झरीमा लगाएको कालोपत्रे उप्कियो

आश गुरुङ

(लमजुङ) — आर्थिक वर्षको अन्तिमतिर आएर बेंसीसहरको मनाङे चौतारादेखि सेराबजारसम्मको सडकको ओभरले (पुरानो कालोपत्रेमाथि कालोपत्रे) सुरु गरिएको छ  । गत वर्षभन्दा यसपटक चाँडै पानी पर्न थालेको छ  ।

तर, सडकको मर्मत भने झरीमा समेत जारी छ । पुरानो कालोपत्रेबाट ३ सेन्टिमिटर पुनः नयाँ बिटुमिन राखेर गरिएको कालोपत्रे उक्किन थालेको छ । मनाङे चौताराका पूर्णचन्द्र घिमिरेले वर्षायामको समय गरिने विकास राम्रो नहुने बताए । ‘कालोपत्रे गर्दै आयो । हेर्दा राम्रो देखियो । केही गिट्टी पनि मिसिएको जस्तो देखिन्छ’ उनले भने, ‘गाडी हिँडैमा कालोपत्रे उक्कियो । गाडी फर्काउँदा भत्कियो । खै के हो, बुझ्नै सकिएन ।’

करिब ९ सय मिटर सडक ओभरले गर्नुपर्नेमा सडक मर्मत सुरु गरिएको एक महिनाको अवधिमा पुरानो बैंक चोकसम्म करिब ३ सय मिटर ओभरले गरिएको छ । ‘पानी परेको बेलासमेत काम गर्छन्,’ हाइस्कुलचोकका राजु थापाले भने । सडक मर्मत भए पनि राम्रो हुन नसकेको उनले बताए । ‘अलकत्र केही ठाउँमा नलागेको देखियो । यसरी अडिन्छ त ? भन्दा बाक्लो हाले त उकिन्छ भनेर कामदारले जवाफ दिए,’ उनले भने ।

सडक डिभिजन दमौलीले बेंसीसहर बजारभित्रको मुख्य सडकको लेयरमा कालोपत्रेको काम सुरु गरेको हो । बजार एरियारमा ‘ओभरले’ गर्न सुरुमा खाल्डो टालेर पछि पुरानो कालोपत्रेमाथि कालोपत्रे थप राखिएको छ । कुल १ करोड रुपैयाँको स्टेमेट भ्याटबाहेक ७७ लाख २७ हजारमा ठेक्का निकालिएको थियो । बेंसीसहर नगरपालिका प्रमुख गुमानसिंह अर्यालले अनुगमन र निरीक्षण राम्रो हुन नसक्दा काम पनि राम्रो नभएको बताए । ‘अहिले मात्रै होइन, यहाँको मर्मत कहिल्यै राम्रो हुन सकेन । कति भनें, भनें’ उनले भने, ‘पहिले राम्रैजस्तो लाग्छ, पछि बिग्रने गरेको छ ।’

डिभिजन सडक कार्यालयअन्तर्गत लमजुङको एकाइ कार्यालयका सब–इन्जिनियर हरिकुमार श्रेष्ठले काम राम्रो भएको दाबी गरे । कालोपत्रे भने केही ठाउँमा उक्किएको उनले स्विकारे । ‘ओभरलोड गाडी गुडा, गाडी थन्क्याउँदा तथा फर्काउने, घुमाउने ठाउँमा छेउछाउ केही उक्किएको छ । केही ठाउँमा भत्किएको पनि छ,’ उनले भने, ‘त्यसलाई मर्मत गर्न निर्माण व्यवसायीलाई भनिसकेका छौं ।’

कालोपत्रे हालिसकेपछि कम्तीमा ७२ घण्टा राख्नुपर्नेमा गाडीका पांग्रा घुमाउँदा उक्किएको उनले बताए । उनले वर्षायामको समय पानी पर्ने भएकाले पानी पर्दै गर्दा काम नगर्न आग्रह गरिएको बताए ।

उक्त काम सक्न असार मसान्तभित्रको समयसीमा छ । पोखरास्थित भान्जा एसआर जेभीले वैशाख १० गते सम्झौता गरेर काम अघि बढाएको सडक कार्यालयका डिभिजन इन्जिनियर विष्णुप्रसाद काफ्लेले बताए । उनका अनुसार सुरुमा सडकको खाल्डाखुल्डी पुरिएको र त्यसपछि अलकत्र हालेर कालोपत्रे गरिएको छ । ‘तोकिएको समयमा काम सक्छौं’ उनले भने ।

प्रकाशित : जेष्ठ २९, २०७६ १२:३२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

खरको छानो विस्थापित हुँदै

प्रताप रानामगर

(दमौली) — ‘आर्थिक अवस्था कमजोर भएकाले चाहेर पनि घर जस्तापाताले छाउन सकिएको थिएन,’ तनहुँको रिसिङ गाउँपालिका–८ पनियरथोकका अम्बीसरा थापाले भनिन्, ‘अहिलेसम्म खरको छानामुनि बस्दै आएका थियौं  । अब खर विस्थापित गरेर जस्ता पाताले घर छाउन गाउँपालिकाले सहयोग गर्ने खबरले खुसी छु  ।

खरको छाना भएको घर गर्मीमा शीतल र जाडोमा न्यानो हुने भए पनि सर्प र आगलागीको खतरा बढी हुने भन्दै उनले सजिलै खर पनि नपाउँदा समस्या झैल्दै आएको बताइन् ।

घर जस्तापाताले छाउन पाएर खुसी हुने उनी एक्ली होइनन् । गाउँपालिकाभरका करिब ३ सय परिवारमा यतिबेला उत्साह छाएको छ । गाउँपालिकाले खरको छानमुक्त घर बनाउने अभियान थालेपछि स्थानीयले राहत महसुस गरेका छन् । ‘गापालाई खरको छानोमुक्त घर बनाउने अभियान थालेका छौं,’ गापा अध्यक्ष राजेन्द्रकृष्ण श्रेष्ठले भने, ‘खरको छानो भएका सबै घर जस्तापाताले छाउने हो । यसका लागि यसवर्ष ४० लाख रुपैयाँ बजेट छुट्टाएका छौं ।’ श्रेष्ठका अनुसार साता दिनमै अभियान खर विस्थापित अभियान सुरु हुनेछ ।

गापाको १ देखि ८ वटासम्म खरको छाना भएका घरको तथ्यांक निकाल्ने क्रममा २ सय ८० घरमा खरको छाना रहेको पहिचान भएको छ । उनीहरूलाई प्रतिघर २ बन्डल जस्तापाता दिइने गाउँपालिका प्रशासन शाखाका नासु उमाकान्त पौडेलले बताए । ‘हप्ता दिनबाट कार्यक्रम सञ्चालन हुने तयारी गरिरहेका छौं,’ उनले भने, ‘जस्तापाताले घर छाउन आवश्यक संरचना भने घरधनीले नै बनाउनुपर्छ ।’ संरचनाका लागि भने प्राविधिकले सहयोग गर्नेछन् ।

प्राविधिकको सिफारिसको आधारमा जस्तापाता खरिद गर्न गाउँपालिकाले रकम निकासा गर्छ । रकम गापाकै आन्तरिक बजेट हो । नपुगे थपिने अध्यक्ष श्रेष्ठले बताए । सुरक्षित नागरिक आवास कार्यक्रममार्फत संघीय सरकारले पनि गाउँपालिकाका ४९ घर छनोट गरेको छ । खरको छानोमुक्त गर्नका लागि प्रतिघर ५० हजार रुपैयाँका दरले लाभग्राहीले अनुदान पाउनेछन् । यस कार्यक्रमले दलित, असहाय, विपन्न समुदायलाई प्राथमिकता दिएको उनले बताए । छनोट भएका घरका लाभग्राहीले गाउँपालिकाको सुविधा पाउने छैनन् ।

सरकारी अनुदानबाट जस्ताले घर छाउने रहर पूरा हुने भएकोमा स्थानीय दंग छन् । छिमेकी जस्तापाता र ढुंगाले छाएको घरमा बसेको देख्दा रहर लागेको तर हैसियत नभएको त्यत्तिकै बस्नुपरेको थापाले बताइन् । प्रत्येक ३ वर्षमा खरको छाना फेर्नुपर्थ्यो । पछिल्लो समय पर्याप्त खर पनि पाइँदैन । एउटा घरको छाना छाउन डेढ सय भारी खर चाहिन्छ । प्रतिभारी डेढ सय रुपैयाँ पर्छ । खर भए पनि घर छाउन सिपालु पाउन मुस्किल हुन्थ्यो ।

प्रकाशित : जेष्ठ २९, २०७६ १२:३०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT