ल्यान्डफिल नहुँदा सेतीमा फोहोर

प्रताप रानामगर

दमौली — तनहुँको भिमाद नगरपालिकामा ल्यान्डफिल साइट नहुँदा बजारको फोहोर सेती नदीमा फाल्ने गरिएको छ । अव्यवस्थित रुपमा फालिने फोहोरका कारण नजिकको बस्तीमा दुर्गन्ध फैलिएको छ भने नदी पनि प्रदूषित हुने गरेको छ । 

भिमाद–६ साँढेहुलस्थित नदी किनारमा फोहोर फालिँदा नजिकैको जनज्योति क्याम्पस र म्याग्दे–५ छाङपाटन बस्तीमा दुर्गन्ध फैलिएको हो । दुर्गन्धले गाउँमा बसिनसक्नु भएको स्थानीय मीरा थापाले बताइन् । ‘फोहोरको दुर्गन्धले बसी खप्नु छैन,’ उनले भनिन्, ‘घरमा बस्दा पनि नाक थुन्नुपर्छ ।’ पशुजन्य हाडखोर र सडेको छाला र फोहोरमा आगो लगाउँदा गन्धले सासर्फेर्न गाह्रो हुने उनले बताइन् ।

फोहोर नफाल्न भिमाद नगरपालिकालाई पटकपटक अनुरोध गरे पनि सुनुवाइ नभएको स्थनीयले बताएका छन् । फोहोरको दुगर्न्धले गाउँका २ सय घर परिवारलाई असर पारेको छ । म्याग्दे–५ का वडाध्यक्ष शिवबहादुर आलेले फोहोरको दुर्गन्धले छाङपाटनमा असर परेको बताए । ‘फोहोरले पारेको असर र जनताको गुनासो भिमादलाई पत्राचार गरी जानकारी गराएका छौं,’ उनले भने, ‘तर, सुनुवाइ भएन ।’

गाउँपालिकाले पनि पत्राचार गर्दै फोहोर व्यवस्थापन गर्न भनेको उनले बताए । फोहोरको दुर्गन्ध जनज्योति क्याम्पसमा परिसरसम्म आएको क्याम्पस प्रमुख केशवराज काफ्लेले बताए । फोहोरमैलाको व्यवस्थापन गर्न सकिएन भने पठनपाठनमा समस्या देखिने उनको भनाइ छ ।

भिमादको प्रमुख समस्या ल्यान्डफिल साइड रहेको नगरप्रमुख मेखबहादुर थापाले बताए । ‘यो दीर्घकालीन समस्याको रूपमा छ,’ उनले भने, ‘ल्यान्डफिलका लागि जग्गाको खोजी भइरहेको छ । तर टुंगो लागेको छैन ।’ वडा ६ र ७ बाटै स्थायी ल्यान्डफिल साइडको खोजी भइरहेको उनले बताए ।

रातढुंगा क्षेत्रमा ल्याण्डफिलका लागि अध्ययन भइरहेको उनको भनाइ छ । बजारबाट निस्केका फोहोरलाई व्यवस्थित गर्नका लागि फोहोरको वर्गीकरण गर्नुको विकल्प नभएकाले कुहिने र नकुहिने वर्गीकरण गरेर व्यवस्थापन गर्ने तयारी भइरहेको उनले बताए ।

तनहुँ उद्योग वाणिज्य संघ भिमाद बजार एकाइले नगरपालिकाको सहयोग र समन्वयमा ५ वर्षदेखि फोहोरमैला व्यवस्थापन गर्दै आएको छ । संघका सचिव दयानिधि पौडेलले बजारलाई सफा र स्वच्छ बनाउन फोहोरमैला संकलन गरेर व्यवस्थापन गरेको बताए । भिमाद बजारबाट सातामा १२ देखि १४ ट्याक्टर फोहोर संकलन हुन्छ । बजारका एक हजार ५ सय १० घरधुरीबाट रकम उठाएर फोहोर संकलन गरिन्छ ।

प्रकाशित : असार १०, २०७६ १०:२३
प्रतिक्रिया
पठाउनुहोस्

प्रदेश बजेटमा सत्तापक्षकै असन्तुष्टि

कान्तिपुर संवाददाता

लमजुङ — मर्स्याङदी गाउँपालिका ३ का अध्यक्ष प्रेम बस्नेतले गाउँपालिकामा प्रदेश सरकारले बजेट नपारेको भन्दै असन्तुष्ट व्यक्त गरे ।उनले आफ्नो फेसबुक स्टाटसमा व्यंग्य गर्दै लेखेका छन्, ‘लमजुङबाट प्रदेश र संघमा प्रतिनिधित्व गर्नुहुने माननीयज्यूहरूबाट सही उत्तर आएमा सरदार वीरभक्ति स्वर्ण पदबाट विभूषित गरिनेछ ।’

लमजुङको मनाङसँग जोडिएको एक मात्र गाउाँपालिकाको नाम भन्नुहोस् ? जिल्लाबाट संघ र प्रदेशमा प्रतिनिधित्व गर्ने सांसदलाई उनले सोधेको र फरक–फरकउत्तर आएको भन्दै उनले नेताले दिएको उत्तरसमेत लेखेका छन् ।

आफ्नै निर्वाचन क्षेत्रको मर्स्याङदी गाउँपालिकामा बजेटबारे जानकारी लिन खोज्दा प्रदेश सांसद धनन्जय दवाडीले थाहा छैन भन्ने जवाफ दिएको उनले लेखेका छन् । गण्डकी प्रदेश नेकपा संसदीय दलका प्रमुख सचेतक मायानाथ अधिकारीलेराइनास क्षेत्रमा बजेट पारेको, मुख्यमन्त्री पृथ्वीसुब्बा गुरुङले पास गरेको, राष्ट्रिय सभा सदस्य दीपा गुरुङले क्व्होलासोंथर, प्रदेश सांसद मधु अधिकारीले दोर्दी गाउँपालिका, लमजुङबाट निर्वाचित संघीय सांसद एवं नेकपा प्रमुख सचेतक देव गुरुङले समय सकियो भन्ने जवाफ दिएको उनले फेसबुकमा लेखेका छन् ।

उनको स्टाटस धेरैले कपी गरेर शेयर गरेका छन् । कमेन्टमा मर्स्याङदी गाउँपालिका ७ का अध्यक्ष युवक घलेले मर्स्याङदी भन्ने पनि एउटा स्थानीय तह छ र यो स्थानीय तहबाट यहाँहरुलाई राम्रै भोट आएको छ भनेर सुनाइदिन आग्रह गरेका छन् । मर्स्याङदी गाउँपालिकामा बजेट नपारिएको भन्दै सामाजिक सञ्जालमार्फत विरोध गर्नेहरु जनप्रतिनिधि साथै नेकपाका नेता कार्यकर्ता छन् । नेकपा मर्स्याङदी गाउँपालिकाले पार्टीका नेता तथा जनप्रतिनिधिलाई बोलाएर बैठक नै डाकी गाउँपालिकामा प्रदेश सरकारले बजेट नपारेको भन्दै माइन्युटमै असन्तुष्टि व्यक्त गरेका छन् ।

नेकपा मर्स्याङदी गाउँ कमिटी अध्यक्ष धनसिंह तामाङले शनिबार बैठक बसेर प्रदेश सरकारले मर्स्याङदी गाउँपालिकामा बजेट नपारेको भन्दै असन्तुष्टि व्यक्त गरेको बताए । ‘बजेट नै नपारेको त होइन । तर, थोरै बजेट पार्‍यो । केही बजेट सिँचाइ र खानेपानीमात्रै छन् । पूर्वाधार विकासमा छैन’ उनले भने, ‘हामीले जिताएर पठाएका सांसदले समेत हामीलाई नहेरेपछि असन्तुष्टि जनाउन बाध्य भयौं ।’

बैठकमा पूर्व सांसद एवं नेकपा गण्डकी प्रदेश सदस्य जमीन्द्रमान घले, प्रदेश सदस्य बमबहादुर थापा, गाउँपालिका अध्यक्ष अर्जुन गुरुङ, उपाध्यक्षहोमबहादुर विक, मर्स्याङदी १ का अध्यक्ष रुद्रमान गुरुङ, २ का अध्यक्ष चेतबहादुर गुरुङ, ३ का अध्यक्ष प्रेम बस्नेत, ४ का अध्यक्ष सुमन गुरुङ, ८ का अध्यक्ष हिरादेवी घले लगायत समेतले बैठकमा सहभागि भएर असुन्तष्टि व्यक्त गरेका थिए । प्रदेश सांसद धनञ्जय दवाडीले मर्स्याङदी गाउँपालिकामा सडकबाहेकका योजना परेको दावी गरे । ‘सिँचाइ, खानेपानी, झोलुंगे पुल परेको छ । मैले सडककोयोजना मागेकै हुँ ।’

प्रकाशित : असार १०, २०७६ १०:२२
पूरा पढ्नुहोस्
प्रतिक्रिया
पठाउनुहोस्