बाढीले क्षति

कान्तिपुर संवाददाता

बागलुङ — भीषण बर्षाले जिल्लामा करोडौं मूल्य बराबरको भौतिक संरचनामा क्षति पुर्‍याएको छ । सबैभन्दा धेरै बागलुङ नगर खानेपानीको निर्माणाधिन योजनामा क्षति भएको छ । 

सडक, सिँचाइ योजना, पक्की पुल र खेतीपातीको विवरण भने करोडौं रहेको प्रहरीले जनाएको छ । ‘क्षतिको पूर्ण विवरण आएको छैन, तर करोडौंका योजना छन्,’ प्रहरी नायब उपरीक्षक झविन्द्र भट्टराईले भने, ‘विवरण
संकलन भइरहेको छ ।’ खानेपानी आयोजनाका लागि निर्माणाधिन २ वटा पानी संकलन ट्यांकी बगाएको प्रबन्धक हिमाल शर्माले बताए ।

बगाएको स्थानमा बगर र पानी भरिएकाले तत्काल मर्मत गर्नपनि समस्या छ । खानेपानी तथा सरसफाइ उपभोक्ता समिति, खानेपानी तथा सरसफाइ डिभिजन लगायतका प्राविधिक टोलीले क्षतिको विवरण र थप क्षति रोक्ने काम थालिरहेको समितिका सचिव रामबहादुर केसीले बताए ।

बाढीकै कारण गलकोट नगरपालिका– १ दुदिलाभाटीमा सयौं रोपनी जमिनमा लगाएको बाली नष्ट भएको छ । गौंदीखोला बढेर घर र मध्यपहाडी लोकमार्गको पुल समेत जोखिममा पारेको छ । स्थानीय रामबहाुर नेपालीको निर्माणाधीन घरमा क्षति पुगेर यसअघि नै अलपत्र परेको घरमा थप क्षति भएको उनले गुनासो गरे ।

घर बगाएपछि नेपालीसहित स्थानीय धेरै घरपरिवारको बसाइमा समस्या परेको छ । ऋण खोजेर बनाउन लागेको घर बनाउने र ऋण तिर्ने समस्यामा उनी चिन्तित छन् । ‘सयौं रोपनी जमिनमा लगाएको बाली समेत नष्ट भएको छ, विवरण आईरहेको छ,’ गल्कोट नगरप्रमुख भरत शर्मा गैह्रेले भने, ‘बिचल्ली पर्न लागेकालाई पुनस्थापना र भौतिक संरचना मर्मत गर्न ठूलो बजेट लाग्नेछ ।’

प्रकाशित : जेष्ठ ११, २०७६ ०९:४९
ADVERTISEMENT
प्रतिक्रिया
पठाउनुहोस्
ADVERTISEMENT

दान गर्नेको ओइरो

कान्तिपुर संवाददाता

पर्वत — घर अघिल्तिरै शिवपार्वतीको अग्लो मूर्ति बन्ने भएपछि कुस्मा–४ का सागर कर्माचार्यले एक रोपनी जग्गा गुप्तेश्वर गुफा धार्मिक पर्यटकीय समितिलाई दान गरे । बजार क्षेत्रको उनको जग्गा प्रचलित मूल्यअनुसार कम्तीमा ५० लाख पर्छ ।

कोटिहोम दुर्लभ यज्ञ भएको भन्दै लमजुङको मध्यनेपाल नगरपालिकाका नगरप्रमुख रमेशकुमार पाण्डेले ३ लाख एक हजार एक सय ११ रुपैयाँ दान गरे ।

कुस्माको गुप्तेश्वर गुफाको प्रचार गरि आकर्षक धार्मिक पुर्वाधार बनाउने गरि जेठ १ देखि कुस्मा बजारमा ११ दिने कोटिहोम महायज्ञ आयोजना गरिएको हो । हिन्दु धर्मका ग्रन्थहरूमा वर्णन हुने शिव र पार्वतीको सम्बन्धसँग जोडिएको गुप्तेश्वर गुफालाई धार्मिक महत्त्व बढाउन र विभिन्न पूर्वाधार निर्माण गर्न यज्ञको आयोजना गरिएको हो ।

यज्ञबाट संकलित रकमबाट शिवपार्वतीको मूर्तिका साथै तीर्थयात्रीका लागि २०८ कोठाको अत्याधुनिक भवन निर्माण गर्ने आयोजक समितिका मूल संयोजक पृथ्वीनारायण शर्माले बताए । ‘पार्वतीको जन्मथलो पाङ भएको कुरा प्रचार भएकै छैन,’ उनले भने, ‘शिवको बासस्थान र पार्वतीले तपस्या गरेर शिवलाई पाएको यही भूमि हो भनेर चिनाउन आवश्यक छ । यज्ञपछि बन्ने संरचनाले त्यो पुष्टि गर्न थप बल पुग्नेछ ।’

पार्वतीको जन्मस्थान पाङ र गुप्तेश्वर गुफाको महत्त्व धार्मिक ग्रन्थमा वर्णन गरेअनुरुप चर्चा पाउन नसकेको भन्दै पण्डित इश्वरकृष्ण भुर्तेलको अगुवाइमा यज्ञ आयोजना गरिएको हो । यस्तो प्रकृतिको यज्ञ बिरलैमात्र हुने दाबी गर्दै प्रमुख बाचक एवं यज्ञका संकल्पकर्ता पण्डित भुर्तेलले उक्त यज्ञमा अपेक्षा गरेभन्दा अधिक सहयोग प्राप्त भएको बताए ।

‘शिवपार्वतीको महिमा बुझेर स्वस्फुर्त दान गरेको देख्दा म चकित छु,’ उनले भने, ‘भक्तहरूले जुन उत्साहका साथ दान गर्नुभएको छ, त्यहि उत्साहसाथ पुर्वाधार बनाइनेछ ।’ त्यसको आर्थिक स्रोतमा अहिले सञ्चालित कोटिहोम एवं सामुहिक तुलादान महायज्ञ पहिलो खुटकला मात्रै भएको उनले बताए । यसपछि लगत्तै धार्मिक संरचना निर्माणका लागि कम्तिमा ४० करोड आवश्यक पर्ने आयोजक समितिले जनाएको छ ।

विश्वकै अग्लो शिवपार्वतीको मुर्ती बनाउन डेढ सय बढीले एक–एक लाख रुपैयाँ दान गरिसकेका छन् । त्यस्तै १०८ शिवलिङ्ग निर्माणका लागि करिव ६० जनाले ५० हजार सहयोग गरेको यज्ञ आयोजक समितिका कोषाध्यक्ष कमलनाथ शर्माले बताए । २५१ जना संस्थापकहरूको सहयोग रकमबाट उक्त मूर्ति बनाइने समितिले जनाएको छ ।

प्रकाशित : जेष्ठ ११, २०७६ ०९:४९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT