मेस्तरले बताए ।

दैनिक काम गरेर पाउने ज्यालाबाट नै घर परिवार चल्ने भएकाले चार महिनासम्म ज्याला नपाएपछि आन्दोलन गर्न बाध्य भयौं, बाबुलले भने, ‘तलब नपाउँदा हातमुख जोड्नै समस्या भएको छ । चार महिनासम्म तलब नपाउँदा पसलको उधारो समेत बुझाउन सकिएको छैन ।

उधारो पैसा महिनौंसम्म नबुझाएकै कारण दैनिक उपभोग्य समान खरिद गर्न नसक्दा परिवार चलाउन समस्या भएको छ ।’ दैनिक ज्यालमा काम गरेका ५६ जना सरसफाइ कर्मचारी उप महानगरबाट ४ महिनाको तलब पाउन नसकेको मेस्तरले बताए ।

दैनिक ६ सयका दरले पाउने ज्याला पटक–पटक मग्दा समेत नपाएपछि उपमहानगरको सरसफाइ ठप्प गरेर कर्मचारी आन्दोलित भएका हुन् । कर्मचारी ४ दिन देखि सरसफाइ छोडेर आन्दोलन गर्दा जनकपुरको सडक फोहरदे दुर्गन्धित बनेको छ । पसल, होटल र घर अगाडि ४ दिनसम्म थुप्रेको फोहर गन्हाउन थालेको छ ।

उप महानगरले संकलन गर्ने फोहर लामो समय सम्म उठन सकेको छैन । घरको फोहर सडकमा थन्किएको छ । बजार क्षेत्र फोहरले कुरुप बनेको छ । फोहरले सडक पेटीमा हिडन समस्या भएको छ ।कर्मचारीलाई तलब खुवाउन र भर्ना गर्न संघ सरकरको कानुन बाधक बनेको उप महानगरकी उप मेयर रीताकुमारी मिश्रले बताइन ।

सरसफाइ कर्मचारीलाई करार सेवामा नियुक्त गर्ने प्रक्रिया अगाडि बढाइएको मिश्रले बताइन । संघ सरकारले कर्मचारीलाई तलब दिन नमिल्ने बताएपछि अर्को प्रक्रिया सुरु गरी सरसफाइ कर्मचारीलाई नियुक्त र तलब दिने तयारी भएको उनले बताइन् ।

प्रकाशित : जेष्ठ २, २०७६ १०:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT