खानेपानी शुद्धीकरण परियोजना सुरु

विना थापा

(कास्की) — पोखरेलीले अबको ३ वर्षपछि धारामै शुद्ध खानेपानी पाउने भएका छन्  । पोखरामा ल्याइएको मुख्य स्रोत मर्दीखोला खानेपानी आयोजना शुद्धीकरण परियोजना सुरु भएपछि पोखरावासीले शुद्ध खानेपानी पाउने भएका हुन्  ।

जापान अन्तर्राष्ट्रिय सहयोग नियोग (जाइका) को सहयोगमा परियोजना सुरु भएको हो । शुद्ध पानीसँगै चौबीसै घण्टा सबै घरका धारामा पानी पुर्‍याउनका लागि वितरण प्रणाली पनि सुधार गरिने भएको छ । जाइकाले ४ अर्ब ८१ करोड ३० लाख रुपैयाँ अनुदान सहयोगमा परियोजना बन्नेछ । परियोजनाको खानेपानीमन्त्री विना मगरले मंगलबार शिलान्यास गरिन् । जापानकै हाजमा एन्दो कर्पोरेसनले निर्माणको जिम्मा पाएको र सन् २०२२ सम्ममा परियोजना सक्ने लक्ष्य छ ।

परियोजना निर्माणसँगै विश्व स्वास्थ्य संगठन (डब्लूएचओ) को मापदण्डअनुसारको प्रशोधित शुद्ध पानी पोखरेलीका घरमा आउनेछ । पानी शुद्धीकरणका लागि सबै प्रकारका जीवाणु मार्ने, थिग्राउनेलगायत आवश्यक तरिका अपनाइनेछ । पानी संकलन ट्यांकी, मुख्य र सहायक पाइपलाइन विस्तारसमेत हुनेछ । पोखरादेखि ११ किलोमिटर पश्चिमोत्तर मर्दीखोलाबाट पानी ल्याइएको छ । परियोजनाको शिलान्यास गर्दै मन्त्री मगरले समयमै काम सकिने विश्वास गरिन् ।

प्रशोधित पानीले जन्डिस, टाइफाइडलगायत ८० थरीका रोगबाट बच्न सकिने उनले बताइन् ।
पानी प्रशोधनका लागि आवश्यक १ सय ४० रोपनी जग्गा महानगरले उपलब्ध गराएको खानेपानी संस्थान पोखराका प्रमुख निरण महर्जनले बताए । उनका अनुसार परियोजनाअन्तर्गत मर्दी मुहान नजिक बालुवा हटाउने ४ वटा ट्यांकी बन्नेछन् । यसको क्षमता ४ करोड १ लाख लिटर प्रतिदिन रहेको छ ।

त्यसैगरी थप ४ वटा पानी थिग्राउने ट्यांकी, पानी छान्ने फिल्टर ६ वटा, सफा पानी संकलन टंकी ९ सय ३० घनमिटरका २ वटा र क्लोरिनेसन प्लान्ट रहनेछन् । त्यसैगरी पोखराको पर्स्याङ, फूलबारी र कोलपाटनमा २० लाख लिटर क्षमता (ओभरहेड) ट्याकीसमेत बन्नेछन् । आवश्यक पाइपलाइन विस्तार र उपकरण पनि जडान गरिनेछ । पोखरामा दैनिक ५ करोड ४ लाख लिटर पानीको माग छ ।

आयोजना सम्पन्नपछि आयोजनाले समेटेको क्षेत्रमा साताभरि नै चौबीसै घण्टा पानी आउनेछ । परियोजना निर्माणका लागि १५ फेब्रुअरी २०१७ मा सम्झौता भएको थियो । खानेपानी संस्थानका पूर्वअध्यक्ष परमेश्वर पोखरेलले सन् २००४ देखि शुद्धीकरणको कुरा उठे पनि १३ वर्षपछि जाइकासँग सम्झौता भएर अहिले निर्माण प्रक्रियामा पुग्दा खुसी लागेको बताए । आयोजना सन् २०२२ को अन्तिममा सम्पनन हुनेछ ।

आयोजनाले समेटेको क्षेत्र पोखराको १ देखि १९ वडासम्म रहेको छ । सन् २०१५ मा यी वडामा ३ लाख ४ हजार ८ सय ६९ जनसंख्या रहेको र सन् २०२५ सम्ममा ४ लाख ५ हजार ८ सय ८१ हुने अनुमान गरिएको छ । कार्यक्रममा गण्डकी प्रदेशका भौतिक पूर्वाधार विकासमन्त्री रामशरण बस्नेतले प्रदेशमा एक घर एक धारा अभियान थालिएको बताए ।

खानेपानी संस्थानका महाप्रबन्धक भुपेन्द्रप्रसादले आयोजना निर्माणका लागि संस्थान र निर्माण कम्पनीबीच ८ मार्च २०१९ मा सम्झौता भएको बताए । नेपालका लागि जापानी राजदूत मासामिची साइगोले शुद्ध खानेपानी खुवाउने जापान सरकारले सहयोग गरेको बताए ।

प्रकाशित : जेष्ठ २९, २०७६ १२:२९
प्रतिक्रिया
पठाउनुहोस्

रातु पुल ९ महिनामै खाल्डै-खाल्डा

सुनीता बराल

(बर्दिवास) — पूर्वपश्चिम राजमार्गको महोत्तरी र धनुषा जोड्ने रातु पुल प्रयोगमा आएको ९ महिना नबित्दै भत्कन थालेको छ  । कालिका टु दी रसुवा जेवी कम्पनीले निर्माण गरेको रातु पुलमा गत असोज महिनाबाट सवारी आवागमन खुल्ला गरिएको थियो  ।

पुल संचालनमा आएको थोरै समयमै माथिको कालोपत्रे उप्केर अहिले ठूल्ठूला भ्वाङ परेका छन् । २०७६ पुसभित्र निर्माण सम्पन्न गर्ने सम्झौता भएको पुल डेढ वर्षअगावै बनेको भन्दै स्थानीय खुसी भएका थिए । अहिले प्रयोगमा आउना साथ पुल भत्कन थालेपछि स्थानीयमा पुल दिगो नहुने हो कि भन्ने चिन्ता सुरु भएको छ ।
बर्दिवास–१ की रिदिमा सिंहले रातुको पुरानो पुल भत्किएपछि पाएको सास्ती सम्झँदै नयाँ पुल बनेपछिको खुसी पनि धेरै टिक्न नसकेको बताइन् । ‘पुलमा भएका खाल्डा हेर्दा स्तरीय बनेनछ भन्ने लागेको छ,’ उनले भनिन्, ‘पुरानो पुल पनि काम नलाग्ने भयो । नयाँ पुल पनि धेरै टिक्ने देखिंदैन ।’

पूर्वपश्चिम राजमार्गमा पर्ने रातु नदीमा २०२६ सालमा बनेको पुल २०७१ को बाढीले भासिएको थियो । पुल भासिएपछि आवतजावतमा कठिनाइ भएसँगै नयाँ पुल निर्माण गरिएको हो ।२४ करोड ६० लाखमा निर्माण खर्चेर बनेको पुल सञ्चालनमा आएको ९ महिनामै २० वटाभन्दा बढी भ्वाङ परेपछि धरापजस्तै देखिएको छ ।

सडक विभाग र निर्माण ठेकेदार कम्पनिको सम्झौताअनुसार अझै पुल सडक विभागले जिम्मा लिने समय नभएकाले उक्त निर्माण कम्पनीले विभाग पुल नबुझाउँदै भत्किन थालेको हो । पुलमा कालोपत्रे उप्केर भ्वाङ बनेपछि अहिले निर्माण कम्पनीले गुणस्तरीय काम नगरेको गुनासो बढेको छ ।

निर्माण कम्पनीका साइट इन्चार्ज कृष्ण ढुंगेलले भने आफूहरूले स्तरहीन काम गरेको नभई रंगरोगन गर्ने बेलाको असावधानीले कालोपत्रे उप्केर भ्वाङ परेको दाबी गरे । ‘हामीले गुणस्तरीय निर्माण सामग्रीको प्रयोग गरेर नै पुल निर्माण गरेका हौं,’ उनले भने, ‘रंगरोगन गर्ने फरक कम्पनीले काम गर्दा ‘थिनर’ भनिने केमिकल जहाँ पर्‍यो त्यही पिच उप्केर भ्वाङ परेको पाइयो ।’ पुल भत्किनुको कारण पत्ता लागिसकेकाले अब केमिकल परेको कालोपत्रे उप्काई पुलको पुनः मर्मत गरिने उनले बताए ।

प्रकाशित : जेष्ठ २९, २०७६ १२:२८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT