महानगरका मेयर र उपमेयरको सेवासुविधा घट्यो

प्रतीक्षा काफ्ले

गण्डकी — पोखरा महानगर प्रमुखलाई नायब सुब्बा सरहको स्वकीय सचिव दिइने भएको छ । गण्डकी प्रदेशसभाको विधायन समितिको सोमबारको बैठकले मेयरका लागि नासु र उपमेयरका लागि खरिदारसरहको स्वकीय सचिव दिने निर्णय गरेको हो । 

नासु र खरिदार सरहको सुविधा दिने निर्णय भएसँगै महानगरका मेयर र उपमेयरको सेवासुविधा घटेको हो । अहिलेसम्म मेयरले अधिकृत र उपमेयरले नासु सरहको स्वकीय सचिव राख्दै आएका छन् । प्रदेश सरकारले ल्याएको जनप्रतिनिधिको सेवासुविधा सम्बन्धी ऐनको संशोधनसम्बन्धी विधेयकमाथिको छलफलमा समितिका सबै सदस्यको सहमतिले नासु र खरिदारमा टुंग्याएका हुन् ।

मर्यादाक्रममा मेयर र उपमेयरभन्दा आफूहरू माथि भएको भन्दै प्रदेशसभा सदस्यले पनि शाखा अधिकृत सरहको स्वकीय सचिव पाउनुपर्ने माग गरेका थिए । तर, नासु सरहको स्वकीय सचिव राख्ने निर्णय भएपछि मेयरका लागि पनि आफू सरहकै राख्ने निर्णयमा विधायन समिति पुगेको हो । अहिले सांसदहरूले पनि धमाधम स्वकीय सचिव नियुक्ति गरेका छन् । आफूहरूलाई भन्दा माथिल्लो तहको स्वकीय सचिव राख्न मेयरले नपाउने भन्दै समितिमा विरोध भएपछि समितिका सभापति मोहनप्रसाद रेग्मीले मेयरका लागि नासु र उपमेयरका लागि खरिदारसरह राख्ने प्रस्तावसँगै निर्णय टुंग्याएका थिए ।

सत्तापक्ष नेकपाका सांसद राजीव पहारीले संघीयता नेपालमा पहिलो अभ्यास भएकाले पहिलै ठूलो सेवासुविधा लिएर भार थप्नु नहुने बताए । ‘प्रदेश सरकारको एक वर्ष बित्यो अहिलेसम्म ऐन र कानुन बनाउनेबाहेक अन्य काम भएको छैन,’ उनले भने, ‘अब बनाएका कानुन कार्यान्वयनतर्फ लाग्नुपर्छ । कानुन बनाएर थुपारेर मात्र जनताले बुझेनन् भने कसरी कार्यान्वयन हुन्छ ?’

प्रदेशसभाबाट बनाइएका कानुन जनताले प्रत्यक्ष अनुभूति लिन पाउनुपर्ने उनको भनाइ थियो । जनप्रतिनिधिको सेवासुविधाका कारण सरकारले गरेका राम्रा काम पनि ओझेलमा परेको बताउँदै पहारी पुनः भन्छन्, ‘सहयोग लिने नै हो । सानो–ठूलो पोस्ट भन्न हुँदैन । खरिदार भए पनि नासु भए पनि काम गर्ने तरिका एउटै हो ।’

यसो त उनले सेवासुविधा विदेशीसरह हुँदै गएको बताउँदै विकास निर्माणको काम विदेशको जसरी अघि बढ्न नसकेको बताएका थिए । प्रमुख प्रतिपक्ष कांग्रेसका प्रमुख सचेतक मणिभद्र शर्माले आवश्यकतानुसार स्वकीय सचिव राख्नु गलत नरहेको बताए । ‘सरकारले दिएको पीए हामीले हुन्न भनेका छैनौं । हामी सम्मानपूर्वक ग्रहणगर्छौं,’ शर्मा भन्छन्, ‘अब सरकार पोखरा मात्रै बसेर होइन प्रदेशका सबै कुना–कुनामा पुगेर विधेयकको मस्यौदा तयार गर्नुपर्‍यो । यसो भयो भने बाहिर सकारात्मक सन्देश जान्छ ।’

जनप्रतिनिधिको सेवासुविधा बढाउनका लागि साउन ९ मा ऐन संशोधनका लागि प्रदेशसभामा पेस गरिएको थियो । १० मा दफावार छलफलका लागि विधायन समिति लगिएको हो । प्रतिपक्ष दल राष्ट्रिय जनमोर्चाका कृष्ण थापाले दोहोरो सुविधा लिन नपाउने भन्दै प्रदेशसभा सचिवालयमा १३ गते संशोधन प्रस्ताव दर्ता गरेका छन् । संशोधन फिर्ता नलिने भएपछि समितिको बैठकले पुनः प्रदेशसभामा नै पेस गर्ने भएको छ । सभामा बहुमत र अल्पमतको आधारमा पास गरिन्छ ।

प्रकाशित : श्रावण २८, २०७६ १०:२९
ADVERTISEMENT
प्रतिक्रिया
पठाउनुहोस्
ADVERTISEMENT

बालुवा झिकेको खाल्डोमा दुईजनाको मृत्यु भएपछि ओखरपौवा तनावग्रस्त

कृष्ण थापा

नुवाकोट — ककनी गाउँपालिका–१ ओखरपौवामा बालुवा झिकेको खाल्डोमा परेर दुई जनाको मृत्यु भएपछि स्थिति तनावपूर्ण बनेको छ । ककनी गाउँपालिका–१ ओखरपौवाकी १३ वर्षीया विनिता बलामी पौडी खेल्ने क्रममा डुबेकी थिइन् । उनलाई बचाउने क्रममा अर्की महिला समेत डुबेको जिल्ला प्रहरी कार्यालयका प्रहरी निरीक्षक विष्णुहरि फुयालले जानकारी दिए । 

सोमबार अपरान्ह बलामी पौडी खेलिरहेको अवस्थामा डुबेपछि नजिकै खोलाबाट थुन्सेमा बालुवा झिकिरहेकी सिन्धुली पिलल गाउँपालिकाकी ३५ वर्षीया लक्ष्मी तामाङले देखेर बचाउन जाँदा उनी समेत डुबेको ककनी गाउँपालिकाका अध्यक्ष मानबहादुर लामाले बताए ।

खोलामा पहिल्यै खाल्डो बनाएको र नपुरेकाले मान्छे डुबेको गाउँपालिका अध्यक्ष लामाले जानकारी दिए । मंगलबार बिहानदेखि उक्त ठाउँमा झडपको स्थिति बनेपपछि सदरमुकाम, ककनी र काठमाडौंदेखि नेपाल प्रहरी र सशस्त्र गरी ५० जना परिचालन गरिएको छ ।

उनीहरुको शव पोष्टमार्टका लागि प्रहरीले लगेको छैन । सहमति भएपछि मात्र शव उठाउने स्थानीयले बताएका छन् ।स्रोतका अनुसार कोल्पुखोलाभरि अवैध रुपमा बालुवा झिक्नेले खोलामा खाल्डो बनाएको र सोही खाल्डोमा ज्यान गएको हो । रमण कन्ट्रक्सनका रामकृष्ण रेग्मीको मेसिनले सोही स्थानका मनकृष्ण बलामीले बालुवा झिकेर खाल्डोमा उनीहरु परेको स्रोतले जनायो ।

धादिङ धुनेबेंसी नगरपालिका, नुवाकोटपट्टीको ककनी गाउँपालिका र बेलकोटगढी नगरपालिका भएर कोल्पुखोला बग्छ । उक्त खोलामा अवैधरुपमा बालुवा झिकेर रातारात काठमाडौं लगेर बिक्री गर्ने गरिएको छ । उक्त खोलाभरी ३० वटा डोजर अवैधरुपमा बालुवा झिक्ने कार्यमा प्रयोग गरिएको पाइएको छ ।

प्रकाशित : श्रावण २८, २०७६ १०:२५
पूरा पढ्नुहोस्
प्रतिक्रिया
पठाउनुहोस्
ADVERTISEMENT