विद्यालय सहयोगी जंगलमा मृत भेटिए  

हरिराम उप्रेती

गोरखा — गोरखा नगरपालिका–१० टक्सारस्थित मनकामना आवासीय सुस्तश्रवण माध्यमिक विद्यालयका कर्मचारी करिब ५० वर्षीय श्याम हरी घिमिरे मृत अवस्थामा भेटिएका छन् ।  

विद्यालयका कार्यालय सहयोगी घिमिरे सोमबार साँझबाट हराएपछि उनको खोजी गर्दा शव भेटिएको प्रहरीले जनाएको छ । सोही वडाको नौविसे स्थायी घरभएका मृतक घिमिरे पनि सुस्तश्रवण हुन् । उनी २० वर्षदेखि उक्त विद्यालयमा कार्यरत थिए । ‘हिजो साँझ साढे ८ बजे खाना खाएर फर्किएका रहेछन्,’ विद्यालय व्यवस्थापन समितिका अध्यक्ष खडानन्द रेग्मीले भने, ‘बिहान पाँच बजे सधै विद्यालय आइपुग्थे, आज आएनन्, परिवारलाई फोन गर्दा साँझ देखि नै घरमा नआएको थाहा पायौँ ।’

उनको खोजी गर्दै जाँदा टक्सारकै सडक किनारमा चप्पल र लाइट भेटिएको थियो । ‘जंगलतिर हेरेको घिस्रिएको डोब देखेर प्रहरीलाई खबर गर्यौं’ उनले भने । विद्यालय र घर बीचको सडकबाट झण्डै ५० मिटर तल कुवाडी जंगलमा उनको शव भेटिएको प्रहरीले जनाएको छ । उनको खुट्टा र टाउकोमा चोट पनि देखिएको प्रत्यक्षर्शीले बताए ।

मृत्यु शंस्कास्पद भएको भन्दै घटनाको छानबिनका लागि स्थानीले माग गरेका छन् । घटनाको अनुसन्धान भइरहेको डिएसपी महेन्द्र नेपालले बताए ।

प्रकाशित : श्रावण २८, २०७६ ११:०६
प्रतिक्रिया
पठाउनुहोस्
ADVERTISEMENT
ADVERTISEMENT

लामो दूरीमा दुई चालकको व्यवस्थालाई कडाइ गरिने

कान्तिपुर संवाददाता

काठमाडौँ — लामो दूरीमा चल्ने सवारीसाधनको दुर्घटना बढेसँगै यातायात व्यवस्था विभागले दुई चालक हुनुपर्ने व्यवस्थालाई कडाइका साथ कार्यान्वयन गर्ने भएको छ । 

विभागले म‌ंगलबार सूचना जारी गर्दै प्रस्थानविन्दुबाट २५० किमी वा सोभन्दा बढी दूरीमा चल्ने सवारीसाधनले अनिवार्यरूपमा दुई चालक नराखेको पाइए कारवाही गर्ने जनाएको हो।

सवारी तथा यातायात व्यवस्था ऐन, २०४९ को दफा १०४ मा लामो दूरीमा चल्ने सार्वजनिक सवारीमा कम्तीमा दुई चालक अनिवार्य राखी प्रत्येक छ/छ घण्टामा पालैपालो सवारी चलाउनुपर्ने व्यवस्था छ।

एउटै चालकले लामो दूरीमा सवारी चलाउँदा थकानका कारण सवारी दुर्घटनाको दर बढेको विभागको भनाइ छ। विभागले लामो दूरीमा चल्ने यातायातको साधनमा दुई चालकको व्यवस्था गर्न सम्बन्धित सवारी धनीलाईसमेत निर्देशन दिएको छ।

त्यस्तै विभागले मध्यम दूरीका चल्ने सवारीसाधनले पनि प्रत्येक चार घण्टामा आधा घण्टा विश्राम लिनुपर्ने व्यवस्थालाई पनि कडाइ गर्ने जनाएको छ। ऐनमा चार घण्टाभन्दा बढीको दूरीमा चल्ने यात्रुवाहक सार्वजनिक सवारीले प्रत्येक चार घण्टामा आधा घण्टा विश्राम लिनुपर्ने व्यवस्था गरिएको छ।

दुर्घटना न्यूनीकरण तथा यातयात व्यवस्थालाई भरपर्दो बनाउने पर्याप्त कानून भए पनि कार्यान्वयन फितलो हुँदा सार्वजनिक सवारीमा यात्रा गर्ने नागरिकले अकालमा ज्यान गुमाउँदै आएका छन्। विशेषतः लामो दूरी तथा रात्रि सेवाका सवारी चालक यात्राकै क्रममा निदाउने, थकान तथा तोकिएको समयमै गन्तव्यमा पुग्नुपर्ने मानसिक तनावका कारण दुर्घटना बढेको ट्राफिक प्रहरीले जनाएको छ।

विभागले सार्वजनिक सवारीलाई सुरक्षित र व्यवस्थित बनाउन दिइएको निर्देशन कार्यान्वयन नगरेको पाइए सम्बन्धित यातायात धनीविरुद्ध कारवाही गरिने चेतावनीसमेत दिएको छ।

गत शुक्रबारमात्रै सर्लाहीको मलङ्गवाबाट काठमाडाैं आउँदै गरेको रात्रि बस पृथ्वी राजमार्गको बेनीघाट रोराङ गाउँपालिका–३ सलाङघाटमा त्रिशूली नदीमा खस्दा ११ जनाको मृत्यु भएको थियो। सोही दुर्घटनामा परी एक बालकसहित २० बेपत्ता भएका थिए।

प्रकाशित : श्रावण २८, २०७६ १०:५३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT