प्रदेशसभा बिजनेसविहीन

प्रतीक्षा काफ्ले

गण्डकी — विधेयक लगायत कुनै पनि विषय नभएपछि गण्डकी प्रदेशसभा बिजनेसविहीन भएको छ । प्रदेश सरकारले नयाँ विधेयक नल्याएको र दर्ता भएका केही विधेयक पनि छलफल गरी प्रक्रिया अघि बढाउन कानुनी बाधक बनेपछि प्रदेशसभा बैठक लामो समयका लागि स्थगित गरिएको छ ।

यही जेठ १५ मा सुरु भएको वर्षे अधिवेशनमा नीति तथा कार्यक्रम र बजेट पारित भएको छ । गत शुक्रबार बजेट पारित भएपछि बिजनेसविहीन प्रदेशसभाको आगामी बैठकसाउन ५ मा बोलाइएको छ ।

नयाँ विधेयक नभएका कारण प्रदेशसभा बैठक लामो समय स्थगित गर्नुपरेको प्रदेशसभा सचिवालयका सचिव हरिप्रसाद बाँस्तोलाले बताए । प्रदेशसभामा तीन विधेयक दर्ता भएर बसेका छन् । त्यसमध्ये प्रदेशसभा सचिवालय सम्बन्धमा व्यवस्था गर्न बनेको विधेयक एक वर्षदेखि विधायन समितिमा गएर अड्किएको छ ।
त्यसैगरी प्रदेश लोकसेवा आयोग सम्बन्धमा व्यवस्था गर्न बनेको विधेयक पनि विधायन समितिमै छलफलका क्रममा छ । प्रदेश सवारी तथा यातायातसम्बन्धी व्यवस्था गर्न बनेको विधेयक भने सचिवालयमा दर्ता मात्रै भएर बसेको छ । प्रदेशसभा सचिवालयसम्बन्धी विधेयकमा विशेष गरी सचिवालयको सचिव र समितिमा विपक्षी दलको सहभागिता विषयमा प्रमुख प्रतिपक्षी दलले संशोधन प्रस्ताव दर्ता गराएपछि विधेयकमाथि छलफल अघि बढ्न नसकेर विधायन समितिमा रोकिएको हो । प्रदेश सवारी तथा यातायात विधेयक भने संघीय सरकारबाट पारित नभएकाले
यहाँ छलफलै अघि नबढेको हो ।

कार्यव्यवस्था परामर्श समितिका सदस्य कुमारखड्काले प्रदेश सरकारले कानुन निर्माणमा प्राथमिकता दिएको भने पनि प्रयाप्त विधेयक नल्याउनु कमजोरी रहेको बताए । ‘के कारणले विधेयक नल्याइएको हो, सरकारले नै जानोस्,’ उनले भने, ‘एक/दुई विधेयक ल्याएर के गर्नु ।’ अब हुने प्रदेशसभा बैठकमा प्रदेश लोकसेवा विधेयक पारित होला, त्यसपछि फेरि पनि प्रदेशसभा बिजनेसविहीनकोअवस्था रहने उनले बताए ।

विधायन समितिका सभापति मोहनप्रसाद रेग्मीले विधेयकमाथि पर्याप्त, प्रभावकारी र सबैको हितमा हुने गरी छलफल गर्न लागिएकोदाबी गरे । ‘समितिमा दुई विधेयक छलफलका क्रममा छन्,’ उनले भने, ‘सबै पक्षसँग आवश्यक छलफल गरी प्रदेशसभामा लगिनेछ ।’

सरकारका प्रवक्ता भौतिक पूर्वाधार विकासमन्त्री रामशरण बस्नेतले केही विधेयक तयार भएका, केही मस्यौदा बनिरहेकाले अब प्रदेशसभा बैठकले निरन्तरता पाउने बताए ।

प्रकाशित : असार २४, २०७६ ११:०९
प्रतिक्रिया
पठाउनुहोस्

होहल्ला गर्ने पर्यटक पक्राउ

कान्तिपुर संवाददाता

पोखरा — लेकसाइड, खहरे, पृथ्वीचोकलगायत क्षेत्रमा होहल्ला गर्दै हिंड्ने पोल्यान्डका नागरिक पक्राउ परेका छन् । लागूऔषध र मादकपदार्थ सेवन गरी होहल्ला गरेर समाजमा अशान्ति फैलाएको भन्दै राकोल मार्सिन आइतबार पक्राउ परेका हुन् ।

उनको साथमा पासपोर्ट, भिसालगायत कुनै पनि कागजपत्र नभेटिएको पर्यटक प्रहरीले जनाएको छ । भारतबाट नेपाल प्रवेश गरी विभिन्न गतिविधि गरी अवैध रूपमा बसोबास गर्दै आएको प्रहरीले जानकारी दिएको छ । उनलाई आवश्यक कारबाहीका लागि अध्यागमन कार्यालय पोखरामा बुझाइएको छ ।

प्रशंसनीय नेतृत्व तालिम
पर्यटन व्यवसायी महिला संघ नेपाल (टेवान) ले सोमबार पोखरामा पर्यटन उद्यमशीलताका लागि प्रशंसनीय नेतृत्व तालिम आयोजना गरेको छ । पोखरामा रहेर पर्यटन व्यवसायमा आबद्ध महिलाको नेतृत्व क्षमता बढाउन तालिम आयोजना गरेको टेवानले जनाएको छ ।

तालिममा पर्यटन बोर्ड पोखराका प्रमुख मणिराज लामिछानेले तालिमले सफल उद्यमी बनाउन सहयोग पुग्ने बताए । नेपाल भ्रमण वर्ष २०२० का गण्डकी प्रदेश संयोजक अग्नी कँडेलले पर्यटन व्यवसायमा आवश्यक गुणस्तरीयता र आतिथ्यका लागि तालिम प्रभावकारी हुने उल्लेख गरे । ७० महिला उद्यमीलाई प्रशिक्षक श्रीकान्त खतिवडाले प्रशंसनीय नेतृृत्वमा आवश्यक गुणका बारेमा बताए ।

टेवानकी कार्यवाहक अध्यक्ष रेनु थापामगरले व्यावसायिक महिलाको क्षमता अभिवृद्धि गर्न तालिम आयोजना गरेको बताइन् । तालिमकी संयोजक शोभा अधिकारी पौडेलले तालिमबाट पर्यटन व्यवसायमा गुणात्मक विकास हुने आशा गरिन् ।

प्रकाशित : असार २४, २०७६ ११:०८
पूरा पढ्नुहोस्
प्रतिक्रिया
पठाउनुहोस्