बुटवल — प्रदेश ५ मा मुख्यमन्त्री शंकर पोखरेलको पद तथा गोपनियताको सपथ आज हुँदैछ ।
प्रदेश प्रमुख उमाकान्त झाले एमाले संसदीय दलका नेता पोखरेललाई बुधबार मुख्यमन्त्रीमा नियुक्त गरेका थिए । मुख्यमन्त्रीको सपथग्रहण भव्य बनाउने तयारीे भएको छ ।
दिउँसो ३ बजे सडक डिभिजन कार्यालय परिसरमा हुने सपथग्रहण कार्यक्रममा सांसद, प्रदेश प्रमुख, प्रदेश सचिव, उच्च अदालतका न्यायाधीश, स्थानीय तहका प्रतिनिधि लगायतको उपस्थिती हुने प्रदेश प्रमुख कार्यालयका सचिव सनतकुमार दुवाडीले बताए ।
सपथग्रहण लगत्तै मुख्यमन्त्री पोखरेलले आजै तीन सदस्यीय मन्त्रीमण्डल बिस्तारको तयारी गरेका छन् । पहिलो चरणमा एमालेबाट नवलपरासीका बैजनाथ चौधरी र माओवादीबाट कुलप्रसाद केसी मन्त्री बन्ने सम्भावना छ । एमाले संसदीय दलले चौधरीलाई पठाउने निर्णय गरिसकेको छ भने माओवादी आज निर्णय गर्ने तयारीमा छ ।
प्रदेश ५ मा एक्लै सरकार गठन नहुने भएपछि मुख्यमन्त्री पाएको एमालेलाई माओवादी केन्द्रका २० सांसदको समर्थन छ । प्रदेशका ८७ सांसद मध्ये एमालेका ४१ जना छन् ।
