कृषकलाई परिचयपत्र

कान्तिपुर संवाददाता

गण्डकी — स्याङ्जाको गल्याङ नगरपालिकाले कृषकलाई चार तहमा वर्गीकरण गर्ने भएको छ । कृषि र पशु सेवाको योजना तर्जुमा गोष्ठीले बिहीबार नगरभित्रका कृषकलाई ४ तहमा वर्गीकरण गर्ने निर्णय गरेको हो । 

कार्यविधि बनाएर सबै कृषकलाई परिचयपत्र बाँड्ने र त्यसैका आधारमा अनुदान उपलब्ध गराउने निर्णय भएको गल्याङ नगरपालिकाका पशु सेवा शाखा प्रमुख सुशील अर्यालले बताए । व्यावसायिक, व्यावसायिक उन्मुख, साना किसान र निर्वाहमुखी किसान गरी विभाजन गरिने छ ।

व्यावसायिक कृषकमा कम्तीमा ५ वटा दुधालु गाई/भैंसी, ५ वटा बाख्रा वा दस रोपनी जग्गामा व्यावसायिक उत्पादन गर्ने र ५ वटा टनेलमा व्यावसायिक कृषि खेतीमा संलग्न हुने कृषक पर्छन् । व्यावसायिक उन्मुख कृषकमा २ देखि ४ वटा दुधालु गाई/भैंसी, २ देखि ५ वटा बाख्रा र तीन रोपनीमा व्यावसायिक खेती गर्ने वा ५ वटा टनेलमा कृषि खेती गर्ने समेटिनेछन् ।

नगरपालिकाले बनाएको मापदण्डमा साना किसानअन्तर्गत ५ देखि १० वटासम्म दुधालु गाई/भैंसी, त्यत्ति नै संख्यामा बाख्रा, एकदेखि ३ रोपनीसम्म व्यावसायिक खेती गर्ने र ५ वटा टनेलमा कृषि खेती गर्ने किसान पर्छन् । निर्वाहमुखी किसानअन्तर्गत ५ वटासम्म दुधालु गाई/भैंसी, एक रोपनीभन्दा कम क्षेत्रमा खेती गर्ने र एकदेखि ५५ वटासम्म बाख्रापालन गर्ने किसान प्राथमिकतामा पर्छन् ।

प्रकाशित : श्रावण २७, २०७६ ०७:५८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

प्रसारण लाइनमा नयाँ ठेक्का

दस वर्षमा पनि काम पूरा नभएपछि ठेक्का तोडियो । विश्व बैंकको स्वीकृति आएपछि साउनभित्रै ठेक्का लगाउने तयारी
सुवास बिडारी

मकवानपुर — हेटौंडा–भरतपुर–बर्दघाट प्रसारण लाइनअन्तर्गत हेटौंडा–भरतपुर खण्डमा नयाँ ठेक्का आहवान गरिने भएको छ । भरतपुर–बर्दघाट खण्डमा कामले गति लिए पनि भारतीय कम्पनीसँग नेपाल विद्युत् प्राधिकरणले ठेक्का तोडेपछि हेटौंडा–भरतपुर खण्डमा भने काम ठप्प छ । 

‘तोकिएको भन्दा करिब आठ वर्ष ढिला हुँदा पनि काम सम्पन्न हुने छाँट नदेखिएपछि प्राधिकरणले ठेक्का रद्द गरेको थियो । अहिले नयाँ ठेक्का लगाउने प्रक्रिया सुरु भइरहेको छ,’ आयोजना प्रमुख ईश्वरी जैसवालले भने । उक्त आयोजनाप्रति विश्व बैंकले नै असन्तुष्टि जनाएपछि ठेक्का रद्द गरिएको हो । विश्व बैंककै ऋण सहयोगमा निर्माण भइरहेको थियो ।

‘दस वर्षमा पनि काम पूरा हुन नसकेपछि ठेक्का तोडिएको थियो । अब नयाँ ठेक्का प्रक्रियामा जाने तयारी छ । यो महिनाभित्र ठेक्का आह्वान हुन्छ । विश्व बैंकको स्वीकृति आउने बित्तिकै ठेक्का गर्छौं,’ जैसवालले भने ।

हेटौंडा–भरतपुर प्रसारण लाइनको काम ६४ प्रतिशत सकिएको अवस्थामा ठेक्का प्रक्रिया रद्द गरिएको छ । सन् २००९ मार्च ९ मा २ वर्षभित्र सम्पन्न गर्ने गरी आइकन टेली लिमिटेड भारतसँग सम्झौता गरेको प्राधिकरणले काम सम्पन्न गर्न ११ पटकसम्म म्याद थप गरेको थियो । १ अर्ब ६० करोड रुपैयाँमा काम सुरु गरेको कम्पनीले लगानी जुटाउन नसकेपछि प्राधिकरणले २०७६ वैशाख ६ गते सम्झौता तोडेको हो । हेटौंडा–भरतपुर प्रसारण लाइनमा २२६ वटा टावर निर्माण गर्नुपर्नेमा १६४ वटा टावर निर्माण सकिएको जैसवालले बताए । प्राधिकरणले कम्पनीको बैंक खाता नै रोक्का गरेको छ ।

नयाँ टेन्डर एक वर्षभित्र सकिने गरी १ अर्ब ३९ करोड रुपैयाँ बराबरको निकालिने उनले बताए । ‘अहिले दोहोरो प्रसारण लाइन बनाउनुपर्ने गरी नयाँ मोडल तयार भएको छ,’ जैसवालको भनाइ छ, ‘यही कारणले धेरै काम सकिए पनि ठूलो रकमको टेन्डर गर्न लागिएको हो । नयाँ कम्पनीसँग एक वर्षभित्र काम सकाउने गरी सम्झौता हुनेछ ।’

यस्तै भरतपुर–बर्दघाट २२० केभी प्रसारण लाइनको काम भने तीव्र गतिमा अघि बढिरहेको छ । हेटौंडा–भरतपुर–बर्दघाट प्रसारणलाईअन्तर्गत भरतपुर–बर्दघाट लाइनको काम ५० प्रतिशत सकिएको आयोजना प्रमुख जैसवालले जानकारी दिए । चिनियाँ कम्पनी हेम्टन अप्टिकल इलेक्ट्रिक कम्पनीले उक्त क्षेत्रमा काम गरिरहेको छ ।

५५ लाख डलरमा सम्झौता भएको उक्त प्रसारण लाइनको काम चालु आर्थिक वर्षमा नै सकिने जैसवालले बताए । ‘चिनियाँ कम्पनीलाई ठेक्का दिएर काम अघि बढाइएको छ,’ उनले भने, ‘चालु आर्थिक वर्षमा काम सकिन्छ । कामको प्रगति निकै सन्तोषजनक छ । अहिले नै ५० प्रतिशत काम सकिएको छ ।’

भरतपुर–बर्दघाट प्रसारण लाइनमा पर्ने २४६ वटा टावरमध्ये ११९ वटा टावरको निर्माण सकिएको छ । १५२ वटाको फाउन्डेसन सकिएको र १० वटाको फाउन्डेसनको काम जारी रहेको आयोजना प्रमुख जैसवालले बताए । १८ महिनामा काम सक्ने गरी २०७५ साउन २१ गते हेम्टन अप्टिकल इलेक्ट्रिक कम्पनीसँग सम्झौता भएको थियो । ‘२०७६ माघ २३ गतेसम्म कम्पनीको म्याद छ,’ उनले भने, ‘अहिले निर्माणको क्षेत्रमा कुनै ठूलो समस्या देखिएको छैन । काममा अवरोध पनि भएको छैन । यही गतिमा काम हुने हो भने समयभन्दा अगाडि नै सम्पन्न हुनेछ ।’

यस्तै विश्व बैंकको सहयोगमा हेटौंडा–११ थाना भर्‍याङमा प्रसारण लाइनका लागि सबस्टेसनको काम पनि धमाधम भइरहेको छ । हेटौंडा–ढल्केवर–इनरुवा ४०० केभीएका लागि सबस्टेसन निर्माणको काम पनि भइरहेको छ । नेपाल विद्युत् प्राधिकरणका कार्यकारी निर्देशक कुलमान घिसिङले पनि उक्त क्षेत्रका सबस्टेसनको अनुगमन गरेका थिए ।

प्रकाशित : श्रावण २७, २०७६ ०७:५८
पूरा पढ्नुहोस्
प्रतिक्रिया
पठाउनुहोस्
ADVERTISEMENT