उपनिर्वाचनको तयारी : कास्की र बागलुङमा थपिए मतदाता

प्रदेश ब्युरो

पोखरा — आगामी मंसिर १४ मा हुने उपनिर्वाचनका लागि कास्की र बागलुङ निर्वाचन कार्यालयले आन्तरिक तयारी सुरु गरेका छन् । यसैक्रममा दुवै जिल्ला कार्यालयले मतदाता नामावली रुजु गरी निर्वाचन आयोगमा पठाएका छन् ।

दुवै जिल्लामा मतदान हुने निर्वाचन क्षेत्रमा मतदाता थपिएका छन् । कास्की निर्वाचन क्षेत्र २ मा प्रतिनिधिसभा र बागलुङ निर्वाचन क्षेत्र नम्बर २ को (२) मा प्रदेशसभा सदस्यका लागि निर्वाचन हुँदै छ ।

पर्यटनमन्त्री भएकै बेला गत फागुनमा हेलिकप्टर दुर्घटनामा रवीन्द्र अधिकारीको मृत्यु भएपछि कास्की–२ खाली भएको थियो । यसैगरी कलेजोसम्बन्धी रोगका कारण गत मंसिरमा प्रदेशसभा सदस्य टेकबहादुर घर्तीको मृत्यु भएपछि बागलुङ–२ को २ खाली भएको हो ।

निर्वाचन अधिकारी महेन्द्रराज सुवेदीका अनुसार कास्की निर्वाचन क्षेत्र नम्बर २ मा ७२ हजार २ सय मतदाता पुगेका छन । यसअघि २०७४ को निर्वाचनमा यो संख्या ७० हजार ६ सय ५१ थियो । ‘हामीले साउन १६ गतेसम्म मतदाता नामावलीमा नाम दर्ता गराएको संख्या अद्यावधिक गरी केन्द्रमा पठाएका छौं,’ सुवेदीले भने, ‘मतदानस्थल र केन्द्रको अद्यावधिक गर्न पर्न नपर्ने अध्ययनमा छौं ।’ यसअघि उक्त निर्वाचन क्षेत्रमा ३२ मतदानस्थल र ८२ मतदान केन्द्र थिए । उनले उपनिर्वाचनका लागि आवश्यक तयारी थालिइसकेको बताए । निर्वाचन क्षेत्रमा पोखरा महानगरका ११ वटा वडाहरू पर्छन् ।

बागलुङका जिल्ला निर्वाचन अधिकारी विकासराज शर्माका अनुसार निर्वाचन क्षेत्र २ को (२) मा ३५ हजार ६ सय ३४ मतदाता पुगेका छन् । अघिल्लो निर्वाचनमा ३३ हजार २ सय ४० मतदाता रहेकामा २ हजार ३ सय ९४ जना थपिएका हुन् । यहाँ ४२ मतदान केन्द्र थिए । बागलुङमा एक वडाध्यक्षको पनि निर्वाचन हुँदै छ ।

बडिगाड गाउँपालिका–२ का अध्यक्ष विष्णुप्रसाद भुसाल जिल्ला समन्वय समितिको उपप्रमुखमा निर्वाचित भएपछि दुई वर्षदेखि पद खाली छ । उक्त वडामा १ हजार ७ सय ७५ मतदाता छन् । अघिल्लो निर्वाचनमा १ हजार ६ सय ७० रहेकोमा १ सय ५ जना थपिका हुन् । ‘तत्कालका लागि निर्वाचनको मिति मात्र घोषणा भएकाले हामीले पछिल्लो तथ्यांक प्रकाशित गरेका हौं, अरू काम निर्वाचन अधिकृतको घोषणापछि मात्र सुरु हुन्छ,’ शर्माले भने, ‘अन्तिम नामावली निर्वाचन मिति घोषणाकै समयलाई मानेर गर्छौं ।’

प्रकाशित : श्रावण २८, २०७६ १०:१८
ADVERTISEMENT
प्रतिक्रिया
पठाउनुहोस्
ADVERTISEMENT

म्याद सकियो, पुल बनेन

प्रताप रानामगर

दमौली — तनहुँको भीमाद मिर्मीभीम मार्गमा रहेको जिदी खोला मोटरेबल पुल निर्माण अलपत्र परेको छ । ठेकेदारले लापरबाहीले पुल अलपत्र परेको हो । 

पुल निर्माणको म्याद सकिइसकेको छ । तर, पुल भने बन्न सकेको छैन । पुलको जग राख्ने र सबस्ट्रक्चर राख्ने कामबाहेक केही पनि नभएको डिभिजन सडक तनहुँका सूचना अधिकारी सचिन श्रेष्ठले बताए । ‘पुल निर्माणमा प्रगति नभएपछि ठेकेदार कम्पनी शान्ति निर्माण सेवालाई ताकेता गरिरहेका छौं,’ उनले भने ।

दुई स्पानको पुलको लम्बाइ ७० मिटर छ । चार करोड ९० लाख ८२ हजार रुपैयाँको लागतमा पुल निर्माणका लागि २०७३ असार २९ मा सम्झौता भएको थियो । सम्झौता भएको दुई वर्षको अवधिमा निर्माण सम्पन्न गर्नुपर्ने म्याद थियो । सम्झौताअनुसार ०७५ असार २८ मा निर्माण सम्पन्न गर्नुपर्ने हो ।

ठेकेदार कम्पनीले म्याद थपका लागि निवेदन दिएको श्रेष्ठले बताए । ‘निवेदन दियो भन्दैमा म्याद थप्ने होइन । ठेकेदारसँग पुल निर्माणमा ढिलाइको कारणसहित उत्तर मागेका छौं,’ उनले भने, ‘तर, अहिलेसम्म चित्तबुझ्दो उत्तर आएको छैन ।’ चित्त बुझदो उत्तर नआए हर्जना लगाउने गरी म्याद थप्न सकिने उनले उल्लेख गरे । म्याद थपका लागि निवेदन दिए पनि अहिलेसम्म कुनै प्रक्रिया अघि बढाइएको छैन ।

निर्माण सामग्री नपाउँदा निर्माणमा ढिलाइ भएको ठेकेदार विनोद महर्जनले बताए । ‘फाउन्डेसनका काम भइसकेको छ,’ उनले भने, ‘अन्य निर्माण सामग्री नआउँदा ढिलाइ भएको हो ।’ निर्माण सामग्री नेपालमा नपाइने र भारतबाट ल्याउनुपर्ने भएकोले माग गरिसकेको ठेकेदार कम्पनीले जनाएको छ । निर्माण सामग्री आएको ६ महिनाभित्र पुल निर्माण सकिने उनले बताए ।

पुल निर्माण नहुँदा बर्खायाममा समस्या हुने स्थानीय निर्मल थापाले बताए । ‘खोलामा बाढी आउँछ,’ उनले भने, ‘गाडी तर्न सकिँदैन । सवारी साधन तर्न नसक्दा यात्रुले सास्ती खेप्नुपरेको छ ।’ ज्यान जोखिममा राखेर तर्न बाध्य भएको उनले बताए । उक्त सडक खण्डमा कालोपत्रे र ग्राभेल भइसकेको छ । जिदी खोलामा मोटरेबल पुल निर्माण सुरु भएपछि मिर्मी–भिमाद सडक खण्डअन्तर्गत जिदीखोलादेखि रातेपहरासम्म कालोपत्रे गरिएको छ ।

प्रकाशित : श्रावण २८, २०७६ १०:१६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT